ރައީސް އިބްރާހިމް މުހައްމަދު ސޯލިހާ ގުޅޭ އެންމެ ހިތާމަވެރި ކަމަކީ ދައުރުގެ މެދުން އިންތިހާބެއް ބާއްވާނެ ކަމަށް ވައުދުވެ މެނިފެސްޓޯގައި ލިޔެފައި އެކަން ނުކުރެއްވުން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގެ ކެމްޕެއިނަށް ދަ ޑިމޮކްރެޓްސްއިން އިއްޔެ ނ. ވެލިދުއަށް ކުރި ދަތުރުގައި އެ ރަށުގައި ބޭއްވި ބައްދަލުވުމެއްގައި ވާހަކަ ދައްކަވަމުން ނަޝީދު ވިދާޅުވީ، 18 މަސް ދުވަހުގެ ތެރޭގައި އިންތިހާބެއް ބޭއްވުމަކީ އެމްޑީޕީން މިދިޔަ ރިޔާސީ އިންތިހާބުގެ މެނިފެސްޓޯގައި ލިޔެ ޗާޕު ކުރި ކަމެއް ކަމަށެވެ.
އެކަމަކު، އެގޮތަށް ރައީސް ސޯލިހު އެއްބަސްވެވަޑައިގަތުމަށްފަހު އެކަން ނުކުރެއްވުމަކީ އެމަނިިކުފާނާ ގުޅޭ "އެންމެ ހިތާމަވެރި" ކަންތައް ކަމަށް އެމަނިކުފާނުގެ ޒަމާންވީ ގާތް އެކުވެރިޔާ ނަޝީދު ސިފަ ކުރެއްވި އެވެ.
"ރަައީސް އިބްރާހިމް މުހައްމަދު ސޯލިހާ ގުޅޭގޮތުން އަދި އެންމެ ހިތާމަވެރި ކަމަކީ ފުރަތަމަ އެމްޑީޕީގެ މެނިފެސްޓޯގައި ލިޔެފައި ޗާޕުކޮށްފައި ފާސްކޮށްފައި ބެހީ 18 މަސް ދުވަހުގެ ތެރޭގައި އިންތިހާބެއް ބާއްވައި އަލުން އަނބުރައި ވެރިކަމުގެ ކަންތައް ހަމަޖެއްސުމަށް،" އެމަނިކުފާނު ވިދާޅުވި އެވެ.
އެގޮތަށް އޭރު ވައުދުވީ، 2018 ވަނަ އަހަރުގެ ރިޔާސީ އިންތިހާބު އައި އިރު ހުރިހާ ސިޔާސީ ލީޑަރުން ޖަލުގައި ތިއްބެވުމުން ހުރިހާ ލީޑަރުންނަށް ފުރުސަތު ދިނުމަށް ކަމަށް ވެސް ނަޝީދު ވިދާޅުވި އެވެ.
އެގޮތަށް އެއްބަސްވި ނަމަވެސް، ވެރިކަމަށް އައުމުން، ހަތަރު އަހަރު ތިމަންނާއަށް މާ ގިނަ ކަމަށާއި އެ މުއްދަތުގެ ތެރޭގައި ފުދޭ ވަރެއް ކުރެއްވޭނެ ކަމަށް ރައީސް ވިދާޅުވި ކަމަށް ނަޝީދު ވިދާޅުވި އެވެ. އެކަމަކު، ނަޝީދު ވިދާޅުވީ، ދުވަސްކޮޅެއް ފަހުން ދެވަނަ ދައުރެއް ވެސް ބޭނުންވާ ކަމަށް ރައީސް ވިދާާޅުވާން ފެއްޓެވީ ކަމަށެވެ.
"ދެ ވަނަ ދައުރެއް މީހަކަށް ލިބުނީމާ މޫ ލާ ގޮތް ވަނީ، މާ ގިނަ ދުވަހު ހުންނަ ހިތް ވަނީ،" ނަޝީދު ވިދާޅުވި އެވެ.
ނަޝީދު އިއްޔެ އިތުރަށް ވިދާޅުވީ، ރައީސް ސޯލިހު އެކިއެކި ބޭފުޅުން ލައްވައި "އަޅުގަނޑުމެންނަށް ގުޅުއްވާ" ކަމަށާއި އެކަމަކު ރިޔާސީ އިންތިހާބުގެ ދެ ވަނަ ބުރެއްގައި ވެސް ރައީސް ސޯލިހާއެކު ނުހުންނަވާނެ ކަމަށެވެ.
ކޮންމެ މީހަކު ވެރިކަމުގައި ހުއްޓަސް، މި ސަރުކާރުން ހިންގަމުންދާ ބަނދަރު ހެދުމާއި މަލްޓިޕާޕަސް ހޯލް އެޅުމާއި އިންޖީނުގެ އެޅުމާއި ތަންތަނުގެ ވަށާފާރު ރޭނުން ފަދަ މަޝްރޫއުތައް ހިންގަމުންދާނެ ކަމަށް ވިދާޅުވެ، މި ސަރުކާރަށް ނަޝީދު ފާޑުވިދާޅުވި އެވެ.
މިދިޔަ ރިޔާސީ އިންތިހާބަށް އެމްޑީޕީން ބޭއްވި ޕްރައިމަރީ ނަޝީދަށް ލިބިވަޑައިގަތަސް، އެމަނިކުފާނަށް އިންތިހާބުގައި ވާދަނުކުރެއްވުނީ އޭރު އޮތް ޖަލު ހުކުމާ ހެދި އެވެ. އެހެންވެ، އެމްޑީޕީން އުކުޅަހުގައި ބޭއްވި ކޮންގްރެސްގައި ނިންމީ ރިޔާސީ ޓިކެޓު ރައީސް ސޯލިހަށް ދެއްވުމަށެވެ. އެއީ ނަޝީދަށް ތާއީދު ކުރާ ބައެއް މީހުން ސިފަ ކުރާ ގޮތުގައި "ބަޣާވާތެކެވެ."
