ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބުނު މީހުންނަށް ގޯތި ހަވާލުކުރުން މިއަދު ފަށައިފި އެވެ.
ގުޅީފަޅުން ގޯތި ދޫކުރަން ފެށީ ކުރިން ހިއްކާފައި އޮތް ސަރަހައްދާ އިންވެގެން ފުރަތަމަ ހިއްކި ބިމުންނެވެ. އެގޮތުން އެ ސަރަހައްދުން މިއަދު ފުރަތަ ދޫކޮށްފައިވަނީ 2450 އަކަފޫޓުގެ ގޯއްޗެކެވެ.
ހައުސިން މިނިސްޓްރީން މައުލޫމާތުދޭ ގޮތުގައި މިއަދުން ފެށިގެން ކޮންމެ ދުވަހަކުވެސް ގުޅީފަޅުން ގޯތި ދޫކުރުމުގެ އެއްބަސްވުމުގައި ސޮއިކުރުމާއި ގޯތި ކަނޑައި، ގޯތީގެ ރަޖިސްޓްރީ ހަވާލުކުރުމުގެ މަސައްކަތް ކުރިއަށްދާނެ އެވެ. އަދ ގުޅީފަޅުން ބިން ލިބުނު ހުރިހާ ފަރާތަކަށް އަންނަ ނޮވެމްބަރު 5، ގެ ކުރިން ބިން ހަވާލުކުރެވޭނެ އެވެ.
ގުޅީފަޅުން ގޯތި ދޫކުރުމުގެ މަސައްކަތް މިއަދު ފައްޓަވައިދެއްވައި ނޫސްވެރިންނަށް މައުލޫމާތު ދެއްވަމުން ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ ގުޅީފަޅުން ގޯތި ދޭން ފަށާފައިވާއިރު އެތަނުގައި މީހުން ދިރިއުޅެން ބޭނުންވާ އަސާސީ ވަސީލަތްތަށް ގާއިމުކުރުމުގެ މަސައްކަތް ވެސް އަންނަ ޖެނުއަރީގައި ފަށައިގަނެވޭނެ ކަމަށެވެ.
އަދި ބިން ނުހިއްކިގެން ގޯތި ނުދެވިގެން އުޅެން ނުޖެހޭނެ ކަމަށާއި އެތަނުގައި މީހުން ދިރިއުޅެން ފަށަންވާއިރަށް މަގުތައް ހެދުމާއި ފެނާއި ނަރުދަމާ އަދި ކަރަންޓުގެ ވަސީލަތްތައް ގާއިމުކުރަން ފަށަން ވާންޖެހޭ ތައްޔާރީތައް އާބަންކޯ އާ ގުޅިގެން މިހާރުވެސް ކުރަމުން އަންނަ ކަމަށް އަކްރަމް ވިދާޅުވި އެވެ.
"އަޅުގަނޑުމެންގެ ޕްލޭނެއް އެބައޮތް. އެ ޕްލޭނާ އެއްގޮތަށް އެބަދޭ ހުރިހާކަމެއްވެސް. ފެނާ ނަރުދަމާގެ އަމަލީ މަސައްކަތްވެސް އަންނަ ޖެނުއަރީގައި ފެށޭނެކަމަށް ލަފާކުރަނީ. އެއް އަހަރުތެރޭ އެ މަސައްކަތްވެސް ނިމޭނެ. އެއާ އެކުއެކީގައި މަގުތައް ހެދިގެންދާނެ،" އަކްރަމް ވިދާޅުވި އެވެ.
ބިންވެރިޔާ ސްކީމުގެ ދަށުން ގޯއްޗަށް އެދި ހުށަހެޅި 97 ޕަސެންޓު މީހުންނަށް ގޯތި ދިނުމަށް ސަރުކާރުން ވަނީ ނިންމާފަ އެވެ. އެއީ 18،955 މީހުންނަށް 9003 ގޯއްޗެވެ. އޭގެ ތެރެއިން ހުޅުމާލޭން ގޯތި ލިބޭ މީހުންނަށް ގޯތި ހަވާލުކުރުމުގެ މަސައްކަތްވެސް މިނިސްޓްރީން އަންނަނީ ކުރަމުންނެވެ. މި ސްކީމުގެ ދަށުން ހުޅުމާލޭން ދޫކުރާނީ 1351 ގޯއްޗެވެ. އަދި ގުޅީފަޅުން 2219 އަދި ގިރާވަރު ފަޅު ހިއްކައިގެން 5433 ދިނުމަށް ވަނީ ހަމަޖެހިފަ އެވެ.
