މޮރޮކޯގެ މެދުތެރެއަށް އައި 6.8 މެގްނިޓިއުޑްގެ ބާރުގަދަ ބިންހެލުމެއްގައި މަދުވެގެން 296 މީހުން މަރުވެފައިވާ ކަމަށް އެ ގައުމުގެ އިންޓީރިއާ މިނިސްޓްރީން ބުނެފި އެވެ.
ބިންހެލުމުގެ އެޕިސެންޓަރަކީ މަރަކޭޝްގެ ހުޅަނގު ދެކުނުން 71 ކިލޯމީޓަރު ދުރުން ހައި އެޓްލަސް ފަރުބަދަތަކުގެ ތެރެއިން ކަމަށާއި ބިންހެލުން އައީ ބިމުގެ 18.5 ކިލޯމީޓަރު އަޑިން ކަމަށް އެމެރިކާގެ ޖިއޮލޮޖިކަލް ސާވޭއިން ބުންޏެވެ.
ބިންހެލުން އައީ މޮރޮކޯގެ ގަޑިން ރޭގަނޑު 11:11 ގަ އެވެ. ސޯޝަލް މީޑިއާގައި ދައުރުވާ ވީޑިއޯތަކުން ފެންނަނީ އިމާރާތްތަކަށް ގެއްލުން ލިބިފައިވާ މަންޒަރެވެ.
މަރަކޭޝްގެ އޯލްޑް ސިޓީ ސަރަހައްދުގެ ބައެއް އިމާރާތްތައް ބިމާ ހަމަވެފައިވާ އިރު، ބާރުގަދަ ލޮޅުންތައް އައިސްދާނެތީ ގިނަ މީހުން ތިބީ ގެތަކަށް ނުވަދެ މަގުމަތީގައި ކަމަށް ރިޕޯޓުތައް ބުނެ އެވެ.
ރިޕޯޓުތައް ބުނާ ގޮތުން ބިންހެލުމުގެ އެޕިސެންޓަރާ 250 ކިލޯމީޓަރު ދުރުން ވެރިރަށް ރަބާތާއި، ކަސަބްލަންކާ އަދި އެސައުއިރާ ސިޓީތަކަށް ވެސް އަސަރުކުރި އެވެ.
