ބޮޑެތި ރަށްރަށަށް އިސްކަން ދޭނެ ކަމަށް ބުންޏަސް، ޕީޕީއެމްގެ ވެރިކަމުގައި ކޮށްފައިވާ މަސައްކަތްތަކުން އެކަން ފެންނަން ނެތް ކަމަށް ވިދާޅުވެ، ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ރައީސް އިބްރާހީމް މުހައްމަދު ސޯލިހު މިއަދު ރައްދު ދެއްވައިފި އެވެ.
ސެޕްޓެމްބަރު ނުވައެއްގައި ބާއްވާ ރިޔާސީ އިންތިހާބަށް ކެމްޕޭން ކުރަން ޕީޕީއެމް/ޕީއެންސީން ހދ. ނޮޅިވަރަމްގައި އިއްޔެ ބޭއްވި ޖަލްސާގައި މުއިއްޒު ވިދާޅުވީ އަދުލުވެރިވުމަކީ ނިސްބަތުން ކުރެވޭ ކަމެއް ކަމަށެވެ. އަދި ޕީޕީއެމް/ޕީއެންސީ ކޯލިޝަނަށް ރައްޔިތުން އިތުބާރުކޮށް ވެރިކަން ހަވާލުކޮށްފި ނަމަ އެ އަދުލުވެރިކަން ގާއިމްކޮށްދެއްވާނެ ކަމަށް ވެސް އޭނާ ވިދާޅުވި އެވެ.
ރިޔާސީ އިންތިހާބަށް ކެމްޕެއިންކުރަން އެމްޑީޕީން މިއަދު ނ. މިލަދޫގައި ބޭއްވި ޖަލްސާގައި ރައީސް ސޯލިހު ވިދާޅުވީ ރާއްޖޭގެ ރަަށްރަށުގެ (އެވްރެޖް) އާބާދީއަށް ބަލާއިރު މިލަދޫގެ އާބާދިއަކީ ކުޑަ އާބާދީއެއް ނޫން ކަމަށެވެ. އެހެން ނަމަވެސް އެ ރަށަށް ބޭނުންވާ އަސާސީ ގިނަ މަސައްކަތްތަކެއް ޕީޕީއެމްގެ ކުރީގެ ސަރުކާރުން ނުކޮށް ދޫކޮށްލާފައި ހުރި ކަމަށް ވެސް އެމަނިކުފާނު ވިދާޅުވި އެވެ.
"އެހެންވީމާ ބޮޑެތި އާބާދީއޭ ކިޔައިގެން މިދައްކާ ވާހަކަ ވެސް ދިމަލެއްނުވޭ. ހަމަ އެެކަނި އެންމެ ދެތިން ރަށަކަށް އަމާޒުކޮށްގެން ކުރި ކަމެއް ނޫނިއްޔާ 2013 އާއި 2018 ގެ ތެރޭގައި ކޮށްފައެއް ނެތް އެ ސަރުކާރަކުން،" ރައީސް ވިދާޅުވި އެވެ.
ރިޔާސީ އިންތިހާބަށް ކުރާ ކެމްޕޭނުގައި ރައީސް ސޯލިހާއި އެމްޑީޕީން އެންމެ ބޮޑަށް ފާހަގަކުރަމުން އަންނަ އެ އެއް ސިޔާސަތަކީ ތަރައްގީގެ މަަޝްރޫއުތައް ހިންގުމުގައި ކުދި އާބާދީތަކާއި ބޮޑެތި އާބާދީތައް ތަފާތު ނުކުރުމެވެ. ރައީސްގެ ވާދަވެރިންގެ ފާޑުކިއުން އެންމެ ބޮޑަށް އަމާޒުކުރާ އެއް ސިޔާސަތަކީ ވެސް އެޔެވެ.
ރިޔާސީ އިންތިހާބަށް ކުރައްވާ ކެމްޕެއިނުގެ ފުރަތަމަ ދަތުރުގައި މުއިއްޒު އިއްޔެ ނޮޅިވަރަމްގައި ފާޑުވިދާޅުވީ ވެސް އެ ސިޔާސަތަށެވެ. އޭނާ ވިދާޅުވީ ވިދާޅުވީ އަދުލުވެރިވުމަކީ ނިސްބަތުން ކުރެވޭ ކަމެއް ކަމަށެވެ. އަދި ޕީޕީއެމް/ޕީއެންސީ ކޯލިޝަނަށް ރައްޔިތުން އިތުބާރުކޮށް ވެރިކަން ހަވާލުކޮށްފި ނަމަ އެ އަދުލުވެރިކަން ގާއިމްކޮށްދެއްވާނެ ކަމަށް ވެސް އޭނާ ވިދާޅުވި އެވެ.
"ހުރިހާ ރައްޔިތުންނަކީ ހަމަހަމަ ބައެއްކަން ގާނޫނުއަސާސީ ކަށަވަރުކޮށްދޭ. އޭގެ އިތުރަށް ގިނަ ރައްޔިތުން ތިބި ތަނަކަށް އިސްކަންދިނުން. އެންމެ ގިނަ މީހުން ތިބި ތަނަކަށް ކޮށްދޭން ޖެހޭ ކަންތައްތަކަށް ދިނުން. މިކަމަކީ ކޮންމެހެން ކޮށްދޭން ޖެހޭނެ ކަމެއް. އަދުލުވެރިވުމަކީ ނިސްބަތުން ކުރެވޭ ކަމެއް،" މުއިއްޒު ވިދާޅުވި އެވެ.
މިސާލެއްގެ ގޮތުގައި މުއިއްޒު ނެންގެވީ ގާތްގަނޑަކަށް 3،000 މީހުންގެ އާބާދީއެއް އޮތް ނޮޅިވަރަމެވެ. އޭނާ ވިދާޅުވީ ހދ. އަތޮޅުގައި ކުޅުދުއްފުށި ފިޔަވާ އެންމެ އާބާދީ ބޮޑީ އެރަށުގައި ކަަމަށާއި އެހެންވީމާ ސަރުކާރަކުން ކަންތައްތައް ކޮށްދިނުމުގައި އެރަށަށް ވުރެ އިސްކަން ދޭން ޖެހޭ އެހެން ރަށެއް އޮތް ކަން ގަބޫލުނުކުރައްވާ ކަމަށް ވެސް އޭނާ ވިދާޅުވި އެވެ. ކުޅުފުއްފުށި އޭނާ އިސްތިސްނާ ކުރެއްވީ އެއީ ސިޓީއެއް ކަމަށްވާތީ އެވެ.
