ނައިޖާގައި އަަސްކަރީ ބަގާވާތެއް ހިންގައި ރައީސް މުހައްމަދު ބަޒޫމް ވެރިކަމުން ދުރުކުރުމަށް ފަހު، ސަރުކާރުގައި އޮތް ޕާޓީގެ މައި އޮފީހުގައި ހުޅުޖަހައިފި އެވެ.
ބަގާވާތަށް ތާއީދުކުރުމުގެ ގޮތުން މަގުތަކަށް އެއްވި މީހުން ހުޅުޖެހުމުގެ އިތުރުން ކާރުތަކަށް ގާ އުކައި ގެއްލުންދީ ހެދި އެވެ. އެ މީހުން ތިބީ ރަޝިއާގެ ދިދަތައް ހިފައިގެންނެވެ.
މިދިޔަ ބުދަ ދުވަހު ރައީސް ބަޒޫމް ހައްޔަރު ކުރި އިރު، އެކަން ހިންގި ކޮމާންޑަރުންނަށް ސިފައިން ތާއީދު ކުރާ ކަމަށް ބުނީ ބުރާސްފަތި ދުވަހު އެވެ.
އދ. އާއި ގިނަ ގައުމުތަކުން ބަޒޫމް މިނިވަން ކުރުމަށް ގޮވާލި އިރު، ރަޝިއާއިން ވެސް ވަނީ އޭނާ މިނިވަން ކުރުމަށް ގޮވާލައިފަ އެވެ.
އުމުރުން 64 އަހަރުގެ ބަޒޫމް އިންތިހާބުވީ މީގެ ދެ އަހަރު ކުރިންނެވެ. އޭނާއަކީ ހުޅަނގުގެ ގައުމުތަކާ ގުޅުން ރަނގަޅު ލީޑަރެކެވެ.
ޔުރޭނިއަމްގެ މުއްސަނދިކަން ލިބިފައިވާ ނައިޖާގައި އެމެރިކާ އާއި ފްރާންސްގެ އަސްކަރީ މަރުކަޒު ހުރެ އެވެ. އެ ދެ ގައުމުން ވެސް ވަނީ ބަގާވާތް ކުށްވެރިކޮށްފަ އެވެ.
ބަގާވާތް ކުރި ކޮމާންޑަރުން ރަސްމީކޮށް އެއްވެސް އެއްޗެއް ނުބުނާތީ، މިހާރު އެ ގައުމުގެ ބާރުތައް އޮތީ ކާކުގެ އަތުގައި ކަމެއް ސާފެއް ނޫނެވެ.
