ލަންޑަން (އޮގަސްޓް 15) - ބްރެންޓްފޯޑްގެ ގޯލު ބަލަހައްޓަމުން އަންނަ ސްޕެއިން ގައުމީ ޓީމުގެ ވެސް ކީޕަރު ޑޭވިޑް ރާޔާ، ލޯން އެއްބަސްވުމެއްގެ ދަށުން އާސެނަލަށް ބަދަލުވެއްޖެ އެވެ.
ރާޔާ، 27، ސޮއިކުރި ނަމަވެސް އާސެނަލުން އެއް ވަނަ ކީޕަރެއްގެ ގޮތުގައި ހުންނާނީ އާރޮން ރަމްސްޑޭލް އެވެ. އެކަމަކު، ރާޔާ އަށް އެއް ވަނަ މަގާމަށް ވާދަކުރެވޭނެ ކަމަށް އާސެނަލުން ގަބޫލުކުރެ އެވެ. ލޯންގެ އެއްބަސްވުން ހަމަވުމުން އާސެނަލުން ބޭނުންނަމަ 27 މިލިއަން ޑޮލަރަށް ރާޔާގެ ކޮންޓްރެކްޓް ދާއިމީ ކުރެވޭނެ އެވެ. ލޯން ފީގެ ގޮތުގައި މި ސީޒަނުގައި އާސެނަލުން ހަތަރު މިލިއަން ޑޮލަރު ދައްކާނެ އެވެ.
އާސެނަލްގެ ސްޕޯޓިން ޑިރެކްޓަރު އެޑޫ ބުނީ ރާޔާގެ ލެވަލް ބްރެންޓްފޯޑްގައި ސާބިތުކޮށްދީފައިވާ ކަމަށެވެ. އެހެންކަމުން، އާސެނަލްގައި ވެސް ރަނގަޅަށް ކުޅެ، ކްލަބްގެ އަމާޒަަށް ވާސިލްވާން އެހީތެރިވެދެވޭނެ ކަމަށް ދެކޭ ކަމަށް އެޑޫ ބުނެފައިވެ އެވެ.
މި ސީޒަނުގެ ޗެރިޓީ ޝީލްޑް ކާމިޔާބުކޮށް، ލީގުގެ ފުރަތަމަ މެޗު ކާމިޔާބުކުރި އާސެނަލުން ރާޔާގެ ސޮއި ހޯދީ އެ ޓީމުގެ ސްޓައިލާ ވަރަށް ގުޅޭ ގޮތަށް ކުޅޭ ކުޅުންތެރިއެއް ކަމަށްވާތީ އެވެ. އާސެނަލްގެ ކޯޗު މިކޭލް އާޓެޓާ، ވަނީ މީގެ ކުރިން އާސެނަލާ ދެކޮޅަށް ބްރެންޓްފޯޑް ކުޅުނު މެޗުތަކުގައި ރާޔާއާ ގުޅޭ ސުވާލުތަކަށް ޖަވާބުދީފަ އެވެ.
ކުރިން ބްލެކްބާން ރޯވާސް އަށް ކުޅުނު ކީޕަރު ރާޔާ އަކީ މި ފަހަރުގެ ޓްރާންސްފާގައި އާސެނަލުން ސޮއިކުރި ހަތަރު ވަނަ ކުޅުންތެރިޔާ އެވެ. އެ ގޮތުން، އާސެނަލުން ވަނީ 140 މިލިއަން ޑޮލަރަށް ވެސްޓް ހޭމްގެ ޑެކްލަން ރައިސް އާއި 70 މިލިއަން ޑޮލަރަށް ޗެލްސީގެ ކައި ހަވާޓްޒްގެ އިތުރުން 40 މިލިއަން ޑޮލަރަށް އަޔަކްސްގެ ޔޫރިއަން ޓިމްބާ ގެނެސްފަ އެވެ.
