ސަރުކާރުގެ ބޯހިޔާވަހިކަމުގެ ޕްރޮގްރާމުގެ ދަށުން ވެރި ރަށް މާލެ ސަރަހައްދުން ގޯތި ލިބުނު މީހުންނަށް އެ ގޯތި ލިބޭ ސަރަހައްދު ކަނޑައެޅުމަށް މާދަމާ ހެނދުނު 11:00 އިން ފެށިގެން ގުރު ނަގާނެ ކަމަށާއި ގުރުއަތުލުމަށް ހާޒިރު ނުވެވޭ މީހުންގެ ބަދަލުގައި ގުރު ނަގާނީ އެކަމަށް ކަނޑައަޅާފައިވާ ހާއްސަ އޮފިޝަލުން ކަމަށް ހައުސިން މިނިސްޓްރީން ހާމަކޮށްފި އެވެ.
ގޯތި ލިބުނު މީހުންގެ ދާއިމީ ލިސްޓު އިއުލާނުކުރީ އާދީއްތަ ދުވަހުގެ ރެ އެވެ. މުޅި ޖުމްލަ 9001 ގޯތި، ހުޅުމާލެ، ގުޅީފަޅު އަދި ގިރާވަރުފަޅުން ދިނުމަށް ގުރުއަތުލުން ބާއްވާނީ ގަލޮޅު ދަނޑުގަ އެވެ. އަދި, މި މަހު 17 އިން ފެށިގެން އެކަން ކުރިއަށްދާނީ ހެންވޭރު ދަނޑުގައި ކަމަށް ޕްލޭނިން މިނިސްޓްރީން ވަނީ ހާމަކޮށްފަ އެވެ.
ގުރުއަތު ނެގުމަށް ދާން ޖެހޭ ގަޑި އާއި ތަނާއި ދުވަސް މިރޭ "ގެދޮރުވެރިން ޕޯޓަލް" މެދުވެރިކޮށް ގޯތި ލިބޭ މީހުންނަށް އަންގާނެ ކަމަށް އެ މިނިސްޓްރީން ބުނެފައިވެ އެވެ. ކޮންމެ ބޭފުޅަކަށް ވެސް ލިބޭނީ އެއް ގަޑިއިރުގެ ވަގުތެވެ.
ގުރު ނަގާއިރު ކަރުދާސްކޮޅުގައި ލިބޭ ގޯތީގެ ލޯކޭޝަނާއި ލޮޓު ނަންބަރު އެނގިގެންދާނެ ކަމަށް ވެސް އާރިފް ވިދާޅުވި އެވެ. އަދި, ހާޒިރު ނުވެވޭ ހާލަތެއްގައި ވެސް ގުރު ނެގުން މެދުނުކެނޑި ކުރިއަށްގެންދިޔުމުގެ ގޮތުން އެ މީހެއްގެ ބަދަލުގައި ބައިވެރިވާނީ އޮފިޝަލެއް ކަމަށް ސަރުކާރުން ވަނީ މިރޭ ބުނެފަ އެވެ.
"ޓައިމް ޕީރިއަޑް ތެރޭގައި ވަޑައިނުގެންފިނަމަ ހަމަޖައްސާފައި މިއޮތީ އޮފިޝަލުން ތިބޭނެ އެކަމަށް ހާއްސަ ކުރެވިފަ ތިބި, ގުރުލާން. އޭގެ ތެރެއިން އޮފިޝަލަކު އެ ބޭފުޅެއްގެ ބަދަލުގައި ގުރުލާނީ. މިކަން ހިނގާނީ މީޑިއާ ކުރިމަތީގައި," ޕްލޭނިން މިނިސްޓްރީގެ ސީނިއާ އެގްޒެކެޓިވް ޑިރެކްޓަރު، މުހައްމަދު އާރިފް މިރޭ ބޭއްވި ނޫސްވެރިންގެ ބައްދަލުވުމުގައި ވިދާޅުވި އެވެ.
