ވެރިކަމުގެ ދަހިވެތިކަމުގައި ކޮންމެ ކަމެއް ކުރާން ވެސް އެއްބަސްވެވޭ ގޮތަށް ހިންގޭ އެއްވެސް ސިޔާސީ ހަރަކާތެއްގައި ބައިވެރިވެވަޑައިނުގަންނަވާނެ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.
ނަޝީދު އިސްވެގެން އުފައްދަވާފައިވާ ދަ ޑިމޮކްރެޓްސްގެ "ފަސޭހަ ވިޔަފާރި ސިޔާސަތު" ލޯންޗު ކުރުމަށް ބ. ތުޅާދޫގައި ކުރިއަށްދިޔަ އިވެންޓްގައި އެމަނިކުފާނު ވިދާޅުވީ އުމްރާނީ ތަރައްގީގެ މަސައްކަތްތައް މިދިޔަ 10 އަހަރު ވެސް ފެނިގެން ދިޔައީ ވޯޓަށް ޓަކައި ކުރެވުނު މަސައްކަތެއްގެ ގޮތުގައި ކަމަށެވެ.
"އެއިން ކޮންމެ މަސައްކަތެއް ވެސް ފަށާނީ ކޮން ދުވަހެއް ކަން އެނގި، އެ ކަމަށް ހުރި ވަސީލަތްތައް ޔަގީންކޮށް، އެ ނިންމޭނެ ދުވަހެއް އަންދާޒާކޮށް ނިމި ދެން ކުރިއަށް ގެންދާނީ،" ޑިމޮކްރެޓްސްގެ ސަރުކާރެއްގައި އެ ކަން ބަދަލުކޮށްދިނުމުގެ ވައުދުވެވަޑައިގަންނަވަމުން ވިދާޅުވި އެވެ.
ނަޝީދު ވަކިވެވަޑައިގެންނެވި އެމްޑީޕީގެ ރިޔާސީ ޓިކެޓުގައި މި ފަހަރުގެ ރިޔާސީ އިންތިހާބުގައި ވާދަކުރައްވާ ރައީސް އިބްރާހީމް މުހައްމަދު ސޯލިހަށް މިރޭ ވެސް ވަރަށް ބޮޑަށް ފާޑުވިދާޅުވި އެވެ. ވިދާޅުވީ، ދެވަނަ ދައުރެއްގެ ބޭނުމުގައި ބައެއް ޕާޓީތަކުން ކެމްޕޭން ކުރާތީ ވަރަށް ބޮޑަށް ކަންބޮޑުވެވަޑައިގަންނަވާ ކަމަށެވެ.
"އެއީއެއް ނޫން، އަޅުގަނޑުމެންގެ އަމާޒަކަށް ވާންވީއެއް، މަސައްކަތަކަށް ވާންވީއެއް، އަޅުގަނޑުމެން ކުރަންވީ ކަމަކީ، ރައްޔިތުންގެ ދިރިއުޅުން އާރާސްތު ކުރުމަށް މި މަސައްކަތް ކުރަން ވާނީ،" ނަޝީދު ވިދާޅުވި އެވެ.
ވެރިކަމުގެ ދަހިވެތިކަން އޮތުމުން ސަރުކާރުން ދޫކުރާ ލޯނަކީ ވެސް ސަރުކާރު ކޮޅަށް މީހުން ލަންބާފައި ބޭއްވުމުގެ ވަސީލަތަކަށް ހަދާފައިވާ ކަމަށް ވެސް އެމަނިކުފާނު ތުހުމަތު ކުރެއްވި އެވެ.
"ވެރިކަމަށް ޓަކައި ކުރާ އެއްވެސް ކަމެއްގައި ބައިވެރިއެއް ނުވެވޭނެ، އެއްވެސް މީހަކު ތާއަބަދު ބޭނުންވާ ކަމަކީ ވެރިކަން ކަމަށް ވަންޏާ، އަޅުގަނޑުމެން އެކަކަށް ވެސް ރަނގަޅު ގޮތެއް ނޫން،" ރާއްޖޭގެ ވެރިކަން ތިން އަހަރެއްހާ ދުވަހު ކުރެއްވި ނަޝީދު ވިދާޅުވި އެވެ.
ރާއްޖޭގައި ވެރިކަން ކުރުމުގެ ސަގާފަތް މިދިޔަ 15 އަހަރު އޮތް ގޮތަށް އިޝާރާތް ކުރައްވައި ނަޝީދު ވިދާޅުވީ ސަރުކާރު ހިންގެން އޮތީ ރައްޔިތުންގެ މަޖިލިހުގެ ރުހުން އޮވެގެނެވެ. ޚުދު އެމަނިކުފާނަށް ވެސް މަޖިލިހުގެ މެންބަރުންނާ ގާތް ގުޅުމެއް ބާއްވަން ޖެހިފައި އޮތް ކަމަށް ވިދާޅުވި އެވެ.
"މަޖިލިހުގެ ރުހުން ނެތި ސަރުކާރު ހިންގޭކަށެއް ނޯވޭ، ދެން އެ ރުހުން ހޯދަން މި ޖެހެނީ، ވަރަށް ނުރަނގަޅު އެތައް ކަމެއް ކޮށްގެން، މެންބަރުންނަށް ޕްރޮޖެކްޓްތައްދީ، ރައީސުލްޖުމްހޫރިއްޔާއަށް މަޖިލިސް ކޮންޓްރޯލް ކުރައްވަން ޖެހުމުން އެއީ ބޮޑު ގޯހެއް،" ނަޝީދު ވިދާޅުވި އެވެ.
ޑިމޮކްރެޓްސް އިން މިރޭ ތައާރަފުކުރި "ފަސޭހަ ވިޔަފާރި" ސިޔާސަތާ ގުޅޭ ގޮތުން ވާހަކަ ދައްކަވަމުން ވިދާޅުވީ ތުޅާދޫގެ އަމާޒަކަށް ވާންވީ ކަމަކީ އެ ރަށަށް އެތެރެވާ މުދަލަށް ވުރެ ބޭރު ކުރެވޭ މުދާ އިތުރުކޮށް، އާމްދަނީ ލިބޭނެ ރަށެއް ގޮތުގައި އޮތުމެވެ.
"ހަމައެކަނި މާލޭގައި ވަޒީފާ އަދާކުރާ މީހަކު ފޮނުވާ ފައިސާއިން، ރިސޯޓެއްގައި މަސައްކަތް ކުރާ މީހަކު ފޮނުވާ ފައިސާއިން ރަށްރަށެއް ނުދިރޭނެ،" ނަޝީދު ވިދާޅުވި އެވެ.
ނަޝީދުގެ ވެރިކަމުގައި ޓެކްސް ނިޒާމު ތައާރަފުކުރި ފަހުން ވޭތުވެދިޔަ 15 އަހަރު ދުވަހުގެ ތެރޭގައި ދައުލަތުގެ އާމްދަނީ ދެގުނަވީ ނަމަވެސް އާންމު ރައްޔިތުންގެ އާމްދަނީއަށް ކުރިއެރުމެއް ލިބިފައިނުވާ ކަމަށް އެމަނިކުފާނު ވިދާޅުވަމުން ގެންދަވާ ވާހަކަތައް މިރޭ ވެސް ހިއްސާ ކުރެއްވި އެވެ.
