މެޑްރިޑް (އޮގަސްޓް 20) - އިނގިރޭސި މިޑްފީލްޑަރު، ޖޫޑް ބެލިންހަމްގެ ދެ ގޯލާ އެކު، ރެއާލް މެޑްރިޑުން 3-1 އިން އަލްމޭރިއާ ބަލިކޮށް ލީގުގައި ފެށުން ވަރުގަދަކޮށްފި އެވެ.
މިދިޔަ ހަފްތާގައި ލީގުގެ ފުރަތަމަ މެޗުގައި ރެއާލް އިން ބިލްބާއޯ އަތުން މޮޅުވި މެޗުގައި ވެސް ބެލިންހަމް ވަނީ ގޯލެއް ޖަހައިފަ އެވެ. ޑޯޓްމަންޑް ދޫކޮށް 130 މިލިއަން ޑޮލަރުގެ ފީއެއްގައި ރެއާލަށް ބަދަލުވި ބެލިންހަމް މި ވަނީ ރެއާލަށް ބަދަލުވި ފަހުން ކުޅުނު ރަސްމީ ދެ މެޗުގައި ތިން ގޯލު ޖަހައިފަ އެވެ. އެންމެ ފަހުން، ރެއާލަށް ބަދަލުވެ، ފުރަތަމަ ކުޅުނު ރަސްމީ ދެ މެޗުގައި ދެ ގޯލު ޖެހީ 2007 ވަަނަ އަހަރު ވެސްލީ ސްނައިޑާ އެވެ.
އަމިއްލަ ދަނޑުގައި ކުޅުނު އަލްމޭރިއާ އިން ވަނީ ރޭގެ މެޗުގެ ތިން ވަނަ މިނިޓްގައި ލީޑުނަަގައިފަ އެވެ. އެ ޓީމުގެ ލަނޑު ޖެހީ ރޮބާޓޯން ނެގި ހުރަހަކުން ސާޖިއޯ އަރީބާސް ބޮލުންނެވެ.
ރެއާލުން އެއްވަރުކުރީ 19 ވަނަ މިނިޓްގައި ބެލިންހަމް ޖެހި ގޯލުންނެވެ. އަދި މެޗުގެ 60 ވަަނަ މިނިޓްގައި ޓޯނީ ކްރޫސް ނެގި ހުރަހަކަށް އަރައި، ބެލިންހަމް ވަނީ ބޮލުން ގޯލެއް ޖަހައި، ރެއާލަށް ލީޑުނަގައިދީފަ އެެވެ. ބެލިންހަމް ދިން ބޯޅައަކަށް އަރައި، މެޗުގެ 73 ވަނަ މިނިޓްގައި ވިނީޝިއުސް ޖޫނިއާ ވަނީ ރެއާލަށް ތިން ވަަނަ ލަނޑެއް ޖަހައިދީފަ އެވެ.
ރެއާލްގެ ކޯޗު ކާލޯ އަންޗެލޮޓީ ވަނީ ރޭގެ މެޗަށް ފަހު ބެލިންހަމް އަށް ތައުރީފުކޮށް ވާހަކަ ދައްކައިފަ އެވެ. އަދި ރެއާލްގެ ސިސްޓަމަށް ބެލިންހަމް ހޭނެމުން އަންނަނީ ހީކުރި ވަރަށް ވުރެ އަވަހަށް ކަމަށް އަންޗެލޮޓީ ވަނީ ބުނެފަ އެެވެ.
