ރައީސް އިބްރާހިމް މުހައްމަދު ސޯލިހު ދެވަނަ ދައުރަކަށް ހޮވުނަ ނުދިނުމަށް، ވާދަވެރި ސިޔާސީ ޕާޓީތަކަށް އެއްބަސްވެވޭ އެއް ކެންޑިޑޭޓަކު ހޯދައި އެ ކެންޑިޑޭޓަކު ނެރުމުގެ މަޝްވަރާތައް ކުރިއަށް ދާނެ ކަމަށް، އެ މަޝްވަރާތަކުގައި ދަ ޑިމޮކްރެޓްސްގެ ފަރާތުން އިސްކޮށް ހުންނެވި އަލީ އާޒިމް ވިދާޅުވެއްޖެ އެވެ.
އިދިކޮޅު އެންމެ ބޮޑު ޕާޓީ، ޕީޕީއެމާއެކު ޑިމޮކްރެޓްސް އިން ކުރަމުން ދިޔަ މަޝްވަރާތައް ހުއްޓިފައިވާ ކަމަށް ޕީޕީއެމް/ޕީއެންސީގެ ކޯލިޝަން ހިންގެވުމާ ހަވާލުވެ ހުންނެވި، ޕީއެންސީގެ ރައީސް އަބްދުއްރަހީމް އަބްދުﷲ "އަދަދު" ނޫހަށް އިއްޔެ ވިދާޅުވި އެވެ.
އެއް ކެންޑިޑޭޓުގެ މަޝްވަރާތަކާ ގުޅޭ ގޮތުން ސުވާލުކުރުމުން ޑިމޮކްރެޓްސްގެ އިންތިގާލީ ޗެއާޕާސަން ހަސަން ލަތީފު "އަދަދު" ނޫހަށް ވިދާޅުވީ، އެހެން ޕާޓީތަކާ ދެމެދު އެ ޕާޓީން ކުރަމުން އަންނަ މަޝްވަރާތަކުގައި އިސްކޮށް ހުންނަވަނީ ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރު އަލީ އާޒިމް ކަމަށެވެ.
އަލީ އާޒިމްއާ އެ ސުވާލު ކުރުމުން އޭނާ ފުރަތަމަ ވެސް ވިދާޅުވީ "ދެ ފަރާތެއްގެ ދެމެދު މަޝްވަރާތަކެއް ދަނިކޮށް، އެއިން އެއް ފަރާތުން މަޝްވަރާ ހުއްޓާލުމުން ދެން މަޝްވަރާތަކެއް ކުރިއަށް ނުދާނެ ނޫންތޯ،" ކަމަށެވެ.
އެހެން ވިދާޅުވުމަށް ފަހު އާޒިމް ދެން ފާހަގަ ކުރެއްވި ކަމަކީ މަޝްވަރާތައް ހުއްޓާލިކަން ޕީޕީއެމް/ޕީއެންސީގެ ކޯލިޝަނުން ރަސްމީކޮށް އެ ޕާޓީއާ ހިއްސާ ނުކުރާ ކަމެވެ. އަދި އެފަދަ ވިސްނުމެއްގައި އެ ކޯލިޝަން އޮތް ނަމަ ރަސްމީ ނޫސް ބަޔާނެއް ވެސް ނެރޭނެ ކަމަށް އާޒިމް ގަބޫލުކުރައްވަ އެވެ.
"އަޅުގަނޑު ގަބޫލުކުރަނީ މަޝްވަރާތައް ހުއްޓާލަން ޕީޕީއެމް ޕީއެންސީން ނިންމާފައި އޮތިއްޔާ އެ ކަމަށް ނޫސް ބަޔާނެއް ނެރޭނެ، އަދި ރަސްމީކޮށް އަޅުގަނޑުމެންނަށް ވެސް އެ ކަން ހިއްސާ ކުރާނެ،" ޑިމޮކްރެޓްސް އުފައްދަން ނިންމި ދުވަހު، ވެރިކަން ކުރާ އެމްޑީޕީން އެންމެ ފުރަތަމަ ވަކިކުރި މެންބަރު އާޒިމް ވިދާޅުވި އެވެ.
އެއް ކެންޑިޑޭޓުގެ މަޝްވަރާތައް ޕީޕީއެމްގެ އިތުރަށް އެމްއެންޕީއާއި ޖުމްހޫރީ ޕާޓީއާއި އެމްއާރުއެމްއާ ދެމެދު ކުރިއަށް ގެންދާނެތޯ ސުވާލުކުރުމުން އޭނާ ވިދާޅުވީ ރައީސް ސޯލިހުގެ ސަރުކާރުން ގޯހަކަށް ފަހު ގޯހެއް ހަދަމުންދާއިރު ސިޔާސީ ޕާޓީތަކުން އެ ކަމަށް ވިސްނައި އޭގެ މަޝްވަރާތައް ކުރާނެ ކަމަށެވެ.
