ގެދޮރުވެރިޔާގެ ސްކީމްގެ ދަށުން ދޭ ފްލެޓަށް ޝަރުތުހަމަވާ މީހުން ފޯމުގައި ބަޔާންކޮށްފައުވާ ދިރިއުޅުމުގެ ހާލަތާ ގުޅޭ މައުލޫމާތުގެ ސައްހަކަން ކަށަވަރުކުރުމަށް އަންނަ ހަފުތާގައި ގޭގެއަށް ޒިޔާރަތްކުރަން ޕްލޭނިން މިނިސްޓްރީން ނިންމައިފި އެވެ.
ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން "އަދަދު" އަށް ވިދާޅުވީ، ދާއިމީ ލިސްޓު ނިމުމުގެ ކުރިން ފްލެޓަށް ޝަރުތުހަމަވާ މީހުންގެ ދިރިއުޅުމުގެ ހާލަތު ބެލުމުގެ ގޮތުން އަންނަ ހަފްތާގައި މިނިސްޓްރީން ގެތަކަށް ދާން ފަށާނެ ކަމަށެވެ.
ޝަރުތުހަމަވާ މީހުންގެ ލިސްޓުގައި ލިމެނޭ މީހުން ދިރިއުޅޭ ހުރިހާ ގެއަކަށް ވެސް މިނިސްޓްރީން ޒިޔާރަތް ކުރާނެކަމަށް ވެސް އަކްރަމް ވިދާޅުވި އެވެ.
ހައުސިން މިނިސްޓަރީން އަންގާރަ ދުވަހު އިއުލާނު ކުރި ފުލެޓު ލިބޭ މީހުންގެ ވަގުތީ ލިސްޓުގައި 15،000 އަށްވުރެ ގިނަ މީހުންގެ ޝަރުތު ހަމަވާ ކަމަށް ކަނޑައަޅާފައިވެ އެވެ. އެއީ 13،000 ފްލެޓެވެ.
ގެދޮރުވެރިޔާ ސްކީމުގެ ދަށުން ހުޅުމާލޭގެ ދެވަނަ ފިޔަވަހީގައި ސަރުކާރުން އަންނަނީ 18 ބުރީގެ 32 ޓަވަރު އިމާރާތް ކުރަމުންނެވެ. އޭގެތެރޭގައި ހިމެނެނީ ދެ ކޮޓަރީގެ 1،200 ޔުނިޓް، ތިން ކޮޓަރީގެ 2،800 ޔުނިޓެވެ
އޭގެ އިތުރުން މިމަހުގެ ދެ ވަނަ ދުވަހު ފަހި ދިރިއުޅުން ކޯޕަރޭޝަނުން ވަނީ ހުޅުމާލޭގައި އިތުރު 4،000 ހައުސިން ޔުނިޓު އެޅުމަށް އިންޑިއާގެ ކަލްޕަޓަރު ޕްރޮޖެކްޓްސް އިންޓަނޭޝަނަލް ލިމިޓެޑް (ކޭޕީއައިއެލް) އާ ހަވާލުކޮށްފަ އެވެ. އޭގެ އިތުރުން 2،000 ޔުނިޓު އިމާރާތް ކުރާން ވަނީ ބަޔަކާ ހަވާލުކޮށްފަ އެވެ.
އަކްރަމް ވަނީ ފްލެޓަށް އެދި ހުށަހެޅި މީހުންގެ ތެރެއިން ޝަރުތު ހަމަވި މީހުންނަށް ފްލެޓު ދިނުމަށްޓަކައި އިތުރު 3،500 ހައުސިން ޔުނިޓު އިމާރާތްކުރަން ބަޔަކާ ހަވާލު ކުރަން ތައްޔާރު ވަމުން އަންނަ ކަމަށް ވެސް ވިދާޅުވެފަ އެވެ.
