ކެމްޕޭނަށް ހުރަސް އަޅައި, އަނިޔާވެރިކަން އިސްކުރުމަކީ ބަލައި ގަނެވޭނެ ކަމެއް ނޫން ކަމަށް ހޯމް މިނިސްޓަރު އިމްރާން އަބްދުالله ވިދާޅުވެއްޖެ އެވެ.
އިމްރާން މިއަދު ވިދާޅުވީ, ކެމްޕޭނު ކުރުމުގައި ވެސް އަދި ކެންޑިޑޭޓަކަށް ތާއީދުކުރާކަން ހާމަކުރުމުގައި ވެސް އެއްވެސް ފަރާތަކުން ތަހުޒީބު މުޖުތަމައުތަކުގައި ގެންގުޅޭ ހަމަތަކުން އެއްކިބާވުން ބަލައި ނުގަންނާނެ ކަމަށެވެ. އަދި ކެމްޕޭނަކަށް ހުރަސްއަޅައި އަނިޔާވެރިކަން އިސްކުރުން ވެސް ބަލައި ނުގަނެވޭނެ ކަމަށް ވިދާޅުވި އެވެ.
އޭނާ ވަނީ އެފަދަ އަމަލުތަކުން އެއްކިބާވެ ތިބުމަށް އިލްތިމާސްކޮށްފަ އެވެ.
އިމްރާން މިހެން ވިދާޅުވިއިރު, މިއަދު ހަވީރު ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ކ. ގުރައިދޫއަށް ވަޑައިގަންނަވާތީ ބަނދަރު ސަރަހައްދަށް އެއްވެ ތިބި ޕީޕީއެމްގެ ސަޕޯޓަރުންނާއި އެމްޑިީޕީ ސަޕޯޓަރުންނާ މެދު ވެސް ވަނީ ހަމަނުޖެހުމެއް ހިނގާފަ އެވެ.
އެ ހަމަނުޖެހުން ހުއްޓުވުމަށް ފުލުހުން މަސައްކަތް ކުރި ނަމަވެސް ބައެއް މީހުންނާ ފުލުހުންނާ ދެމެދު ވެސް ހަމަނުޖެހުން ހިނގި މަންޒަރު، ސޯޝަލް މީޑިއާގައި އާއްމުކޮށްފައިވާ ބައެއް ވީޑިއޯތަކުން ފެނުނެވެ.
ގުރައިދޫގައި ހިނގި ހަމަނުޖެހުމާ ގުޅިގެން މިހާތަނަށް ފުލުހުންގެ ބަހެއް ލިބިފައި ނުވާއިރު, ހަމަނުޖެހުމުގައި އެއްްވެސް މީހަކަށް އަނިޔާއެއް ލިބުނު ކަމެއް ނުވަތަ ނޫން ކަމެއް ސާފެއް ނުވެ އެވެ.
އަމިއްލަ ގޮތުން ރިޔާސީ އިންތިހާބަށް ކުރިމަތިލައްވާ ކުރީގެ ހޯމް މިނިސްޓަރު އުމަރު ނަސީރުގެ ކެމްޕޭނު ހަރަކާތެއްގެ ތެރެއިން އޭނާއަށް ދަގަނޑު އެއްޗަކުން ހަމަލާ ދިން ކަމަށް ބުނެ އުމަރުގެ ފަރާތުން ފުލުހަށް ހުށަހަޅާފައި ވެއެވެ.
ކެމްޕޭނަށް ހުރަސް އަޅައި, އަނިޔާވެރިކަން އިސްކުރުން ބަލައި ނުގަންނާނެ ކަމަށް އިމްރާން ވިދާޅުވިއިރު, މީގެ ކުރިން ވެސް އިމްރާން ވަނީ, ރައީސް އިބްރާހިމް މުހައްމަދު ސޯލިހު ރަށްރަށަށް ވަޑައިގެންނެވުމުން މުޒާހަރާ ކުރުމާ ދެކޮޅަށް ވާހަކަ ދައްކަވާފަ އެވެ. އިމްރާން ވަނީ އިދިކޮޅުން މުޒާހަރާކޮށް ޖަހާ 'ސަކަރާތް' ހުއްޓާލުމަށް އިންޒާރު ދެއްވާފަ އެވެ.
"މިއަދު އެކަން ނިންމާލައްވާ. ހުރިހާ ބޭފުޅުން ނިންމާލައްވާ. ހުރިހާ ޕާޓީތަކުން ނިންމާލައްވާ. އެކަން އެގޮތަށް ކުރަން ބޭނުން ނަމަ ދެން ވެސް އެކަން ކުރަން މާ މޮޅު ޓީމެއް ރައީސާއެކު އެބަ އޮތް. އަޅުގަނޑުމެން މާ ބާރަށް މުޒާހަރާ ކުރާނަން އިނގޭތޯ. މާއަޑުގަދަ ވާނެ، މުޒާހަރާ ކުރާނެ،" އޭނާ އޭރު ވިދާޅުވި އެވެ.