އަދި, ގުރުލަމުންދާ ވަރަކުން ގޯތި ކަނޑަމުންދާނެ ކަމަށާއި މިވަގުތު ހުޅުމާލޭގައި ހުރި ބިންތައް ގުރުއަތުން ލިބޭ މީހުންނަށް ވަކިން ގުޅައި ޕްލޮޓު ކަނޑަން ދާންވީ ވަގުތާއި ތަން އަންގާނެ ކަމަށް ވެސް ޕްލޭނިން މިނިސްޓްރީން ވަނީ ހާމަކޮށްފަ އެވެ. އެގޮތުން, މާދަމާ ހަވީރު ގޯތި ކަނޑަން ފަށާނެ ކަމަށް ވެސް ޕްލޭނިން މިނިސްޓްރީން ބުންޏެވެ.
ގުރުއަތުލުން ކުރިއަށްދާ ޓެންޓަށް ވަދެވޭނީ ހަމައެކަނި ގޯއްޗަށް އެދި ހުށަހެޅި މީހާ ނުވަތަ ބަދަލުގައި ޕޯޓަލް މެދުވެރިކޮށް އައްޔަނުކޮށްފައިވާ މީހަކަށެވެ. ޕްލޭނިން މިނިސްޓްރީން ވަނީ ހުރިހާ ބޭފުޅުން ވެސް ގަޑިއަށް ފަރުވާތެރިވާން އިލްތިމާސްކޮށްފަ އެވެ.
ގޯއްޗަށް އެދި ހުށަހެޅި މީހުންގެ ތެރެއިން މިބުރުގައި ގޯތި ނުލިބެނީ 684 މީހުންނަށެވެ. އެއީ އެކަނި ފޯމު ހުށަހަޅާފައިވާ ތިބި، ކައިވެންޏެއްކޮށްގެން ނުއުޅޭ އަދި ދަރިން ވެސް ނެތް މީހުންނެވެ. ގޯތި ނުލިބޭ އެންމެނަކީ ވެސް 25 އަހަރުން ދަށުގެ މީހުން ކަމަށް ސަރުކާރުން ބުނެ އެވެ.
ބިންވެރިޔާ ސްކީމުގެ ގޯތީގެ ބޮޑުމިނާއި ދޫކުރާ ތަންތަން:
- 1250 އަކަފޫޓު - 3551 ގޯތި (ހުޅުމާލެ 250, ގުޅީފަޅު 260, ގިރާވަރު 3041)
- 1650 އަކަފޫޓޫ - 2802 ގޯތި (ހުޅުމާލެ 340, ގުޅީފަޅު 558, ގިރާވަރުފަޅު 1904)
- 2050 އަކަފޫޓު - 1547 ގޯތި (ހުޅުމާލެ 370, ގުޅީފަޅު 690, ގިރާވަރުފަޅު 487)
- 2450 އަކަފޫޓު - 656 ގޯތި (ހުޅުމާލެ 180, ގުޅީފަޅު 476)
- 2850 އަކަފޫޓު - 254 ގޯތި (ހުޅުމާލެ 100, ގުޅީފަޅު 154)
- 3250 އަކަފޫޓު - 109 ގޯތި (ހުޅުމާލެ 60, ގުޅީފަޅު 49)
- 3650 އަކަފޫޓު - 53 ގޯތި (ހުޅުމާލެ 31, ގުޅީފަޅު 22)
- 4000 އަކަފޫޓު - 29 ގޯތި (ހުޅުމާލެ 20, ގުޅީފަޅު 9)
އޭގެ ތެރެއިން، 1250 އަކަފޫޓުގެ 3551 ގޯއްޗަކީ, ސިންގަލް އެޕްލިކަންޓުންގެ ގޮތުގައި ހުށަހަޅައިގެން ގޯތި ލިބުނު މީހުންނެވެ. އަދި 1650 އަކަފޫޓުގެ 2802 ގޯއްޗަކީ, ދެ މީހަކު އެކުވެގެން އެޕްލިކޭޝަން ހުށަހެޅި މީހުންނެވެ. ގޯތީގެ ބޮޑުމިން ބަލާފައި ވަނީ އެޕްލިކޭޝަނަށް ޖޮއިންޓުވާ ކޮންމެ މީހަކަށް 400 އަކަފޫޓު އިތުރުުވާ ގޮތަށެވެ. ހަތަރުހާސް އަކަފޫޓުގެ 29 ގޯތި ލިބެނީ މަދުވެގެން އަށް މީހުން އެކުވެގެން އެޕްލިކޭޝަން ހުށަހެޅުމުންނެވެ.
