ގެދޮރުވެރިޔާ ސްކީމްގެ ދަށުން ދޫކުރުމަށް، ފަހި ދިރިއުޅުން ކޯޕަރޭޝަނުން ހުޅުމާލޭގައި އިމާރާތް ކޮށްފައިވާ ފްލެޓްތަކަށް ކުރިމަތިލީ ފަރާތްތަކުގެ ތެރެއިން ފްލެޓް ލިބޭ މީހުންގެ ލިސްޓު މާދަމާ ނެރެން ތައްޔާރުވެއްޖެ އެވެ.
ގެދޮރުވެރިންގެ ކޮމިޓީގެ ޗެއާ އަދި ޕްލޭނިން މިނިސްޓްރިގެ ސްޓޭޓް މިނިސްޓަރު, އަކްރަމް ކަމާލުއްދީން މިއަދު "އަދަދު" އަށް ވިދާޅުވީ, ފްލެޓް ލިސްޓު މާދަމާ އިއުލާން ކުރާނެ ކަމަށެވެ.
އޭނާ ވިދާޅުވީ ފްލެޓް ލިބޭ މީހުންގެ ވަގުތީ ލިސްޓު މާދަމާ ނެރުމަށްފަހު ޝަކުވާ ހުށަހެޅުމަށް 15 ދުވަހުގެ މުއްދަތެއް ދޭނެ ކަމަށެވެ.
ސަރުކާރުގެ ބިންވެރިޔާ އަދި ގެދޮރުވެރިޔާ ސްކީމުގެ ދަށުން ގޯއްޗާއި ފްލެޓް ލިބޭ މީހުންގެ ލިސްޓު އާންމު ކުރަން ކުރިން ކަނޑައަޅާފައި އޮތީ މިދިޔަ މާޗް މަހު އެވެ. ނަމަވެސް އެ މުއްދަތު ދިގުލައިގެން ގޮސް, ބިންވެރިޔާ ސްކީމުން ގޯތި ލިބޭ މީހުންގެ ލިސްޓު އާންމުކުރީ މިދިޔަ ޖޫން މަހުގެ 29ގަ އެވެ.
ގެދޮރުވެރިޔާ ސްކީމުން ފްލެޓް ލިބޭ މީހުންގެ ލިސްޓު އާންމުކުރާނެ ކަމަށް ބުނީ މިދިޔަ ޖުލައި މަސް ނިމުމުގެ ކުރިންނެވެ. ނަމަވެސް ޖުލައި މަސް ނިމުނުއިރުވެސް އެ ލިސްޓު އާންމެއް ނުކުރެ އެވެ.
ގެދޮރުވެރިޔާ ސްކީމްގެ ދަށުން ދޫކުރަން ނިންމާފައި އޮތީ 4،000 ފުލެޓެވެ. އެ ފްލެޓުތަކަށް އެދި 20،697 މީހުން ހުށަހެޅި އެވެ. އެ މަޝްރޫއު ވަކި ދެ ޕްރޮޖެކްޓަކަށް ބަހާލައި 4000 ފުލެޓު ޖުމްލަ 32 ޓަވަރަކަށް ވަނީ ބަހާލައިފަ އެވެ.
ހުޅުމާލޭގެ ދެ ވަނަ ފިޔަވަހީގައި އަޅާ މި ފްލެޓުތަކުގެ މަސައްކަތް ކުރިއަށް ގެންދަނީ އެފްޑީސީއާ ގުޅިގެން އިންޑިއާގެ ދެ ކުންފުންޏެއް ކަމަށްވާ ޖޭއެމްސީ އަދި އެންބީސީސީ އިންނެވެ. ދެ ކުންފުނިން ވެސް އަޅަނީ 16 ޓަވަރުގެ ޖުމްލަ 2000 ހައުސިން ޔުނިޓެވެ.
ގެދޮރުވެރިޔާ ސްކީމްގެ ދަށުން ދޫކުރުމަށް ހަމަޖެހިފައިވާ ފުލެޓުތަކުގެ ތެރެއިން ޖޭއެމްސީން ހުޅުމާލޭގައި އިމާރާތް ކުރަމުން އަންނަ "އަމާން އުދަރެސް" ގެ އަށް ޓަވަރުގެ މަސައްކަތް މި މަހަށް އެއްކޮށް ނިންމާލެވޭނެ ކަމަށް ފަހި ދިރިއުޅުން ކޯޕަރޭޝަނުން ވަނީ މީގެ ކުރިން ހާމަކޮށްފަ އެވެ.
ބާކީ އަށް ޓަވަރުގެ މަސައްކަތް ކުރަން ހަމަޖެހިފައި ވަނީ ފުރަތަމަ އަށް ޓަވަރު ނިމުމުންނެވެ.
އެ ކޯޕަރޭޝަނުން ވަނީ މި ސްކީމުގެ ދަށުން ދޫކުރާ ފްލެޓުތައް ހުންނާނެ ގޮތުގެ ނަމޫނާ ޔުނިޓުތަކެއް މިދިޔަ ޖެނުއަރީ މަހު ދައްކާލާފަ އެވެ. އެފްޑީސީއިން މައުލޫމާތު ދިން ގޮތުގައި މި މަޝްރޫއުގެ ޖުމްލަ މަސައްކަތް ނިމޭނެ ކަމަށް ބެލެވެނީ އަންނަ އަހަރު ތެރޭގަ އެވެ.
