މިލާން (އޮގަސްޓް 3) - އިޓަލީގެ ލެޖެންޑަރީ ގޯލްކީޕަރު ޖިއަންލުއީޖީ ބުފޮން، އުމުރުން 45 އަހަރުގައި ފުޓްބޯޅައިން ރިޓަޔާކޮށްފި އެވެ.
އިޓަލީގެ ދެ ވަނަ ޑިވިޝަނުގައި މި ވަގުތު ޕާމާ އަށް ކުޅެމުން އަންނަ ބުފޮން، ފުޓްބޯޅަ ކުޅުން ހުއްޓާލިކަން އިއުލާނުކުރިއިރު، ސޯޝަލް މީޑިއާގައި ވަނީ ފުޓްބޯޅައިން އޭނާ އަށް ދިން އިހުތިރާމާއި ލޯތްބަށްޓަކައި ޝުކުރު އަދާކުރާ ކަމަށް ބުނެފަ އެވެ.
ޔުވެންޓަސްއާ އެކު، އިޓަލީ ލީގުގެ ޗެމްޕިއަންކަން 10 ފަހަރު ހޯދި ބުފޮން ކުޅުން ހުއްޓާލީ އޭނާ އެންމެ ފުރަތަމަ ކުޅުނު ކްލަބް، ޕާމާގައި ހުރެ އެވެ.
ބުފޮން އޭނާގެ ކެރިއަރު ފެށީ 1991 ވަނަ އަހަރު ޕާމާ ޔޫތު ޓީމުންނެވެ. އުމުރުން 17 އަހަރުގައި 1995 ވަނަ އަހަރު ބުފޮން ވަނީ ޕާމާގެ ސީނިއާ ސްކޮޑަށް ޕްރޮމޯޓްކޮށްފަ އެވެ. އޭނާ އެންމެ ފުރަތަމަ ޕާމާ ޓީމަށް މެޗެއް ކުޅެދިނީ 1995 ވަނަ އަހަރުގެ ނޮވެމްބަރު މަހުގަ އެވެ. ޕާމާއާ އެކު ބުފޮން ވަނީ އިޓާލިއަން ކަޕާއި އިޓާލިއަން ސުޕަ ކަޕް އަދި ޔުއެފާ ކަޕް (ޔޫރޮޕާ ލީގު) ކާމިޔާބުކޮށްފަ އެވެ.
ޔުވެންޓަސް އަށް 2001 ވަނަ އަހަރު ބުފޮން ބަދަލުވީ އޭރު ދުނިޔޭގެ އެންމެ އަގުބޮޑު ގޯލްކީޕަރުގެ ގޮތުގަ އެވެ. ޔުވެންޓަސް އިން ވަނީ ބުފޮންގެ ސޮއި ހޯދަން 63 މިލިއަން ޑޮލަރު ހަރަދުކޮށްފަ އެވެ. އެ ޓީމާ އެކު ގިނަ ކާމިޔާބީތަކެއް ހޯދި އެވެ.
ސަތާރަ އަހަރަށް ފަހު ޔުވެންޓަސް ދޫކޮށް ބުފޮން ވަނީ ފްރާންސްގެ ޕީއެސްޖީ އަށް 2018-2019 ވަނަ ސީޒަނުގައި ކުޅެފަ އެވެ. ޕީއެސްޖީގައި އެއް ސީޒަނަށް ފަހު ބުފޮން އަލުން ވަނީ ޔުވެންޓަސް އަށް ބަދަލުވެފަ އެވެ. ޔުވެންޓަސްއާ އެކު ބުފޮންގެ އެންމެ ބޮޑު އަމާޒަކަށްވީ ޗެމްޕިއަންސް ލީގު ކާމިޔާބު ކުރުމެވެ. އެކަމަކު އެ ޓީމުގައި ހުރެ އެކަން ހާސިލްކުރެވޭ ގޮތެއްނުވި އެވެ.
ފުޓްބޯޅަ ކެރިއަރުގައި ބުފޮންގެ އެންމެ ހާއްސަ ކާމިޔާބީ އަކީ 2006 ވަނަ އަހަރު އިޓަލީއާ އެކު، ފީފާ ވޯލްޑް ކަޕް ކާމިޔާބު ކުރުމެވެ.
ބުފޮން އަށް ވަނީ ސައުދީ ޕްރޮފެޝަނަލް ލީގު (ޕްރޯ ލީގު)ގެ ކްލަބްތަކަކުން ބޮޑު މުސާރަ ލިބޭ އޮފާތަކެއް ވެސް ލިބިފަ އެވެ. އެކަމަކު، މި ވަގުތު ހާލަތަށް ވިސްނައި އޭނާ އަށް ގަބޫލުކުރެވުނީ އެންމެ ރަނގަޅު ގޮތަކީ ފުޓްބޯޅައިން ރަސްމީކޮށް ދުރަށް ޖެހިލައި، އަމިއްލަ ދިރިއުޅުމަށް ވަގުތު ދިނުމަށެވެ.
