މަލްޓިމީޑިއާއަށް ހާއްސަ އެތައް ސޮފްޓްވެއާތަކެއް ނެރެފައިވާ އެޑޯބީ ކުންފުނީގެ ކޯފައުންޑާ ޖޯން ވާނޮކް 82 އަހަރުގައި މަރުވެއްޖެ އެވެ.
އެޑޯބީ ކުންފުނިން ނެރުނު ބަޔާނެއްގައި ބުނެފައިވަނީ ވާނޮކް މަރުވެފައިވަނީ މިދިޔަ ހޮނިހިރުގައި ކަމަށެވެ. އަދި މިއީ އެޑޯބީ ކުންފުނީގެ އެންމެންނަށް ވެސް ވަރަށް ހިތާމަވެރި ދުވަހެއް ކަމަށާއި ވާނޮކްއަކީ އެތައް ދަހަރުތަކަކަށް އިންޑަސްޓްރީއަށް އިންސްޕިރޭޝަނެއް ކަމަށް ވެސް ބުނެފައިވެ އެވެ.
ވާނޮކް މަރުވި އިރު އޭނާގެ އަންހެނުން މާވާ ވާނޮކް އަދި ތިން ދަރިން އެބަހުއްޓެވެ. ވާނޮކްގެ މަރުގެ ސަބަބުން މިހާތަނަށް ހާމަކޮށްފައެއް ނުވެ އެވެ.
ވާނޮކް އަދި ޗާލްސް ޖެޝްކީ ގުޅިގެން އެޑޯބީ އުފައްދާފައިވަނީ 1982 ގަ އެވެ. އެޑޯބީގެ އޮރިޖިނަލް ލޯގޯ ޑިޒައިންކޮށްފައިވަނީ ވާނޮކް އެވެ. އަދި މިހާރު ވެސް އެޑޯބީ އިން ބޭނުންކުރާ ލޯގޯއަކީ ފުރަތަމަ ލޯގޯގެ ބައެކެވެ.
އެޑޯބީގެ ސީއީއޯ މަގާމު އެތައް އަހަރެއް ވަންދެއް އަދާކުރުމަށް ފަހު 2000 ގައި ވަނީ ރިޓަޔާކޮށް ބޯޑް ގެ ޗެއާމަނެއް ގޮތުގައި 2017 ހަމައަށް ހުރެފަ އެވެ.
އެންމެ ފުރަތަމަ އެޑޯބީ އިން ނެރެފައިވަނީ ޑެސްޓޮޕް ޕަބްލިޝިން ސޮފްޓްވެއާއެއްކަމަށްވާ އެޑޯބީ ޕޯސްޓް ސްކްރިޕްޓެވެ. އެއަށް ފަހު އެތައް ސޮފްޓްވެއާއެއް މިއަދާ ހަމައަށް އެކުންފުނިން ނެރެފައިވެ އެވެ.
މީގެ ތެރޭގައި މަލްޓިމީޑިއާ ދާއިރާއަށް ހާއްސަ އެތައް ސޮފްޓްވެއާ އެއް ހިމެނެ އެވެ. އޭގެތެރެއިން ފޮޓޯޝޮޕް، އެކްރޮބެޓް، އިލަސްޓްރޭޓާ، ޕްރިމިއާ ޕްރޯ އަދި އާފްޓަ އިފެކްޓްސް އަކީ މަގުބުލޫ ބައެއް ސޮފްޓްވެއާތަކެވެ.
