ދުނިޔޭގެ ތާރީހުގައި މިހާތަނަށް ރިކޯޑް ކުރި އެންމެ ހޫނުގަދަ މަހަކީ ނިމުނު ޖުލައި މަސް ކަމަށް ޔޫރަޕިއަން ޔޫނިއަން (އީޔޫ)ގެ ކްލައިމެޓް އޮބްޒަވޭޓަރީއިން އަންގާރަ ދުވަހު ބުނެފި އެވެ.
ޖުލައި މަހުގެ ތެރޭގައި ދުނިޔޭގެ އެކި ހިސާބުތަކަށް "ހީޓްވޭވް" ކުރިމަތިވި އިރު، 2019 ވަނަ އަހަރުގެ ޖުލައި މަހުގެ ރިކޯޑާ އަަޅާ ބަލާއިރު 0.33 ޑިގްރީ ސެލްސިއަސް އިތުރަށް ހޫނުވި އެވެ.
ކުރީގެ ރިކޯޑްތަކަށް ބަލާއިރު، 1991 އިން 2020 އާ ހަމައަށް އެވްރެޖުކޮށް ޖުލައި މަހުގެ ހޫނުމިން ހުރި ވަރަށް ވުރެ މި އަހަރުގެ ޖުލައި މަހު 0.72 ޑިގްސީ ސެލްސިއަަށް އިތުރަށް ހޫނުވި އެވެ.
މި އަހަރުގެ ޖުލައި މަހު ރިކޯޑް މިންވަރަށް ހޫނުވެދާނެ ކަމަށް ސައިންސްވެރިން ކުރިން ލަފާކުރި އެވެ.
ދުނިޔޭގެ ހޫނުމިނާ އެއްކޮށް ކަނޑުތަކުގެ ހޫނުމިން ވެސް ވަނީ ރިކޯޑް މިންވަރަށް މަތިވެފަ އެވެ. އޭގެ ސަބަބުން ކަނޑުގެ ދިރުންތަކަށް ކުރާނެ އަސަރާ މެދު ކަންބޮޑުވުން އެބަ އޮތެވެ.
އީޔޫގެ ކްލައިމެޓް އޮބްޒަވޭޓަރީގެ ޑޭޓާއިން ދައްކާ ގޮތުގައި ޖުލައި 30 ވަނަ ދުވަހު ކަނޑުތަކުގެ ފަށަލައިގެ ހޫނުމިން 20.96 ޑިގްރީ ސެލްސިއަސްއަށް އުފުލުނެވެ.
