ޕެރިސް (ޖުލައި 19) - މި ފަހަރުގެ ޔޫރޯ ފުޓްބޯޅަ މުބާރާތުގެ މޮޅު ކުޅުންތެރިޔާގެ މަގާމު ހޯދި އިޓަލީގެ ގޯލްކީޕަރު ޖިއަންލުއީޖީ ޑޮންނަރުންމާ ފްރާންސްގެ ގަދަބާރު ޕީއެސްޖީ އަށް ބަދަލުވުމުގެ ކުރިން އެ ޓީމަށް ކުރިން ކުޅުނު އިޓަލީގެ ތަޖުރިބާކާރު ގޯލްކީޕަރު ޖިއަންލުއީޖީ ބުފޮންގެ ހިޔާލު ހޯދި ކަމަށް ބުނެފި އެވެ.
ބުފޮން ވަނީ 2018-2019 ވަނަ ސީޒަން ޕީއެސްޖީ އަށް ކުޅެފަ އެވެ. އުމުރުން 22 އަހަރުގެ ޑޮންނަރުންމާ މީގެ ކުރިން ކުޅެމުން އައި އޭސީ މިލާނުން ވެސް އާ ކޮންޓްރެކްޓެއް ހުށަހަޅާފައިވަނިކޮށް އޭނާ ހިލޭ ޓްރާންސްފާއެއްގައި ޕީއެސްޖީ އަށް ބަދަލުވާން ނިންމީ ގިނަ ގޮތްގޮތުން ވިސްނުމަށް ފަހު އެވެ.
ޕީއެސްޖީއާ އެކު ފަސް އަހަރުގެ އެއްބަސްވުމެއްގައި ސޮއިކުރުމަށް ފަހު އެ ކްލަބްގެ ރަސްމީ ވެބްސައިޓަށް ދިން އިންޓަވިއުއެއްގައި ޑޮންނަރުންމާ ބުނީ ޕީއެސްޖީ އިން އޮފާ ލިބުމާ އެކު މުހިއްމު މީހުންގެ ކައިރިން ލަފާ ހޯދި ކަމަށާއި އޭގެ ތެރެއިން ބުފޮންއާ ވެސް މަޝްވަރާ ކުރެވުނު ކަމަށެވެ.
"މި ކްލަބަށް އައުމުގެ ކުރިން އަހަރެން ބުފޮންއާ ވެސް ވާހަކަ ދެއްކިން. މި ކްލަބްގެ ތާރީހާ އެހެނިހެން ކަންކަމާ ބެހޭ މުހިއްމު ވާހަކަތަކެއް އެއީ. ބުފޮން ކިޔައިިދިން މި ތަނުގައި (ކްލަބްގައި) ކުރެވުނު ރަނގަޅު ތަޖުރިބާ ތަކުގެ ވާހަކަ. އަހަންނަށް އޭނަ ދިން ލަފާ އަސްލު ވަރަށް ރަނގަޅު. މި ކްލަބަށް ބަދަލުވުމަކީ އަހަންނަށް ރަނގަޅު ފިޔަވަޅެއް،" ޑޮންނަރުންމާ ބުންޏެވެ.
އިޓަލީ ގައުމީ ޓީމުގައި ޑޮންނަރުންމާ އަންނަނީ ބުފޮންގެ މަގާމު ރަނގަޅަށް ބަލަހައްޓަމުންނެވެ.
ޑޮންނަރުންމާ މިލާނުގައި މަޑުކުރުވަން އެ ކްލަބުން އޭނާ އަށް ރަނގަޅު ކޮންޓްރެކްޓެއް ހުށަހެޅި އެވެ. އެކަމަކު، އާ ކޮންޓްރެކްޓްގައި ސޮއިކުރާއިރު، ޑޮންނަރުންމާގެ އޭޖެންޓް މިނޯ ރައިއޯލާ އަށް އޭޖެންޓް ފީގެ ގޮތުގައި 20 މިލިއަން ޔޫރޯ ދޭން ދެކޮޅު ހަދާތީ ޑޮންނަރުންމާ އެ ޓީމުގައި މަޑުނުކުރީ އެވެ.
ނަޕޯލީގައި ހުއްޓައި މިލާންގެ އެކެޑަމީ އަށް ޒުވާން އުމުރުގައި ގަނެ، ޑޮންނަރުންމާ އަށް ސީނިއާ ޓީމުގައި މެޗެއްގައި ފުރުސަތު ދިނީ 2015 ވަަނަ އަހަރުގެ ފެބްރުއަރީ މަހު އޭނާގެ 16 ވަނަ އުފަން ދުވަހުގެ ތިން ދުވަސް ކުރިންނެވެ.
އެ ދުވަހުގެ މެޗުގައި ނުކުޅުނު ނަމަވެސް ޑޮންނަރުންމާ ބެންޗަށް ގެނެވުނީ ވެސް ހާއްސަ ހުއްދައެއް ނަގައިގެންނެވެ. އެއީ އޭނާ ޕްރޮފެޝަނަލް މެޗަކަށް ނުކުންނަ ވަރަށް ވުރެ ޅަ ކުޅުންތެރިއަކަށް ވުމުންނެވެ.
އޭގެ ހަ ވަރަކަށް މަސް ފަހުން ޑޮންނަރުންމާ ވަނީ އިޓާލިއަން ލީގުގެ މެޗެއްގައި މިލާންގެ ގޯލު ބަލަހައްޓައިފަ އެވެ. އެންމެ ޒުވާން އުމުރުގައި ކުޅުނު ގޯލްކީޕަަރު ޖިއުސިޕޭ ސާޗީ އާއި ޑޮންނަރުންމާގެ ދެމެދު ފުރަތަމަ މެޗު ކުޅުނުއިރު އުޅެނީ 13 ދުވަހުގެ ފަރަގެކެވެ. މެޗެއްގައި ކުޅެލަން ޑޮންނަރުންމާ އަށް މިލާނުން ފުރަތަމަ ފުރުސަތު ދިންތާ މާގިނަ ދުވަހެއް ނުވެ އޭނާ ވަނީ އެ ޓީމުގެ އެއް ވަނަ ކީޕަރަކަށް ޕްރޮމޯޓްކޮށްފަ އެވެ.
