މިއަދު ކުރިއަށްދާ ރިޔާސީ އިންތިހާބުގައި ދެއްވި ވޯޓާ އެކު އެމަނިކުފާނު ވޯޓު ދެއްވި ރިޔާސީ އިންތިހާބުގެ އަދަދު 11 އަށް އަރާފައިވާ ކަން ކުރީގެ ރައީސް މައުމޫނު އަބްދުލް ގައްޔޫމު ފާހަގަކުރައްވައިފި އެވެ.
ދަރިކަލުން ފާރިސް މައުމޫނު ވާދަކުރައްވާ ރިޔާސީ އިންތިހާބުގައި ވޯޓު ދެއްވާ މަންޒަރު ފެންނަ ދެ ފޮޓޯއަކާ އެކު ކުރެއްވި ޓްވީޓެއްގައި މައުމޫނު ވިދާޅުވީ 1973 ވަނަ އަހަރުން ފެށިގެން އިންތިހާބުތަކުގައި ވޯޓު ދެއްވަމުން ގެންދަވާ ކަމަށެވެ. އެ ތާރީހަށް ބަލާއިރު އެމަނިކުފާނު ވޯޓު ދެއްވި ފުރަތަމަ ރިޔާސީ އިންތިހާބަކީ ކުރީގެ ރައީސް އިބްރާހީމް ނާސިރު ދެވަނަ ދައުރަށް ހޮވުނު އިންތިހާބެވެ.
އޭރުން ފެށިގެން 2003 ވަނަ އަހަރާ ހަމައަށް މައުމޫނަށް ވޯޓު ދެއްވިފައި ވާނީ ފެންނަ ނުފެންނަ ވޯޓުގެ ގޮތުގައި ބޭއްވި ރިޔާސީ އިންތިހާބުތަކުގަ އެވެ. އެއީ އެމަނިކުފާނުގެ ފަހު ދައުރު ނިންމަވައިލެއްވި އިންތިހާބު 2008 ވަނަ އަހަރު ބޭޭއްވުމާ ހަމައަށް ރާއްޖޭގައި ނަގަމުން އައީ ފެންނަ ނުފެންނަ ވޯޓު ކަމަށް ވާތީ އެވެ.
އޭރު އޮތް ނިޒާމުގައި ރައީސް ކަމަށް އިންތިހާބުކުރަން ރައްޔިތުންގެ ފެންނަ ނުފެންނަ ވޯޓަށް ހުށަހަޅާނެ ނަމެއް ނިންމަނީ ރައްޔިތުންގެ މަޖިލީހުންނެވެ.
މައުމޫނު 11 ރިޔާސީ އިންތިހާބެއްގައި ވޯޓު ދެއްވި އިރު އޭގެ ތެރެއިން ފަސް އިންތިހާބެެއްގައި ރައްޔިތުން ވޯޓު ދިނީ އެމަނިކުފާނު ރައީސްކަމަށް އިންތިހާބުކުރަން ފެންނަކަން ނުވަތަ ނޫންކަން ކަނޑައެޅުމަށެވެ. އަދި އެއް އިންތިހާބަކީ ގިނަ ސިޔާސީ ޕާޓީތައް ބައިވެރިވެ، ފަސް ކެންޑިޑޭޓުން ވާދަކުރެއްވި އިންތިހާބެކެވެ. އެެއީ 2008 ވަނަ އަހަރުގެ ރިޔާސީ އިންްތިހާބެވެ. އެ އިންތިހާބުގެ ދެ ވަނަ ބުރުން މައުމޫނަށް ނާކިޔާބީ ކުރިމަތިވެވަޑައިގެންނެވީ އެމްޑީޕީގެ ކެންޑިޑޭޓް މުހައްމަދު ނަޝީދާ ވާދަކުރައްވައިގެންނެވެ.
އޭގެ ފަހުން ބޭއްވި 2013 ވަނަ އިންތިހާބު ކާމިޔާބުކުރެއްވީ މައުމޫނު އިސްކޮށް ހުންނަވައިގެން އުފެއްދެވި ޕީޕީއެމްގެ ކެންޑިޑޭޓް، ކޮއްކޯފުޅު އަބްދުﷲ ޔާމީން އަބްދުލް ގައްޔޫމެވެ. އަދި 2018 ވަނަ އަހަރުގެ އިންތިހާބު ކާމިޔާބުކުރެއްވީ އެމަނިކުފާނުގެ އެމްއާރްއެމް ބައިވެރިވި ކޯލިޝަނުގެ ތާއީދާ އެކު އެމްޑީޕީގެ ކެންޑިޑޭޓްގެ ގޮތުގައި ވާދަކުރެއްވި، މިހާރުގެ ރައީސް އިބްރާހީމް މުހައްމަދު ސޯލިހެވެ.
