ފުވައްމުލަކުގައި 400 ހައުސިން ޔުނިޓު އަޅަން 469 މިލިއަން ރުފިޔާއަށް ބަޔަކާ ހަވާލުކޮށްފި އެވެ.
ފުވައްމުލަކުގައި ހައުސިން ޔުނިޓު އެޅުމުގެ މަޝްރޫއު ހަވާލުކުރީ, ޕީޓީ ސިޓްރަމަސް ހެވީ އިންޑަސްޓްރީސް އިން ޖޭވީ ވިތް ފްލެކްސްއިންކް ޕްރައިވެޓް ލިމިޓެޑް ކިޔާ ކުންފުންޏަކަށެވެ.
ސަރުކާރުގެ ޕީއެސްއައިޕީ ބަޖެޓުން 469 މިލިއަން ރުފިޔާ ހޭދަކުރާ ގޮތަށް ފުވައްމުލަކުގައި 400 ހައުސިން ޔުނިޓު އަޅަން ހަވާލުކުރީ, 540 ދުވަހުގެ ތެރޭގައި ނިންމާ ގޮތަށެވެ. އެ މަޝްރޫއުގެ އެއްބަސްވުމުގައި މިއަދު ސޮއިކޮށްފައި ވުމާއެކު, މި މަޝްރޫއު ނިންމުމުގެ އެންމެ ފަހު ދުވަހަކީ 2025, ޖެނުއަރީ 28 އެވެ.
މި މަޝްރޫއުގެ ދަށުން ފުވައްމުލަކުގައި އިމާރާތްކުރާ ކޮންމެ ފްލެޓެއްގައި 1000 އަކަފޫޓު ހުންނާނެ ކަމަށް ޕްލޭނިން މިނިސްޓްރީން ބުނެ އެވެ. އެ މިނިސްޓްރީން ބުނީ, ކޮންމެ ފްލެޓެއްގައި ތިން ކޮޓަރިއާއި, ތިން ފާހާނަ, ސިޓިން ރޫމުް, ބަދިގެ, ކާގެ އަދި ލޯންޑްރީ އާއި ސްޓޯ ރޫމު ހިމެނޭނެ ކަމަށެވެ.
11 ބުރިއަށް އިމާރާތްކުރަން ރާވާފައިވާ މި ފްލެޓްތަކުގައި ދެ ލިފްޓު ހުންނާނެ އެވެ. އަދި އެންމެ ތިރީ ފަންގިފިލާ ބޭނުންކުރާނީ ކޮމާޝަލް އަދި މެއިންޓެނަންސް އޮފީހުގެ އިތުރުން, އެތަނުގައި ކޮންމެ އެޕާޓްމަންޓަކަށް ސައިކަލު ޕާކިން ޖާގައެއް ދޭނެ އެވެ.
