ރައީސް މައުމޫން އަބްދުލްގައްޔޫމްގެ ވެރިކަމުގައި ބަޔަކަށް އަނިޔާތަކެއް ލިބި ހިތާމަތަކެއް ލިބުނުކަން އެއީ ހަގީގަތެއް ކަމަށް ގަބޫލު ކުރައްވާ ކަމަށް ވިދާޅުވެ ދަރިކަލުން އަދި އަމިއްލަ ގޮތުން ރިޔާސީ އިންތިހާބުގައި ވާދަކުރައްވާ ފާރިސް މައުމޫން މައާފަށް އެދިވަޑައިގެންފި އެވެ.
މީސް މީޑިއާއަށް ރޭގައި ފާރިސް ދޫކޮށްލެއްވި ވީޑިއޯއެއްގައި ވިދާޅުވީ މައުމޫންގެ ވެރިކަމުގައި ބަޔަަކަށް އަނިޔާ ލިބުނު ވާހަކަ ދޮގު ނުކުރާ ކަމަށާއި ވެރިކަން ލިބިވަޑައިގެންފި ނަމަ އަނިޔާ ލިބުނު މީހުންނަށް އިންސާފު ހޯދައިދެއްވާނެ ކަމަށެވެ.
"ރައީސް މައުމޫން ވެރިކަން ކުރެއްވި ދުވަސްވަރު ރައްޔިތުންގެ ތެރެއިން ބަޔަކަށް އަނިޔާތަކެއް ލިބި އަދި ހިތާމަތަކެއް މެދުވެރިވި ކަމަކީ ހަގީގަތެއް، އަޅުގަނޑު ގަބޫލު ކުރާ ކަމެއް، އަދި މި ހިތާމައިގައި އަދިވެސް ބަޔަކު ދެމިތިބި ކަމަކީ އަޅުގަނޑު ގަބޫލު ކުރާ ކަމެއް، އެއީ އަޅުގަނޑު ދޮގު ކުރާ ކަމެއް ނޫން، އަޅުގަނޑު މިކަމަށްޓަކައި ތިޔަ ބޭފުޅުންގެ އަރިހުން ނިހާޔަތަށް މައާފަށް އެދެން،" ފާރިސް ވިދާޅުވި އެވެ.
ފާރިސް އެހެން ވިދާޅުވިއިރު، މީގެ ދުވަސްކޮޅެއް ކުރިން އޮންލައިން މީޑީއާއަކުން އެކަމާ ގުޅޭގޮތުން ސުވާލު ކުރުމުން ފާރިސް ވަނީ ރައީސް މައުމޫނުގެ ވެރިކަމުގައި އެފަދަ ކަންތައްތަކެއް ނުހިނގާކަމަށް ބުނެފަ އެވެ. ރޭގައި ދޫކޮށްލެއްވި ވީޑިއޯގައި ފާރިސް ވަނީ އެކަމަށް ވެސް މައާފަށް އެދިވަޑައިގެންފަ އެވެ.
"މީގެއިތުރުން އަޅުގަނޑު ވަރަށް ފަހުން ދެއްކި ވާހަކައެއްގެ ސަބަބުން މި ހިތާމަތައް އިތުރުވެގެންދިޔަ ކަމަކީ ހަމަ ހަގީގަތެއް އެހެންވީމަ މިކަމަށްޓަކައި ވެސް އަޅުގަނޑު ތިޔަ ބޭފުޅުންގެ އަރިހުން ނިހާޔަތަށް މައާފަށް އެދެން،"
ނަވާރަ ސަތޭކަ ހަތްދިހަ އަށްވަނަ އަހަރުން ފެށިގެން ރާއްޖޭގެ ވެރިކަން ކުރައްވަމުން ގެންދެވި ރައީސް މައުމޫނުގެ ވެރިކަން 30 އަހަރަށްފަހު ނިމުމަކަށް ގެނައުމުގެ އެންމެ ބޮޑު އެއް ސަބަބަކަށްވީ އޭރު އިދިކޮޅުގައި ހަރަކާތްތެރިވަމުންދިޔަ ބޭފުޅުންގެ ބަހުންނަމަ، "30 އަހަރުގެ އަނިޔާވެރިކަން ނިމުމަށް ގެނައުން" މެވެ.
އެގޮތުން 2003 ވަނަ އަހަރުގެ ސެޕްޓެމްބަރު، 19، ގައި މާފުށީ ޖަލުގައި އީވާން ނަސީމް މަރާލުމާ ގުޅިގެން ހިނގާދިޔަ ހަމަނުޖެހުންތަކުގައި ބަޑިޖަހައި ތިން މީހަކު މަރާލި ހާދިސާގެ އިތުރުން ވެސް ޖަލުގައި ދެމުންދިޔަ އަނިޔާއާއި ގޮތް ނޭނގޭ އެތައް މަރެއްގެ ޒިންމާ މައުމޫނުގެ ސަރުކާރުގައި އަޅުވާފައިވެ އެވެ.
އޭގެއިތުރުން ހިޔާލުފާޅު ކުރުމުގެ މިނިވަންކަމާއި އެއްވެ އުޅުމުގެ މިނިވަންކަން ފަދަ ޑިމޮކުރެސީއެއްގައި ލިބިދޭ އެއްވެސް މިނިވަންކަމެއް އެ ދުވަސްވަރު ދިވެހީންނަށް ލިބިފައި ނެތުން ފަދަ އެތައް ކަމެއް އޭރުގެ އިދިކޮޅު ފަރާތްތަކުން ފާހަގަ ކުރަމުންދިޔަ އެވެ. އެކަންކަމަށް އެމަނިކުފާނު ވެސް ވަނީ ފަހުން ޖުމުލަކޮށް އަމިއްލައަށް މައާފަށް އެދިވަޑައިގެންފަ އެވެ.
"އަޅުގަނޑު ކަނޑައެޅި ސިޔާސަތަކުން، އަޅުގަނޑު ނިންމި ނިންމުމަކުން، ނުވަތަ ބަލަންވީވަރަށް އަޅުގަނޑަށް ނުބެލިގެން އެއްވެސް ދިވެހިރައްޔިތަކަށް ދެރައެއް ހިތްދަތިކަމެއް، ވޭނެއް ނުހައްގު ގޮތުގައި ތަހަންމަލު ކުރައްވަން ޖެހިވަޑައިގެންފައި ވާނަމަ، އެކަމަށްޓަކައި އަޅުގަނޑު ހިތާމަ ކުރަން، އަދި އެފަދަ ކަމެއް އެއްވެސް ރައްޔިތަކަށް ދިމާވެފައި ވާނަމަ، ދިމާވި ރައްޔިތެއްގެ ފަރާތުން އަޅުގަނޑު ދީލަތި މައާފަކަށް އެދެން،" ރައީސް މައުމޫންގެ ވަދާއީ ވާހަކަފުޅުގައި ވިދާޅުވެފައިވެ އެވެ.
ފާރިސްގެ ވީޑިއޯގައި އޭނާ ވަނީ ވެރިކަން ލިބިވަޑައިގެންފި ނަމަ މައުމޫންގެ ވެރިކަމުގައި އަނިޔާ ލިބުނު ހުރިހާ އެންމެންނަށް "ފުރިހަމަ ތަސައްލީއެއް" ހޯދައިދެއްވާނެ ކަމަށް ވައުދުވެފަ އެވެ. އަދި އެއީ އެއީ އޭނާގެ އަމިއްލަ ޒިންމާއެއް ކަމުގައި ހަދާނެ ކަމަށް ވެސް ފާރިސް ވަނީ ވިދާޅުވެފަ އެވެ.