"އަޅުގަނޑުމެންނަށް އެބަ ފެނޭ ރައީސް ސޯލިހުގެ ސަރުކާރުން ހަދާ ގޯސްތައް، ގޯހަކަށް ފަހު އެތައް ގޯހެއް އެބަ ހަދާ، އެހެންވީމަ [އެއް ކެންޑިޑޭޓު] މަޝްވަރާތައް ކުރިއަށް ގެންދާނެ، އެ ގޮތަށް މި ތިބީ،" އާޒިމް ވިދާޅުވި އެވެ.
އެއް ކެންޑިޑޭޓުގެ މަޝްވަރާ ގެންދަން ޖެހޭ ކަމަށް ވިދާޅުވުމަށް ފަހު އާޒިމް ވަނީ އެ ޕާޓީން މާދަމާ ރިޔާސީ ޕްރައިމަރީއެއް ބާއްވައި ކެންޑިޑޭޓަކު ކަނޑައަޅާ ހަމައަށް ގޮސްފައި އޮތް ކަން ވެސް ފާހަގަ ކުރައްވައިފަ އެވެ. އެ ޕްރައިމަރީގައި ވާދަކުރައްވަނީ ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބެވެ.
އެއް ކެންޑިޑޭޓަކު ނެރުމުގެ މަސައްކަތުގެ ފަސްފަަހަތް؛
ރިޔާސީ އިންތިހާބުގައި 'ކޮމަން' ކެންޑިޑޭޓަކު ނެރުމުގެ ހިޔާލު ފުރަތަމަ ހުށަހެޅުއްވީ ވެސް ދަ ޑިމޮކްރެޓްސްގެ އުފެއްދުމުގެ އެއް ބާނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. ނަޝީދު ހުށަހެޅުއްވީ، އެމަނިކުފާނާއި ޕީޕީއެމްގެ ރިޔާސީ ކެންޑިޑޭޓު، ކުރީގެ ރައީސް އަބްދުﷲ ޔާމީން ނޫން ކެންޑިޑޭޓެއް ދެއްކުމެވެ.
އެއަށްފަހު މި މަހު 19 ގައި އެމަނިކުފާނާއި، ޖޭޕީގެ ރިޔާސީ ކެންޑިޑޭޓު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު ގާސިމް އިބްރާހިމާއި އެމްއެންޕީގެ ރިޔާސީ ކެންޑިޑޭޓު އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް ވަނީ ބައްދަލުކުރައްވައިފަ އެވެ.
އެ ބައްދަލުކުރެއްވުމުގައި ނިންމެވި ކަމަކީ ޕީޕީއެމުން ރުހޭނަމަ އެއް ކެންޑިޑޭޓަކު ނެރުމަށް އެ ތިން ޕާޓީއަށް އެއްބަސްވެވޭ ކަމެވެ.
"އަޅުގަނޑުމެން އަދި ޕީޕީއެމާއި އެމްއާރުއެމް ވެސް ވާހަކަ ދައްކާނަން، މި ކަމަށް އެއްބަސްވެވޭތޯ، އަޅުގަނޑުމެން ތިން ޕާޓީން ބޭނުންވަނީ އެއް ކެންޑިޑޭޓަކު ނެރެން މި ރިޔާސީ އިންތިހާބަށް،" ރައްޔިތުންގެ މަޖިލިހުގެ މާމިގިލި ދާއިރާގެ މެންބަރު، ވިލާ ގްރޫޕުގެ ވެރިޔާ ގާސިމް ވިދާޅުވި އެވެ.
އެ ދައުވަތަށް ޕީޕީއެމުން ދިން ޖަވާބަކީ، އެ ޕާޓީގެ ކެންޑިޑޭޓު ޔާމީނަކީ އެއް ކެންޑިޑޭޓު ކަމަށް ނިންމުމަށެވެ. ޔާމީން 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާއިރު، އެ ހުކުމް ދެމިއޮތްހައި ހިނދަކު އެމަނިކުފާނުގެ ކެންޑިޑެސީ ބަލައިނުގަންނާނެ ކަން އިލެކްޝަންސް ކޮމިޝަނުން ވަނީ ކުރިން ބުނެފަ އެވެ.
ޑިމޮކްރެޓުންގެ ޕްރައިމަރީގައި ވާދަކުރާ އިލްޔާސްގެ އިތުރުން އެމްއެންޕީގެ ރިޔާސީ ކެންޑިޑޭޓު އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް މި ފަހުން "އަދަދު" ނޫހުގެ "އެތެރެފުށް" ޕްރޮގްރާމްގައި ވިދާޅުވީ ޕީޕީއެމްގެ ފަހަތަށް އަރަން ބޭނުން ނުވާ ކަމަށެވެ.
