އަސްކަރީ ބަގާވާތެއްގައި ވެރިކަމުން ދުރުކުރުމަށް ފަހު ގޭ ބަންދުގައި ހުންނެވި ގެބޯންގެ ރައީސް އަލީ ބޮންގޯ އެހީއަށް އެދިވަޑައިގެންފި އެވެ.
ގެކޮޅުގައި ހުންނަވާ ނެގި ވީޑިއޯއެއްގައި ބޮންގޯ ސަޕޯޓަރުންނަށް ގޮވާލެއްވީ ބަގާވާތާ ދެކޮޅަށް އަޑު އުފުލުމަށެވެ. އޭގެ ކުރިން ސިފައިން ވަނީ ބާރުތައް ހޯދާފައިވާކަން ޓީވީ މެދުވެރިކޮށް އިއުލާންކޮށްފަ އެވެ.
މިދިޔަ ހޮނިހިރު ދުވަހު ބޭއްވި އިންތިހާބުގައި ބޮންގޯއަށް ކުރި ލިބުނު ނަމަވެސް، އިދިކޮޅުން ބުނީ ވޯޓުގަައި މަކަރު ހެދި ކަމަށެވެ. ބަގާވާތަށް ފަހު ސިފައިން ބުނީ އިންތިހާބުގެ ނަތީޖާ ބާތިލް ކަމަށެވެ.
ބޮންގޯ ގޭ ބަންދުކުރުމުގެ އިތުރުން ހިޔާނާތުގެ ތުހުމަތުގައި އެމަނިކުފާނުގެ ދަރިކަލަކު ހައްޔަރުކޮށްފައިވާ ކަމަށް ވެސް ސިފައިން ބުންޏެވެ.
ބޮންގޯގެ އާއިލާއިން ގެބޯންގައި ވެރިކަން ކުރާތާ 55 އަހަރުވެއްޖެ އެވެ. ގެބޯންއަކީ އެފްރިކާގައި އެންމެ ގިނައިން ތެޔޮ އުފައްދާ އެއް ގައުމެވެ.
ސިފައިންގެ ބަގާވާތް ކާމިޔާބުވުމާއެކު ގިނަ ބަޔަކު ވަނީ މަގުތަކަށް ނިކުމެ އުފާ ފާޅުކޮށްފަ އެވެ. ރިޕޯޓުތައް ބުނާ ގޮތުން ރައްޔިތުންގެ މެޖޯރިޓީން ބޮންގޯގެ އާއިލީ ވެރިކަމާ ދެކޮޅެވެ.
އެހެން ނަމަވެސް ގިނަ ގައުމުތަކުން ވަނީ ބަގާވާތެއް ކުރުމުން ކަންބޮޑުވުން ފާޅުކޮށް، އެފްރިކާގައި އިތުރު ހަމަނުޖެހުން އުފެދުމުގެ ފުރުސަތު އޮތް ކަމަށް ބުނެފަ އެވެ.
