ރައްޔިތުންގެ މަޖިލިސް އެކުލެވިގެންވާ ގޮތަށް ބޮޑު ބަދަލެއް ގެނައުމަށް ދަ ޑިމޮކްރެޓްސްގެ "މުޅި ރާއްޖެ މަޖިލިސް: ރާއްޖޭގެ ފަރާތުން ކުރާ ވަކާލާތު" ސިޔާސަތުގައި ހިމެނިފައިވާ ގޮތަށް އެ މަޖިލީހުގެ މެމްބަރުންގެ އަދަދު 76 ގައި ހިފެހެއްޓުމަށްޓަކައި ގާނޫނު އަސާސީ އިސްލާހު ކުރުމަށް ހުޅުދޫ ދާއިރާގެ މެމްބަރު އަދި އެ ޕާޓީގެ ރިޔާސީ ކެންޑިޑޭޓު އިލްޔާސް ލަބީބް ހުށަހަޅުއްވައިފި އެވެ.
ރައްޔިތުންގެ މަޖިލީހުގައި މިވަގުތު 87 މެމްބަރުން ތިއްބަވާއިރު ކޮންމެ 5,000 މީހަކު ތަމްސީލުކުރާ ގޮތަށް މެމްބަރުން އިންތިހާބު ކުރެ އެވެ. އަންނަ އަހަރު އިންތިހާބު ކުރާ މަޖިލީހަށް ހަ ދާއިރާ އިތުރުވާނެ ކަމަށް އިލެކްޝަންސް ކޮމިޝަން (އީސީ) އިން އޮތީ ހާމަކޮށްފި އެވެ.
އެގޮތަށް ބަޔާންކޮށްފައި އޮތް ގާނޫނު އަސާސީގެ 71 މާއްދާ އަންނަނިވި ގޮތަށް އިސްލާހު ކުރަން މިއަދު އިލްޔާސް ވަނީ ހުށަހަޅުއްވާފަ އެވެ.
"ރައްޔިތުންގެ މަޖިލިސް އެކުލެވިގެންވަނީ މި މާއްދާގައި ބަޔާންކޮށްފައިވާ ގޮތުގެ މަތީން ކަނޑައެޅޭ 76 މެމްބަރުންގެ މައްޗަށެވެ."
އެ އިސްލާހާ އެއްގޮތަށް މަޖިލީހުގެ ކޮމްޕޮޒިޝަނަށް ބަދަލުތަކެއް ގެނައުމަށް ވެސް ވަނީ ހުށަހަޅާފަ އެވެ. އެގޮތުން, އިދާރީ ދާއިރާތަކަށް ހާއްސަކުރެވޭ 55 މެމްބަރުން ތިބޭއިރު ހުރިހާ އިދާރީ ދާއިރާއެއް ތަމްސީލުވާނޭ ގޮތަށް އިންތިހާބު ކުރެވޭ އަށް އަންހެން މެމްބަރުން ތިބެން ޖެހޭ ކަމަށް ވެސް ބަޔާންކޮށްފައިވެ އެވެ.
އޭގެ އިތުރުން, ނުކުޅެދުންތެރިކަން ހުންނަ ފަރާތްތައް ތަމްސީލު ކުރާނެ ދެ މެމްބަރުންނާއި, ޕާޓީތަކަށް ވޯޓު ލިބޭ ނިސްބަތުން ގާނޫނުގައިވާ ގޮތުން ސިޔާސީ ޕާޓީތަކުން އައްޔަނުކުރާ 11 މެމްބަރުން ތިބޭނެ ކަމަށް ވެސް އިސްލާހުގައި ބުނެފައިވެ އެވެ.
މި ބިލު ހުށަހެޅުއްވި މައިގަނޑު ސަބަބެއްގެ ގޮތުގައި އިލްޔާސް ފާހަގަކުރެއްވީ މެމްބަރުންގެ އަދަދު އިތުރުވާ ގޮތަށް އޮތުމުން ބަޖެޓުން މަޖިލީހަށް ކުރަން ޖެހޭ ހަރަދުތައް އިތުރުވަމުން ދިޔުން ހުއްޓުވުމަށެވެ.
"ޖަޕާނު މަހެއް ވިހާ ހެން ކޮންމެ ފަސް އަހަރަކުން ގޮނޑިތައް އިތުރުވަނީ. ވަރަށް ކުދި ކުދި ދާއިރާތަކުން މަޖިލީހުގައި މެމްބަރުން ތިއްބަވަނީ," މި އިސްލާހު ހުށަހަޅުއްވަމުން އިލްޔާސް ވިދާޅުވި އެވެ.
މި ހުށަހެޅުމާ އެކު އިންތިހާބާ ބެހޭ ގާނޫނަށް ވެސް ބަދަލުތަކެއް ގެންނަން ޖެހޭ ކަމަށާއި އެ އިސްލާހުތައް ވެސް މަޖލީހަށް ވައްދާނެ ކަމަށް އިލްޔާސް މިއަދު ވިދާޅުވި އެވެ.
ހަމައެހެންމެ, މަޖިލީހުގައި އަންހެނުންނާއި، ނުކުޅެދުންތެރިކަން ހުރި ފަރާތްތައް ތަމްސީލުކުރެވޭ މިންވަރު އިތުރުކުރުން ވެސް އިސްލާހު ހުށަހެޅި ސަބަބެއްގެ ގޮތުގައި އިލްޔާސް ފާހަގަކުރެއްވި އެވެ.
އަންހެން މެމްބަރުންނަށް ޚާއްސަކުރެވިފައިވާ ގޮޑިތަކެއް ކަނޑައެޅުމަށްޓަކައި، ރައްޔިތުންގެ މަޖިލީހުގެ މެމްބަރުންގެ އަދަދު ކަނޑައެޅުމަށް މިހާރު ޤާނޫނުއަސާސީގައި ބަޔާންކޮށްފައިވާ އުސޫލު ބަދަލުކުރުން ކަމަށް ވެސް ބަޔާންކޮށްފައިވެ އެވެ.
