އެމްޑީޕީގެ ކުރީގެ ރައީސް, މުހައްމަދު ނަޝީދަށް, ރައީސް އިބްރާހިމް މުހައްމަދު ސޯލިހު މިއަދު ނުސީދާކޮށް ބަހުގެ ހަމަލާތައް އަމާޒުކުރައްވައިފި އެވެ.
ރިޔާސީ އިންތިހާބުގެ ކެމްޕޭނުގައި ހއ. ހޯރަފުއްޓަށް ވަޑައިގެން ބޭއްވެވި ބަނދަރު ޖަލްސާގައި ރައީސް އާކުރެއްވީ ކޮވިޑް-19 ގެ ބަލިމަޑުކަމާ ހެދި ރާއްޖޭގެ ބޯޑަރު ބަންދުކުރި ދުވަސްވަރުގެ ހަނދާނެވެ. އޭރު ބައެއް ލީޑަރުން ސަރުކާރަށް ޖެއްސުންކުރެއްވި ކަމަށް ވިދާޅުވެ، ކޮވިޑް ތެރޭގައި ނަޝީދު ދެއްކެވި ވާހަކަފުޅުތައް އެމަނިކުފާނު ގެންނެވި އެވެ. އެއާ އެކު ރައީސް ވިދާޅުވީ ހަމައެކަނި މާދަމާ ފެންނަ މީހަކަށް ވެރިކަމެއް ނުކުރެވޭނެ ކަމަށެވެ.
"ހަމައެކަނި މާދަމާ ފެންނަ މީހަކަށް ވެރިކަމެއް ނުކުރެވޭނެ. އެދުވަހު ރިސޯޓުތަކުގެ ބަދިގެތައް މަސް ކައްކާ ތަންތަނަށް ހެދިނަމަ ދެން ކިހިނެތްތޯ ވާނީ, މިއީ ފިތުނަ އާއި ފަސާދައާއި ދެކޮޅުވެރިކަން ދައްކަންވެގެން އައި ވާހަކަތައް." ވަކި ބޭފުޅެއްގެ ނަން ނުގެންނަވައި ރައީސް ސޯލިހު ވިދާޅުވި އެވެ.
އެމަނިކުފާނު ވިދާޅުވީ މި ވެރިކަމުގައި ތަރައްގީ ގެނެވެނީ, ތަސައްވަރެއް އަމާޒެއް އަދި ޕްލޭނެއް އޮވެގެން ކަންތައް ކުރާތީ ކަމަށެވެ.
ރައީސް ސިފަކުރެއްވި ގޮތުގައި ކޮވިޑް ދުވަސްވަރު ސަރުކާރުން އެޅި ފިޔަވަޅުތަކާ ގުޅުވައި ނަޝީދު އޭރު ދެއްކެވި ވާހަކަފުޅުތަކަކީ އުއްްމީދެއް ނެތިގެން ދެއްކެވި ވާހަކަފުޅުތަކެކެވެ.
"އުއްމީދެއް ނެތް ކަމަށް ދެކި, އަޅުގަނޑުމެން ނެތިދަނީ ކަމަށް ދެކި ވާހަކަތައް ދައްކަމުން ދިޔައީ. ބައެއް ސިޔާސީ ލީޑަރުން ނިކުމެވަޑައިގެން ވިދާޅުވީ ރިސޯޓުތަކުގައި ދެންވީ މަސް ކައްކަންށޭ. ރިސޯޓުތަކުގައި ވީ ދަނޑުވެރިކަމޭ ކުރަން. މި ރާއްޖޭގެ ޓޫރިޒަމެއް ހަލާކުވެ ދިޔައިއްޔޭ މި. ދެނެއް މި ރާއްޖެއަށް އަންނާނެ ޓޫރިސްޓަކު ނުވާނޭ" އެމަނިކުފާނު ވިދާޅުވި އެވެ.
ރާއްޖޭގެ ފަތުރުވެރިކަން ނެތިދާނެ ކަމަށް ދެއްކެވި ވާހަކަތަކަށް ރައްދު ދެއްވައި ރައީސް ވިދޅާުވީ 2028 ވަނަ އަހަރާ ހަމައަށް ރާއްޖެއަށް ތިން މިލިއަނަށްވުރެ ގިނަ ފަތުރުވެރިން ދައްޗެއް ނުވެ އަންނާނެ ކަމަށެވެ. އަދި ރާއްޖޭގެ އިގްތިސޯދު ދެގުނަ ވާނެ ކަމަށް ވިދާޅުވަމުން އަންނަވީ އެ އަންދާޒާއާއެކު ކަމަށް ރައީސް ވިދާޅުވި އެވެ.
އެ މޭރުމުން ވާހަކަދައްކަވަމުން ރައީސް ވަނީ މިއަހަރު ރާއްޖެއަށް 1.9 މިލިއަން ފަތުރުވެރިން އަންނާނެ ކަމަށް ވިދާޅުވެފަ އެވެ. އެގޮތުން މިއަހަރު މިހާތަނަށް ރާއްޖެ އައި ފަތުރުވެރިންގެ އަދަދު ވަނީ އެއް މިލިއަނަށް އަރާފަ އެވެ.
ރައީސްގެ ބަހުގެ ހަމަލާ ނަޝީދަށް އަމާޒުކުރެއްވިއިރު, މިދިޔަ ހޯމަ ދުވަހު ވާވު އަތޮޅުގެ ކެމްޕޭން ނިންމަވާލެއްވުމަށްފަހު ނޫސްވެރިންނާ ބައްދަލުކުރައްވާ އެމަނިކުފާނު ވަނީ, ނަޝީދު ނިސްބަތްވާ ޑިމޮކްރެޓްސްއަކީ ޗެލެންޖެއް ނޫން ކަމަށް ވިދާޅުވެފަ އެވެ.
"ތިޔަ ބޭފުޅުންނަށް ފެނިވަޑައިގަންނަވާނެ ޕާޓީ އެތެރޭގެ ޕްރައިމަރީގެ ނަތީޖާ. އަޅުގަނޑަށް ގަބޫލުކުރެވޭ ގޮތުގައި ކުރިއަށް މިއޮތް ރިޔާސީ އިންތިހާބުގައި ވެސް ވާދަވެރި ދެ ޕާޓީއަކަށް ވެެގެންދާނީ އެމްޑީޕީއާ ޕީޕީއެމް. އެއަކަށް ތަފާތެއް އައިސްފައި އޮތް ތަނެއް އަޅުގަނޑަކަށް ނުފެނޭ،" ރައީސް ވިދާޅުވި އެވެ.
ރައީސް ވިދާޅުވީ ނަޝީދު ވާދަކުރެެއްވިޔަސް، އެމްޑީޕީގެ ޕްރައިމަރީގައި ހޯއްދެވި ފަދަ ކާމިޔާބީއެއް ހޯއްދަވާނެ ކަމަށެވެ.
