މިލާން (ޖުލައި 25) - ސައުދީ އަރަބިއްޔާގެ ޕްރޯ ލީގުން ލިބިފައިވާ ހުށަހެޅުމަށް ބެލުމެއް ނެތި، އިޓަލީގެ ލެޖެންޑަރީ ގޯލްކީޕަރު ޖިއަންލުއީޖީ ބުފޮން ފުޓްބޯޅައިން ރިޓަޔާކުރަން ނިންމާފައިވާ ކަމަށް އިޓަލީގެ މީޑިއާ ރިޕޯޓްތައް ބުނެފި އެވެ.
އުމުރުން 45 އަހަރުގެ ބުފޮން މި ވަގުތު، އޭނާގެ އެންމެ ފުރަތަމަ ކްލަބް ޕާމާ އެފްސީ އަށް ކުޅެމުން އަންނަނީ އިޓަލީގެ ދެ ވަނަ ޑިވިޝަނުގަ އެވެ. ޕާމާއާ އެކު ބުފޮން ހަދާފައިވާ ކޮންޓްރެކްޓްގައި ބާކީ އެއް އަހަރު އޮއްވައި، އޭނާ ހޯދަން ސައުދީ އަރަބިއްޔާގެ ކްލަބްތަކުން ވަނީ އޮފާކޮށްފަ އެވެ.
އެކަމަކު، ބުފޮން މިހާރު ނިންމާފައިވަނީ ހުށަހެޅުންތަކަށް ބެލުމެއް ނެތި ފުޓްބޯޅަ އިން ރިޓަޔާކުރުމަށެވެ. އަދި ކުރިއަށް އޮތް ދުވަސްތަކުގެ ތެރޭގައި ބުފޮންގެ ފަރާތުން ރަސްމީކޮށް އެކަން އިއުލާނުުކުރާނެ ކަމަށް ވެސް މީޑިއާ ރިޕޯޓްތައް ބުނެފައިވެ އެވެ.
ބުފޮން އޭނާގެ ކެރިއަރު ފެށީ 1991 ވަނަ އަހަރު ޕާމާ ޔޫތު ޓީމުންނެވެ. އުމުރުން 17 އަހަރުގައި 1995 ވަނަ އަހަރު ބުފޮން ވަނީ ޕާމާގެ ސީނިއާ ސްކޮޑަށް ޕްރޮމޯޓްކޮށްފަ އެވެ. އޭނާ އެންމެ ފުރަތަމަ ޕާމާ ޓީމަށް މެޗެއް ކުޅެދިނީ 1995 ވަނަ އަހަރުގެ ނޮވެމްބަރު މަހުގަ އެވެ. ޕާމާއާ އެކު ބުފޮން ވަނީ އިޓާލިއަން ކަޕާއި އިޓާލިއަން ސުޕަ ކަޕް އަދި ޔުއެފާ ކަޕް (ޔޫރޮޕާ ލީގު) ކާމިޔާބުކޮށްފަ އެވެ.
ޔުވެންޓަސް އަށް 2001 ވަނަ އަހަރު ބުފޮން ބަދަލުވީ އޭރު ދުނިޔޭގެ އެންމެ އަގުބޮޑު ގޯލްކީޕަރުގެ ގޮތުގަ އެވެ. ޔުވެންޓަސް އިން ވަނީ ބުފޮންގެ ސޮއި ހޯދަން 63 މިލިއަން ޑޮލަރު ހަރަދުކޮށްފަ އެވެ. އެ ޓީމާ އެކު ގިނަ ކާމިޔާބީތަކެއް ހޯދި އެވެ.
ސަތާރަ އަހަރަށް ފަހު ޔުވެންޓަސް ދޫކޮށް ބުފޮން ވަނީ ފްރާންސްގެ ޕީއެސްޖީ އަށް 2018-2019 ވަނަ ސީޒަނުގައި ކުޅެފަ އެވެ. ޕީއެސްޖީގައި އެއް ސީޒަނަށް ފަހު ބުފޮން އަލުން ވަނީ ޔުވެންޓަސް އަށް ބަދަލުވެފަ އެވެ. ޔުވެންޓަސްއާ އެކު ބުފޮންގެ އެންމެ ބޮޑު އަމާޒަކަށްވީ ޗެމްޕިއަންސް ލީގު ކާމިޔާބު ކުރުމެވެ. އެކަމަކު އެ ޓީމުގައި ހުރެ އެކަން ހާސިލްކުރެވޭ ގޮތެއްނުވި އެވެ.
ހިލޭ ޓްރާންސްފާއެއްގައި ބުފޮން ހޯދަން ގިނަ ކްލަބްތަކަކުން ހުށަހެޅި ނަމަވެސް މީގެ ދެ އަހަރު ކުރިން ކްލަބް ބަދަލުކުރިއިރު، އޭނާ ބޭނުންވީ ޕާމާ އަށް އަލުން ކުޅޭށެވެ. ބުފޮން ހޯދަން އެ ފަހަރު، ޕޯޗުގަލް އާއި ސްޕެއިންގެ ކްލަބްތަކުން ކޮންޓްރެކްޓް ހުށަހެޅި އެވެ.
