ޔޫކްރެއިނަށް ސުލްހަ ގެނައުމާ ގުޅޭ މަޝްވަރާތައް އޯގަސްޓު މަހު ސައުދީ އަރަބިއްޔާގައި ކުރިއަށް ދާނެ ކަމަށް ޔޫކްރެއިން ސަރުކާރުން ބުނެފި އެވެ.
ޔޫކްރެއިން ރައީސް އޮފީހުގެ އިސްވެރިޔާ އަންދްރީ ޔެރްމަކް ކުރެއްވި ޓްވީޓެއްގައި ވިދާޅުވީ "ޔޫކްރެއިން ޕީސް ފޯމިއުލާ" ގެ މަޝްވަރާ ކުރިއަށް ދާނީ ސައުދީ އަރަބިއްޔާގައި ކަމަށެވެ.
އެ ފޯމިއުލާގެ ފުރަތަމަ މަޝްވަރާތައް އޮތީ ޖޫން މަހު ކޯޕެންހޭގަންގައި ކަމަށާއި ކުރިއަށް އޮތް ބުރުގައި ގިނަ ފަރާތްތަކުގެ ބައިވެރިވުމަށް ބާރު އަޅާ ކަމަށް އޭނާ ވިދާޅުވި އެވެ.
ވޯލް ސްޓްރީޓް ޖާނަލް ނޫހުން ބުނީ މަޝްވަރާތައް ކުރިއަށް ދާނީ އޯގަސްޓު 5 އަދި 6 ވަނަ ދުވަހު ކަމަށާއި 30 އަށް ވުރެ ގިނަ ގައުމުން ބައިވެރިވާނެ ކަމަށެވެ.
ސައުދީގައި އެ ސަމިޓު ބާއްވަން ތައްޔާރުވާ އިރު، އެމެރިކާގެ ނޭޝަނަލް ސެކިއުރިޓީ އެޑްވައިޒަރު ޖޭކް ސަލިވަން މިދިޔަ ބުރާސްފަތި ދުވަހު ސައުދީއަށް ދަތުރު ކުރެއްވި އެވެ.
