ބިންވެރިޔާ ސްކީމްގެ ދަށުން މާލޭ ސަރަހައްދުން ގޯތި ލިބުނު މީހުންނަށް ކުރިން ލިބިފައި އޮތް ބިން ދޫކޮށްލަން ލިބޭ މުއްދަތު ފަސް އަހަރަށް އިތުރުކޮށްފި އެވެ.
ބިންވެރިޔާ ސްކީމްގެ ދަށުން މާލެއިން ގޯތި ލިބޭ މީހުންގެ ތެރެއިން ބަންޑާރަ ގޯއްޗެއް ކުރިން ލިބިފައި އޮތް ފަރާތެއް ނަމަ އެ ގޯތި ދޫކޮށްލަން ލިބެނީ ދެ އަހަރެވެ.
އެެހެންނަމަވެސް، ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން މިއަދު ކުރެއްވި ޓްވީޓެއްގައި ވިދާޅުވެފައި ވަނީ އެ މުއްދަތު އިތުރުކުރަން ސަރުކާރުން ނިންމާފައިވާ ކަމަށެވެ. އޭނާ ވިދާޅުވި ގޮތުގައި، ގޯތި ދޫކުރުމުގެ އެއްބަސްވުމުގައި ސޮއި ކުރާ ތާރީހުން ފެށިގެން ކުރީގެ ގޯތި ދޫކޮށްލަން ފަސް އަހަރު ލިބޭނެ ކަމަށެވެ.
މިގޮތަށް ޝަރުތުކޮށް ގޯތި ދޫކުރުމުގެ އެއްބަސްވުމަށް ބަދަލުގެނެސްފައިވާއިރު، އާ އެއްބަސްވުން ޕޯޓަލް މެދުވެރިކޮށް ފެންނާނެ ކަމަށް ވެސް އަކްރަމް ވިދާޅުވި އެވެ.
ބިންވެރިޔާ ސްކީމްގެ ދަށުން ފުރަތަމަ ބުރުގައި ދޫކުރާ 9001 ގޯތީގެ ތެރޭގައި ހިމެނެނީ, ހުޅުމާލެއިން ދޫކުރާ 1351 ގޯއްޗާއި, ގުޅީފަޅުން ދޫކުރާ 5432 ގޯތީގެ އިތުރުން ގިރާވަރު ފަޅުން ދޫކުރާ 2218 ގޯއްޗެވެ. ގޯއްޗަށް ޝަރުތު ހަމަވާ މީހުންނަށް ގޯތި ލިބޭ ތަނެއް ކަނޑައެޅީ ގުރުއަތު ނަގައިގެންނެވެ.
