ލަންޑަން (ޖުލައި 17) - މެންޗެސްޓާ ޔުނައިޓެޑްގެ ކެޕްޓަނެއްގައި ގޮތުގައި ފާއިތުވި ތިން އަހަރު ވެސް ހުރި ހެރީ މެގުއާ އަތުން އެ ޓީމުގެ ކެޕްޓަން ބޭންޑް އަތުލަައިފި އެވެ.
މެގުއާ، އޭނާގެ ސޯޝަލް މީޑިއާގައި މިރޭ އާންމުކޮށްފައިވާ މެސެޖެއްގައި ބުނެފައިވަނީ އެ ޓީމުގެ ކޯޗު އެރިކް ޓެން ހާގާއެކު ބޭއްވި ބައްދަލުވުމެއްގައި، އޭނާ އަތުން ކެޕްޓަން ބޭންޑް އަތުލަން ނިންމާފައިވާކަން ކޯޗު ޓެން ހާގް އަންގާފައިވާ ކަމަށެވެ.
"އަހަރެން ވަރަށް ދެރަވެއްޖެ. އެކަމަކު ކޯޗު ވަނީ އޭނާގެ ނިންމުމާ ގުޅޭ ސަބަބުތައް ކިޔައިދީފައި. ކޮންމެ ގޮތެއްވިޔަސް، ޔުނައިޓެޑްގެ ޖޯޒީގައި ކުޅޭ ކޮންމެ ފަހަރަކު އަހަރެން 100 ޕަސެންޓް ދޭނަން،" މެގުއާ ،30، ބުންޏެވެ.
މެގުއާ ބުނީ ޔުނައިޓެޑްގެ ކެޕްޓަން ބޭންޑް އަޅާލުމުގެ ފުރުސަތު ލިބުމަކީ ވަރަށް ބޮޑު ޝަރަފެއް ކަމަށެެވެ. އަދި ޔުނައިޓެޑަށް ކާމިޔާބު ހޯދައިދޭން އޭނާ އަށް ކުރެވުނު ހުރިހާ މަސައްކަތްކުރި ކަމަށެވެ.
ޔުނައިޓެޑްގެ ކޯޗު ޓެން ހާގްގެ އިރުޝާދުގެ ދަށުން މިދިޔަ ސީޒަންގެ ޕްރިމިއާ ލީގުގައި ޓީމުގެ ފުރަތަމަ 11 ގައި މެގުއާ ހިމެނުނީ އެންމެ 8 މެޗުގައެވެ.
ލެސްޓާ ސިޓީން 80 މިލިއަން ޕައުންޑްގެ ޓްރާންސްފާ ފީއެއްގައި ޔުނައިޓެޑަށް ބަދަލުވި މެގުއާއާ ކެޕްޓަންކަން ހަވާލުކުރީ 2020 ވަނަ އަހަރެވެ.
ޔުނައިޓެޑްގެ އާ ކެޕްޓަން އަދި އިއުލާނެއް ނުކުރެ އެވެ. އެކަމަކު، ބެލެވޭ ގޮތުގައި ކެޕްޓަން ބޭންޑް ދޭނީ އެ ޓީމުގެ ޕޯޗުގަލް މިޑްފީލްޑަރު ބްރޫނޯ ފެނާންޑޭސް އަށެވެ.
