އައްޑޫ ޑިވެލޮޕްމަންޓް ޕްރޮޖެކްޓުގެ ދަށުން އައްޑޫ ސިޓީގެ ބިން ހިއްކުމުގެ މަސައްކަތް ކާމިޔާބުކަމާއެކު ނިންމާލާފައިވާ ކަމަށް ޕްލޭނިން މިނިސްޓްރީން ބުނެފި އެވެ.
މި މަޝްރޫއަކީ އައްޑޫ ސިިޓީއަށް ކުރިއަށް އޮތް 50 އަހަރަށް ބޭނުންވާ ވަރަށް ބިން އިތުރުކޮށް، ޓޫރިޒަމް ތަރައްގީކޮށް އިގުތިސާދު ކުރިއެރުވުމުގެ ގޮތުން ސަރުކާރުން ކުރިއަށްގެންދާ ބިޔަ މަޝްރޫއެކެވެ. މި މަޝްރޫއުގެ ދަށުން، އައްޑުއަށް 194 ހެކްޓަރުގެ ބިން އިތުރުކޮށް، 11 ކިލޯމީޓަރުގެ ޝޯ ޕްރޮޓެކްޝަން ގާއިމްކުރުމަށް ވަނީ ހަމަޖެހިފަ އެވެ.
ޕްލޭނިން މިނިސްޓްރީން މިއަދު ބުނީ އައްޑޫ ސިޓީގެ ބިން ހިއްކުމުގެ މަސައްކަތް މިދިޔަ އޮގަސްޓު މަހުގައި ނިމިފައިވާ ކަމަށެވެ. އެގޮތުން އައްޑޫ ސިޓީ މަރަދޫ އަދި މަރަދޫ ފޭދޫގައި 76 ހެކްޓަރު އަދި ހިތަދޫގައި 80 ހެކްޓަރު ހިއްކައި ނިމިފައިވާ ކަމަށް މިނިސްޓްރީން ބުންޏެވެ.
އަދި މި މަޝްރޫއުގެ ދަށުން އައްޑޫ ސިޓީގައި ރިސޯޓް އައިލެންޑްގެ ގޮތުގައި ތަރައްގީކުރާ ތިން ރަށަށް، 25 ހެކްޓަރުގެ ބިމާއި ހަންކެޑެގައި 4.72 ހެކްޓަރުގެ ބިން ވަނީ ހިއްކައި ނިމިފައިވާ ކަމަށްވެސް މިނިސްޓްރީން ބުންޏެވެ.
ފަތުރުވެރިކަމަށް ހާއްސަކޮށްގެން ހިއްކި މި ތިން ރަށަށް އައްޑޫ ސިޓީ ކައުންސިލުން މިއަދު ވަނީ ނަންތަކެއްވެސް ފާސްކޮށްފަ އެވެ. ސިޓީ ކައުންސިލުން މި ރަށްތަކަަށް ނަން ދިނީ، އެ ރަށްތަކުގެ ބީލަން ހުޅުވާލަން ޓޫރިޒަމް މިނިސްޓްރީން ބޭނުންވެގެންނެވެ.
އައްޑޫ ސިޓީގެ ބިން ހިއްކުމުގެ ބިޔަ މަޝްރޫއަކީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ކްރެޑިޓް ލައިންގެ އެހީގައި ކުރިއަށްގެންދާ މަޝްރޫއެކެވެ.
ޕްލޭނިން މިނިސްޓްރީން ބުނީ މުޅި މަޝްރޫއުގެ 75 ޕަސެންޓް މަސައްކަތް މިހާރު ނިމިފައިވާ ކަމަށެވެ. އަދި މިހާރު ކުރިއަށްދަނީ ހިއްކާފައިވާ ސަރަހައްދުތަކުގެ ގޮނޑުދޮށް ހިމާޔަތްކުރުމުގެ މަސައްކަތް ކަމަށްވެސް ބުންޏެވެ.
