މާލޭ ސަރަހައްދުން މާލޭގެ ބިން ދިނުމަށްފަހު، ގޯތި ލިބޭ ސަރަހައްދު ކަނޑައެޅުމަށް މިހާރު ނަގަމުންދާ ގުރުގައި މަކަރު ހެދުމުގެ އެއްވެސް ފުރުސަތެއް ނޯންނާނެކަމުގެ ޔަގީންކަން ސަރުކާރުން މިރޭ ދީފި އެވެ.
ގޯތި ގުރުގައި މަކަރު ހަދަމުންދާ ކަމަށް ބުނެ ނޫހަކުން ޖެހި ހަބަރަކާ ގުޅިގެން، ގުރުގެ އިންތިޒާމް ނޫސްވެރިންނަށް ދައްކާލުމަށް ބޭއްވި ބައްދަލުވުމަށްފަހު ޕްލޭނިން މިނިސްޓްރީގެ އޮފިޝަލަކު ވިދާޅުވީ، ގުރުގައި ނަގާ ކަރުދާސްތައް 24 ގަޑިއިރު ބަލަމުންދާ ކަމަށާއި މަކަރު ހެދުމގެ ފުރުސަތެއް ނޯންނާނެ ކަމަށެވެ.
"ބަންދު ކުރަނީ އެވަގުތު ތިބި ބައެއްގެ ހާޒިރުގައި އަދި ސީލްވެސް ކުރާނެ. އަދި އަނެއް ދުވަހު ފޮށި ކެނޑުމާ ހަމައަށް ފުލުހުންނާއި މުވައްޒަފުން ފޮށި ބަލަހައްޓާނެ،" އޭނާ ވިދާޅުވި އެވެ.
ޕްލޭނިން މިނިސްޓްރީން ބުނީ ގުރުގެ އިންތިޒާމް ހަމަޖައްސާފައި ވަނީ އެންމެ ދެފުށް ފެންނަ ގޮތަށް ކުރިއަށް ގެންދެވޭނެ ގޮތަށް ކަމަށެވެ.
"ވަކި ތަނަކުން، ވަކި މީހަކަށް ނުދެވޭނެ. އެފަދަ އެއްވެސް ފުރުސަތެއް ނޯންނާނެ،" ސަރުކާރުން ބުންޏެވެ.
ސަރުކާރުން ނިންމީ ގޯއްޗަށް އެދި ހުށަހެޅި 97 ޕަސެންޓު މީހުންނަށް ގޯތު ދިނުމަށެވެ. އެއީ 18،955 މީހުންނަށް 9001 ގޯއްޗެވެ. ގޯތި ދެނީ ހުޅުމާލެ ދެ ވަނަ ފިޔަވައްސާއި ތިން ވަނަ ފިޔަވައްސާއި ގުޅީފަޅާއި ގިރާވަރުފަޅުންނެވެ.
