މެންޗެސްޓާ (އޮގަސްޓް 21) - ގެވެށި އަނިޔާގެ ތުހުމަތުތައް އަމާޒުވެފައިވާ މެންޗެސްޓާ ޔުނައިޓެޑްގެ ޒުވާން ފޯވަޑް މޭސަން ގްރީންވުޑް ދޫކޮށްލަން ޔުނައިޓެޑުން ނިންމައިފި އެވެ.
މިދިޔަ އަހަރުގެ ޖެނުއަރީ މަހުގެ ގެވެށި އަނިޔާއެއްގެ މައްސަލައެއްގައި ގްރީންވުޑް ،21، ހައްޔަރުކުރުމާ އެކު، ޔުނައިޓެޑުން ވަނީ އޭނާ ސަސްޕެންޑްކޮށްފަ އެވެ. ގްރީންވުޑްގެ މައްސަލަ ކޯޓުގައި ކުރިއަށް ގެންދިޔަ ނަމަވެސް، މި އަހަރުގެ ފެބްރުއަރީ މަހު ޕްރޮސެކިއުޓަރުން ވަނީ ދައުވާތައް އަނބުރާ ގެނެސްފަ އެވެ. ދައުވާ އަނބުރާ ގެނައީ މުހިންމު ބައެއް ހެކިވެރިން ހެކި ބަސް ދޭން ބޭނުންނުވުމާއި އިތުރު ހެކިތަކެއް ފެނިފައިވާތީ އެވެ.
ޔުނައިޓެޑުން ރޭ ނެރުނު ދިގު ބަޔާނެއްގައި ބުނީ ގްރީންވުޑްއާ ދެކޮޅަށް ކުރި ދައުވާ ކުރިއަށް ނުގެންދިޔަ ނަމަވެސް، ޔުނައިޓެޑްގައި ކެރިއަރު ކުރިއަށް ގެންދިއުމަށް ހުރި އުނދަގޫތައް ދެ ފަރާތަށް ވެސް އެނގޭ ކަމަށެވެ. އަދި މި ނިންމުމަކީ "ދެ ފަރާތުންވެސް އެއްބަސްވެެގެން،" ކަނޑައެޅި ނިންމުމެއް ކަމަށެވެ.
ޔުނައިޓެޑާ އެކު ގްރީންވުޑް ހަދާފައިވާ ކޮންޓުރެކްޓް ހަމަވާނީ 2025 ވަނަ އަހަރުގަ އެވެ.
ގްރީންވުޑް ބުނީ އޭނާ އަށް ތުހުމަތުކުރެވިފައިވަނީ އޭނާ ނުކުރާ ކަންތައްތަކެއް ކަމަށެވެ. އެކަމަކު، ހެދުނު ގޯސްތައް ގަބޫލްކުރާ ކަމަށާއި މިހާރު ދިމާވެފައިވާ ހާލަތު މެދުވެރިވުމަށް އޭނާގެ ފަރާތުން ހެދުނު ގޯސްތަކުގެ ޒިންމާ ނަގާ ކަމަށެވެ.
"މި ނިންމުމަކީ މެންޗެސްޓާ ޔުނައިޓެޑާއި އަހަންނާއި އަހަރެންގެ އާއިލާ އިން މަޝްވަރާކުރުމަށް ފަހު، އެންމެންވެސް އެއްބަސްވެގެން ނިންމި ނިންމުމެއް،" ގްރީންވުޑް ބުންޏެވެ.
"އުމުރުން ހަތް އަހަރު ފެށިގެން މި ކްލަބުގައި ހޭދަކުރި އަހަރުތަކުގައި ކްލަބުގެ ފަރާތުން ލިބުނު އެއްބާރުލުމަށް ޝުކުރުވެރިވަން."
ކޯޓުން ސަލާމަތްވި ނަމަވެސް، ގްރީންވުޑް އަލުން ޔުނައިޓެޑް ޓީމަށް ނެގުމާ ދެކޮޅަށް ގިނަ ބަޔަކު ވަނީ އާންމުކޮށް އަޑު އުފުލާލައިފަ އެވެ.
