ލަންޑަން (ސެޕްޓެމްބަރު 5) - އާސެނަލްގެ މިޑްފިލްޑަރު ތޯމަސް ޕާޓޭއަށް އަނިޔާވެ ހަމަހަށް ކުޅުމާ ދުރަށް ދާން ޖެހިއްޖެ އެވެ.
ޕާޓޭ 30، އަށް އަނިޔާވީ މިދިޔަ ހަފްތާގައި އާސެނަލްގެ ތަމްރީންތަކުގަ އެވެ. ފުރަތަމަ ބެލެވުނު ގޮތުގައި ޕާޓޭއަށް ލިބުނީ އެހާ ސީރިއަސް އަނިޔާއެއް ނޫނެވެ. ނަމަވެސް އެންމެ ފަހުން ހެދި ސްކޭންތަކުން ޕާޓޭ އަށް ލިބުުނު އަނިޔާ ސީރިއަސް ކަމަށް ވަނީ ކަށަވަރުވެފަ އެވެ. އެހެންކަމުން, އޭނާ އަށް ހަ މަހު ކުޅުމާ ދުރުގައި ހުންނަން ޖެހޭނެ އެވެ.
އެންމެ ފަހުން ލީގުގައި އާސެނަލުން މެންޗެސްޓާ ޔުނައިޓެޑް އަތުން 3-1 އިން މޮޅުވި މެޗުގައި އަނިޔާގެ ސަަބަބުން ޕާޓޭ އަށް ނުކުޅެވުނެވެ. އަނެއްކޮޅުން، ކުރިއަށް އޮތް ފަސްވަރަކަށް މެޗު އާސެނަލުން އޭނާ ނުލައި ކުޅެން ޖެހޭނެ އެވެ. އޭގެ ތެރޭގައި މި ސީޒަންގެ ޗެމްޕިއަންސް ލީގުގައި އާސެނަލް ކުޅޭ ފުރަތަމަ މެޗުވެސް ހިމެނެ އެވެ.
ކުރިއަށް އޮތީ ގައުމީ ޓީމުތަކުގެ މެޗުތަކަށް ފީފާ އިން ކަނޑައަޅާފައިވާ އިންޓަނޭޝަނަލް ބްރޭކެވެ. މި ބްރޭކުގައި ގާނާގެ ގައުމީ ޓީމް އެފްރިކަން ކަޕް އޮފް ނޭޝަންސްގެ ކޮލިފައިންގައި ކުޅޭ ދެ މެޗުގައިވެސް ޕާޓޭއަށް ނުކުޅެވޭނެ އެވެ. އެއީ އަންނަ ބުރާސްފަތި ދުވަހު ސެންޓްރަލް އެފްރިކަން ރިޕަބްލިކާއި އަންނަ ހަފްތާގެ އަންގާރަ ދުވަހު ލައިބީރިއާއާ ދެކޮޅަށް ކުޅޭ މެޗެވެ.
ޕާޓޭ އަށް މި ލިބުނު އަނިޔާގެ ސަބަބުން އާސެނަލްގެ ކޯޗު އާޓެޓާ އަށް އުނދަގޫތަކެއް ކުރިމަތިވާނެ ކަމަށް ބެލެވެ އެވެ. ސަބަބަކީ ޕާޓޭ އަކީ އާޓެޓާގެ ގޭމް ޕްލޭންގެ މުހިންމު ކުޅުންތެރިއަކަށް ވުމެވެ. އެ ގޮތުން ޕާޓޭއަށް އަނިޔާވުމުގެ ކުރިން އާސެނަލް ލީގުގައި ކުޅުނު ތިން މެޗުގައި ވެސް ޕާޓޭ ފުރަތަމަ އެގާރައިގައި ހިމެނިގެން ކުޅުނެވެ. އަނެއްކޮޅުން، އާ ގޭމް ޕްލޭނަކަށް އާޓެޓާ މަސައްކަތް ކުރަމުން އަންނައިރު ޕާޓޭ އަކީ މުހިންމު ކުޅުންތެރިއެވެ.
ސީޒަންގެ ކުރީކޮޅު ޕާޓޭ އަށް އަނިޔާވިއިރު، މި ސީޒަންގެ ފުރަތަމަ މެޗުގައި އާސެނަލްގެ ޑިފެންޑަރު ޖޫލިއެން ޓިމްބާ އަށް ވެސް ވަނީ އަނިޔާވެ ގިނަ ދުވަސްތަކަކަށް ކުޅުމާ ދުރުގައި ހުންނަން ޖެހިފަ އެވެ. އާ ސީޒަނަށް އާސެނަލްއާ ގުޅުނު ޓީމްބާ އަށް މި ސީޒަންގައި ކުޅެވޭނެކަމާ މެދު ވެސް ވަނީ ސުވާލު އުފެދިފަ އެވެ.
