މެމްބަރުންގެ އަދަދު ހަމަނުވެގެން އިލެކްޝަންސް ކޮމިޝަނުން އުވާލަން ނިންމާފައި އޮތް މޯލްޑިވްސް ރިފޯމް މޫވްމަންޓުން ރިޔާސީ ކެންޑިޑޭޓަކު ނެރެން ޕްރައިމަރީއަކަށް އިއުލާނު ކުރި ނަމަވެސް އެ އިންތިހާބު ނުބާއްވަން ނިންމައިފި އެވެ.
މިއަދު ބާއްވަން އިއުލާންކުރި އެ ޕާޓީގެ ޕްރައިމަރީއަށް ވާދަކުރަން ހުށަހެޅުއްވީ އެ ޕާޓީގެ ރައީސްގެ މަގާމުގައި ހުންނެވި ފާރިސް މައުމޫނު އެކަންޏެވެ.
އެމްއާރްއެމްގެ ސެކްރެޓަރީ ޖެނެރަލް އަބްދުލް އަލީމް މިއަދު "އަދަދު" އާ ވާހަކަ ދައްކަވަމުން ވިދާޅުވީ ޕްރައިމަރީއަށް އެއް ކެންޑިޑޭޓަކު ވާދަކުރުމުން އެ ޕާޓީގެ އަސާސީ ގަވާއިދުގައިވާ ގޮތުގެ މަތިން އިންތިހާބު ނުބާއްވަން ނިންމާފައިވާ ކަމަށެވެ.
އަލީމް ވިދާޅުވި ގޮތުގައި ޕްރައިމަރީ ނުބާއްވަން ނިންމި ނަމަވެސް, އެ ޕާޓީގެ ރިޔާސީ ޓިކެޓް ފާރިސްއާ ހަވާލުކުރުމާމެދު ގޮތް ނިންމާނީ އެ ޕާޓީގެ އެކްސްކޯއިންނެވެ.
"ރިޔާސީ ޓިކެޓު ދޭނީ އެކްސްކޯއިން. މި ހަފްތާ ތެރޭގައި ނިންމާނެ،" ރިޔާސީ ޓިކެޓާމެދު އަދި ގޮތެއް ނުނިންމާކަން ހާމަކުރައްވަމުން އަލީމް ވިދާޅުވި އެވެ.
އެމްއާރްއެމްގެ ޕްރައިމަރީ ނުބާއްވަން ނިންމާފައިވާއިރު, ޕްރައިމަރީއަށް ކުރިމަތިލި ހަމައެކަނި ކެންޑިޑޭޓް ފާރިސް ގެންދަވަނީ އަމިއްލަގޮތުން ކުރިމަތިލުމަށް ތާއީދު ހޯދުމުގެ މަސައްކަތް ކުރަމުންނެވެ.
ރިޔާސީ އިންތިހާބުގެ ގާނޫނު ބުނާ ގޮތުން ރާއްޖޭގައި ރަޖިސްޓްރީކޮށްފައިވާ ސިޔާސީ ޕާޓީއެއްގެ ޓިކެޓުގައި ވާދަކުރުމުގެ ބަދަލުގައި އަމިއްލަ ގޮތުން އެ އިންތިހާބަށް ވާދަކުރާ ނަމަ މަދުވެގެން 1،500 މީހުންގެ ސޮއި ހިމެނޭ ތާއީދު ފޯމުތައް އިލެކްޝަންސް ކޮމިޝަން (އީސީ) އަށް ހުށަހަޅަން ޖެހެ އެވެ.
އެނގިފައިވާ ގޮތުގައި, ފާރިސް އަމިއްލަ ގޮތުން ވާދަކުރުމަށް ތާއީދު ހޯދަން މަސައްކަތް ކުރަމުން ދަނީ އެމްއާރްއެމްގެ މައްސަލަ ކޯޓުގައި އޮތުމުން, އެ ޕާޓީގެ ފަރާތުން ވާދަނުކުރެވިދާނެ ހާލަތަކަށް ތައްޔާރުވުމުގެ ގޮތުންނެވެ.
