ދަ ޑިމޮކްރެޓްސް ދޫކޮށް ދިޔަ މެމްބަރުންނަށް އެ ޕާޓީގެ ބާނީ މުހައްމަދު ނަޝީދު ރިޝްވަތުގެ ތުހުމަތުކުރައްވައި، އެ މައްސަލަ ބަލައި ދިނުމަށް އެދިވަޑައިގެން މަޖިލީހުގެ ރައީސްގެ ހައިސިއްޔަތުން ހުށަހެޅުއްވި މައްސަލަ "ރަޖިސްޓްރީ ކުރެވެން ނެތް" ކަމަށް ފުލުހުން އިއްޔެ އެންގި އެވެ.
ފުލުހުންގެ މީޑިއާ އޮފިޝަލަކު ވިދާޅުވީ މަޖިލިސް މެމްބަރުންނަށް ރިޝްވަތު ދޭކަމަށް ތުހުމަތުކޮށް، މަޖިލީހުގެ އިދާރާއިން ފޮނުވި ސިޓީގައި، ޖިނާއީ ތަހުގީގެއް ފަށަން ބޭނުންވާ އަސާސީ މައުލޫމާތު ފޯރުކޮށްދީފައި ނުވާ ކަމަށެވެ. އެހެންވެ، ޖިނާއީ މައްސަލައެއްގެ ގޮތުގައި ރަޖިސްޓްރީކުރެވިދާނެކަމަށް ނުފެންނަ ކަމަށް ސިޓީއަކުން މަޖިލީހަށް އަންގާފައިވާ ކަމަށް ވެސް އޭނާ ވިދާޅުވި އެވެ.
"އަދި އެފަދަ މައުލޫމާތު ހުރިނަމަ، ރިޝްވަތުގެ މައްސަލަ ތަހުގީގުކުރުމުގެ މައި އިހްތިސާސް އޮންނަ ފަރާތަކީ އެންޓިކޮރަޕްޝަން ކޮމިޝަން ކަަމަށްވާތީ ރައްޔިތުންގެ މަޖިލީހުން ހުށަހަޅާ އެފަދަ މައްސަލަ ހުށަހަޅަންވާނީ އޭސީސީއަށް ކަމަށް، ދިވެހި ފުލުހުންގެ ޚިދުަމަތުން ދެކޭ ވާހަކަ ދަންނަވާފައިވާނެ. އޭސީސީއިން އެފަދަ ތަހުގީގަކަށް އެހީތެރިކަމަށް އެދެފިނަމަ ފުލުހުން އެހީތެރިކަން ފޯރުކޮށްދެމުން ގެންދާނެ،" ފުލުުހުންގެ އޮފިޝަލް ވިދާޅުވި އެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް މަދު ދުވަސްކޮޅަކަށް ވެފައި ވަނިކޮށް، ދަ ޑިމޮކްރެޓްސްގެ ކެންޑިޑޭޓަކު ވާދަ ކުރައްވަނިކޮށް އެ ޕާޓީ ދޫކޮށް، ރައީސް އިބްރާހިމް މުހައްމަދު ސޯލިހަށް ތާއިދު ކުރައްވައި އެމްޑީޕީއާ އަލުން ގުޅިވަޑައިގެންފައި ވަނީ ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފު އަދި ތޮއްޑޫ ދާއިރާގެ މެމްބަރު ހަސަން ޝިޔާން އެވެ. އަދި ފޮނަދޫ ދާއިރާގެ މެމްބަރު މޫސާ ސިރާޖު ވަނީ އެމްޑީޕީ ދޫކޮށް، ޕީއެންސީގެ ރިޔާސީ ކެންޑިޑޭޓު މުހައްމަދު މުއިއްޒަށް ތާއިދު ކުރައްވައިފަ އެވެ.
މުހިއްމު ބައެއް ހަބަރު
ދުވަހުގެ ކޯޓޭޝަން
ރިޔާސީ ކެމްޕޭނުގައި މިއަދު ތ. ގާދިއްފުށްޓަށް ވަޑައިގެން ބޭއްވި ބައްދަލުވުމަގައި ރައީސް އިބްރާހިމް މުހައްމަދު ސޯލިހު ވިދާޅުވީ،
2018 އިން ފެށިގެން 2028 އާ ހިސާބަށް އިގުތިސާދު ދެގުނަ ކުރެވި އިގުތިސޯދުގެ ސައިޒަކީ 170 ބިލިއަނަށް ވުރެ މައްޗަށް އިރާދަކުރެއްވިއްޔާ އަޅުގަނޑުމެންނަށް ގެންދެވޭނެ,"
ދުވަހުގެ ފޮޓޯ
ރިޔާސީ އިންތިހާބުގައި ތާއިދު ހޯދަން ރައީސް ސޯލިހު ލ. ގަމުގައި މިރޭ ބޭއްވި ޖަލްސާގެ ބައިވެރިން. -- ފޮޓޯ: މިރާން ނާޝިމް/ އަދަދު
