ރައީސް އިބްރާހިމް މުހައްމަދު ސޯލިހު ރަށްރަށަށް ވަޑައިގެންނެވުމުން ގާނޫނީ އިމުގެ ބޭރުން މުޒާހަރާ ކުރާ މީހުންނާ ދެކޮޅަށް ފިޔަވަޅު އަޅާނެ ކަމަށް ދޭހަވާ މޭރުމަކުން ހޯމް މިނިސްޓަރު އަބްދުالله އިމްރާން ވާހަކަދެއްކެވުމުން ދަނޑިމޮކްރެޓްސްއިން އެކަން ކުށްވެރިކޮށްފި އެވެ.
ރައީސްގެ ރިޔާސީ ކެމްޕެއިން ދަތުރުފުޅުތަކުގައި ރަށްރަށަށް ވަޑައިގެންނެވުމުން އިދިކޮޅު ޕާޓީތަކުގެ ސަޕޯޓަރުން ދަނީ އެމަނިކުފާނާ ދެކޮޅަށް އަޑުއުފުލައި, މުޒާހަރާ ކުރަމުންނެވެ. އެކަމާ ގުޅިގެން އިމްރާން ވަނީ, ޑިމޮކްރެޓްސް އަދި ޕީޕީއެމްގެ ވިޔަސް ސަޕޯޓަރުން ނިކުމެ "އެ ސަކަރާތް" ނުޖެހުމަށް ގޮވާލައްވާފަ އެވެ.
"ޑިމޮކްރެޓްސް ބޭފުޅުން ކަމަށް ވިޔަސް، ޕީޕީއެމް ބޭފުޅުން ކަމަށް ވިޔަސް އެނޫން ޕާޓީއެއްގެ ބޭފުޅުން ކަމަށް ވިޔަސް އަޅުގަނޑުމެން ރަށްރަށަށް އަރާއިރުގައި ތި ސަކަރާތް ޖަހަން ދެން ނުހަދާ. ހުރިހާ ރަށަކުން. ތި ސަކަރާތް ޖަހަން ހައްދަވައިފިއްޔާ އަޅުގަނޑުމެން މާ ވަރުގަދަވާނެ،" އިމްރާން ވިދާޅުވި އެވެ.
އެކަމާ, ޑިމޮކްރެޓްސްގެ މުއައްސިސް ހަސަން ލަތީފް ވަނީ ނުރުހުން ފާޅުކުރައްވާފަ އެވެ. އެގޮތުން, މި ސަރުކާރުން ހިޔާލުފާޅުކުރުމާއި އެއްވެ އުޅުމުގެ މިނިވަންކަން ހިފަައްޓަން އުޅޭ ކަމުގެ ތުހުމަތު އޭނާ ކުރެއްވި އެވެ.
"ސަރުކާރުގެ ކޮރަޕްޝަނާއި, ވައްކަމާއި, ރިޝްވަތު އާންމުކޮށް, ހިއުމަން ޓްރެފިކާއި ޑްރަގް ޓްރެފިކްގެ މައްސަލަތައް އޮއްބާލައި, ރާާއްޖޭގެ ކަނޑުވިއްކާލުމަށްފަހު ރ.ސޯލިހު މިހާރު ތިޔަ ނުކުންނެވީ ހިޔާލުފާޅުކުރުމާއި އެއްވެ އުޅުމުގެ މިނިވަންކަން ހިފަހައްޓާންތޯ؟" އިމްރާނަށް ރައްދު ދެއްވައި, ނުރުހުން ފާޅުކުރައްވަމުން ހަސަން ލަތީފް ޓުވީޓް ކުރެއްވި އެވެ.
ރައީސް ސޯލިހު މ. އަތޮޅުގެ ރަށްތަކަށް ކުރައްވާ ކެމްޕެއިން ދަތުރުގައި އިއްޔެ ހަވީރު ދިއްގަރަށް ވަޑައިގެންނެވި ވަގުތު 14 ވަރަކަށް މީހުން ރައީސާ ދެކޮޅަށް އަޑުއުފުލި އެވެ. އެ މީހުންގެ ތެރެއިން ދެ މީހަކު ހައްޔަރުކޮށްފައިވާ ކަމަށް "އަދަދު" ނޫހަށް ވަނީ އެނގިފަ އެވެ.
ދިއްގަރުގެ އިތުރުން ރައީސް ސޯލިހު ވަޑައިގެންނެވި ބައެއް ރަށްރަށުން އެ މަނިކުފާނާ ދެކޮޅަށް މަދު ބަޔަކު ނުކުމެ އަޑުއުފުލި އެވެ. ނަމަވެސް ކުރިން އެއްވެސް މީހަކު ހައްޔަރެއް ނުކުރެ އެވެ.
ދިއްގަރުގައި ރޭ ބޭއްވި ޖަލްސާގައި އިމްރާން ވިދާޅުވީ މިއަދު ހަވީރު އެ ރަށުގައި ކުރި މުޒާހަރާއަކީ ދެހާހުގެ ކުރީކޮޅު ފެނުނު ފަދަ މަންޒަރެއް ކަމަށެވެ. އޭރު ސިޔާސީ ހަރަކާތްތަކުގައި ގަޔަތް ބޮލަށް އަތްލައި، ވެލި އުކައި ފެންޖަހައި ހެދި ކަމަށާއި އެކަން މާޒީވެ ގޮސްފައިވާ ކަމަށް އޭނާ ވިދާޅުވި އެވެ. އެކަން އެގޮތަށް ކުރާން ޖާގަ ނުދޭނެ ކަމަށް ވިދާޅުވި އެވެ.
"މިއަދު އެކަން ނިންމާލައްވާ. ހުރިހާ ބޭފުޅުން ނިންމާލައްވާ. ހުރިހާ ޕާޓީތަކުން ނިންމާލައްވާ. އެކަން އެގޮތަށް ކުރަން ބޭނުން ނަމަ ދެން ވެސް އެކަން ކުރަން މާ މޮޅު ޓީމެއް ރައީސާއެކު އެބަ އޮތް. އަޅުގަނޑުމެން މާ ބާރަށް މުޒާހަރާ ކުރާނަން އިނގޭތޯ. މާއަޑުގަދަ ވާނެ، މުޒާހަރާ ކުރާނެ،" އޭނާ ވިދާޅުވި އެވެ.
ސިޔާސީ ފަރާތްތަކުންނާއި ޕާޓީތަކުން ވެސް އެފަދަ ނާތަހުޒީބު އަމަލުތައް ހުއްޓާލަން އިމްރާން ގޮވާލެއްވުމަށް ފަހު ވިދާޅުވީ އެކަން އެގޮތަށް ކުރަން ބޭނުންވާނަމަ ރައީސް ސޯލިހުގެ ޓީމް މާއަޑުގަދަވާނެ ކަމަށެވެ.