ގާނޫނުން ލާޒިމްކުރާ މެމްބަރުންގެ އަދަދު ހަމަނުވުމުން، އުވާލުމަށް ނިންމާފައިވާ އެމްއާރުއެމުން ރިޔާސީ ކެންޑިޑޭޓަކު ނެރުމަށް މަސައްކަތް ކުރަމުންދާއިރު, ކުރިއަށް އޮތް ރިޔާސީ އިންތިހާބުގައި އެ ޕާޓީގެ ކެންޑިޑޭޓަކު ނުނެރެވޭނެ ކަމަށް ސީދާ ބުނަން ނޭނގޭ ކަމަށް އިލެކްޝަންސް ކޮމިޝަނުން ވަނީ ބުނެފަ އެވެ.
"އެމްއާރުއެމް އިން އެބަވޭ އެ ޕާޓީ އުވާލުމަށް ކޮމިޝަނުން ނިންމި ނިންމުން ގަބޫލުނުކުރާނެ ކަމަށް ބުނެ ކޯޓަށް މައްސަލަ ހުށަހަޅާފަ، އެހެންވީމަ ދެން ކޯޓުން ގޮތެއް ނުނިމެނީސް [ރިޔާސީ ކެންޑިޑޭޓަކަށް] ވާދަކުރެވޭނެއޭ، ނުކުރެވޭނެއޭ މިވަގުތު ބުނަން ދަތި،" އީސީގެ ސެކެޓްރީ ޖެނެރަލް ހަސަން ޒަކަރިއްޔާ ވިދާޅުވި އެވެ.
އެމްއާރުއެމް އުވާލި މައްސަލާގައި މައުމޫނާއި އެމަނިކުފާނުގެ ދަރިކަލުން އަދި ޕާޓީގެ ރައީސް އަހްމަދު ފާރިސް މައުމޫން ވަނީ މިއީ އީސީގެ ނިންމުމަކީ ގާނޫނާ ހިލާފު ނިންމުމެއް ކަމަށް ބުނެ ފާޑުވިދާޅުވެފަ އެވެ. އެމްއާރުއެމުން ބުނާ ގޮތުގައި އީސީއިން 3،000 މެމްބަރުން ހަމަކުރުމަށް ދިން މުއްދަތުގައި އެ އަދަދަށް އެ ޕާޓީން ވަނީ ފޯމު ހުށަހަޅައިފަ އެވެ.
އީސީގެ ނިންމުން ބާތިލުކުރުމަށް އެދި ކުރިއަށް އޮތް 30 ދުވަހުގެ ތެރޭގައި ސިވިލް ކޯޓަށް މައްސަލައެއް ހުށަހެޅުމަށް މަސައްކަތް ކުރަމުންދާ ކަމަށް ކޯޓުގައި ބުނެފައިވާތީ، ސިވިލް ކޯޓުގެ އަމުރު ނެރެދީފައިވަނީ 30 ދުވަހަށެވެ. އެ އަމުރު ނެރުނީ މިދިޔަ މޭމަހުގެ 28 ގަ އެވެ. އެ އަމުރު މުރާޖައާ ކުރުމަށް އެދި އީސީއިން ދެފަހަރެއްގެ މަތިން ހުށަހެޅުމުންވެސް ކޯޓުން ނިންމީ މުރާޖައާ ކުރެވެން ނެތް ކަމަށެވެ.
އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ވާދަ ކުރައްވަނީ ރައީސް އިބްރާހިމް މުހައްމަދު ސޯލިހާއި ޖުމްހޫރީ ޕާޓީގެ ގާސިމް އިބްރާހިމާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމް ކުރިމަތިލައްވަ އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އުފެއްދެވި ދަ ޑިމޮކްރެޓްސްގެ ރިޔާސީ ކެންޑިޑޭޓަކީ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބެވެ.
އެންމެ ބޮޑު އިދިކޮޅު ޕާޓީ ޕްރޮގްރެސިވް ޕާޓީ އޮފް މޯލްޑިވްސް އިން ބުނަނީ އެ ޕާޓީގެ ކެންޑިޑޭޓަކީ ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ކުރީ ރައީސް ޔާމީން ކަމަށެވެ.
