އިންތިހާބެެއްގެ ކެމްޕޭނަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނުކުމެވަޑައިގެންނެވީމާ އެއީ އެމްޑީޕީ ނޫން ކަމަކަށް މީހުން ނުދެކޭނެ ކަމަށް އެމަނިކުފާނު މިއަދު ވިދާޅުވެއްޖެ އެވެ.
ނަޝީދު އެމްޑީޕީން ވަކިވެވަޑައިގެންނެވީ މިދިޔަ ޖެނުއަރީ މަހު އެޕާޓީން ބޭއްވި ރިޔާސީ ޕްރައިމަރީ އެމަނިކުފާނަށް ކުރިމަތިވެވަޑައިގެންނެވި ނާކާމިޔާބީއަށް ފަހުގަ އެވެ. އެ އާ އެކު "ފިކުރެއްގެ ދިރުން" ނަމުގައި ވަކި ފެކްޝަނެއް އުފައްދަވައި، އެ ހަރަކާތް ފަހުން ޕާޓީއަކަށް ހެއްދެވީ އެވެ.
އެޕާޓީގެ ރިޔާސީ ކެންޑިޑޭޓް، ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބް ރިޔާސީ އިންތިހާބަށް ކުރައްވާ ކެމްޕެއިނުގައި ގއ. ދެއްވަދޫގައި މިއަދު ބޭއްވި ޖަލްސާގައި ނަޝީދު ވިދާޅުވީ އެމްޑީޕީ އާއި ޑިމޮކްރެޓްސްއަކީ ހަގީގަތުގައި އެއް ބައެއް ކަމަށެވެ.
"އަޅުގަނޑުމެނެއް އެމްޑީޕީއަކާ ރުޅިވެރިކަމާ އެކީގައި މުއާމަލާތްކުރާކަށް ނެތިން. އެބޭފުޅުންނަކީ ހަގީގަތުގައި އަޅުގަނޑުމެން. އެބޭފުޅުންނަށް އެނގިވަޑައިގަންނަވާނެ ރާއްޖޭގައި އިންތިހާބެއް އޮވެގެން، އަޅުގަނޑުމެން މިތާ ބޭރަށް ނުކުމެ ތިބީމާ އެެއީ އެމްޑީޕީނޫން، އެމްޑީޕީގެ ރޫހު ނޫން ގޮތަކަށް ރާއްޖޭގެ އެއްވެސް ރައްޔިތަކު ނުދެކޭނެ،" ނަޝީދު ވިދާޅުވި އެވެ.
ނަޝީދު ވިދާޅުވި ގޮތުގައި އެމަނިކުފާނަށް ބަދަލެއް އައިސްފައި އެބަހުރިތޯ މީހުން ސުވާލުކުރެ އެވެ. ނަމަވެސް, އެމަނިކުފާނަށް އެއްވެސް ބަދަލެއް ނާންނަ ކަމަށް ވެސް ވިދާޅުވި އެވެ.
" ހަމަ މިއީ އޭނަ. އެއްވެސް ބަދަލެއް ނާދޭ. ހަމަ ކުރީގައި ވެސް ތިޔަ ބޭފުޅުންނާ ދިމާވި މީހާ" ނަޝީދު ވިދާޅުވި އެވެ.
ސެޕްޓެމްބަރު ނުވައެއްގައި ބާއްވާ ރިޔާސީ އިންތިހާބަށް ނަޝީދު ޖެއްސެވި ހިސާބުން އެމަނިކުފާނަށް ފެނިވަޑައިގަންނަވާ ގޮތުގައި އެ އިންތިހާބުގެ ދެވަނަ ބުރުގައި ވާދަކުރައްވާނީ ދަ ޑިމޮކްރެޓްސްގެ ކެންޑިޑޭޓް އިލްޔާސެވެ. އިންތިހާބުގައި އެމްޑީޕީގެ ކެންޑިޑޭޓް، ރައީސް އިބްރާހީމް މުހައްމަދު ސޯލިހަށް ލިބިވަޑައިގަންނަވާނީ ތިން ވަނަ ކަމަށް ވިދާޅުވެ، ދެވަނަ ބުރުގައި އިލްޔާސަށް ވޯޓްދޭން އެމްޑީޕީގެ މެމްބަރުންނަށް ނަޝީދު އިލްތިމާސް ކުރެއްވި އެވެ.
"އަަޅުގަނޑު އިހުލާސްތެރިކަމާ އެކު މި ދަންނަވަނީ ތިޔަަބޭފުޅުންގެ ހިސާބުން ތިޔަ ބޭފުޅުންނަށް އެބަ ފެނިވަޑައިގަންނަވާ ތިޔަބޭފުޅުން ތިއްބެވީ ތިންވަނައިގައި،" އެމަނިކުފާނު ވިދާޅުވި އެވެ.
އެމްޑީޕީއާ ބެހޭ ގޮތުން ނަޝީދު މިއަދު މިމޭރުމުން ވާހަކަފުޅު ދެއްކެވި އިރު މީގެ ކުރިން އެމަނިކުފާނު ވިދާޅުވަމުން ގެންދެވީ އެޕާޓީ ރޫޅައިލައްވާނެ ކަމަށެވެ.
