މެދުއިރުމައްޗަށް ފެއްޓެވި ތިން ދުވަހުގެ ދަތުރެއްގެ ތެރެއިން ޖަޕާނުގެ ބޮޑު ވަޒީރު ފުމިއޯ ކިޝީޑާ އާދީއްތަ ދުވަހު ސައުދީ އަރަބިއްޔާއަށް ވަޑައިގެންފި އެވެ.
ހަކަތަ އާއި ވިޔަފާރި ފަދަ ދާއިރާތަކުން ގުޅުން ވަރުގަދަކޮށް ޖަޕާނުގެ ކުންފުނިތަކަށް ފުރުސަތުތައް ފަހިކޮށްދިނުމަށް ކިޝީޑާ ވަނީ ސައުދީގެ އޮފިޝަލުންނާ މަޝްވަރާ ކުރައްވައިފަ އެވެ.
ސައުދީގެ ހަކަތައާ ބެހޭ މިނިސްޓަރު އަމީރު އަބްދުލް އަޒީޒް ބިން ސަލްމާން ވިދާޅުވީ ޖަޕާނުގެ އެންމެ މުހިއްމު ވިޔަފާރި ބައިވެރިޔާގެ ގޮތުގައި އޮތުމަށް ތެލުގެ ޔަގީންކަން ފޯރުކޮށްދޭ ކަމަށެވެ.
ޖަޕާނަށް އެންމެ ގިނައިން ތެޔޮ ފޯރުކޮށްދެނީ ސައުދީން ކަމަށާއި ޖަޕާނަށް ބޭނުންވާ ތެލުގެ 40 ޕަސެންޓު ލިބެނީ ސައުދީން ކަމަށް މިނިސްޓަރު ވިދާޅުވި އެވެ.
ސައުދީގެ އިންވެސްޓްމަންޓް މިނިސްޓަރު ހާލިދު އަލް ފާލިހް ވިދާޅުވީ ދެ ގައުމުގެ މެދުގައި އެކި ދާއިރާތަކުން ގުޅުން ބަދަަހިކުރުމުގެ 26 އެއްބަސްވުމުގައި ސޮއިކުރި ކަމަށެވެ.
ސައުދީއާ އެކު ތިން ވަނަ އަށް އެންމެ ގިނަ ވިޔަފާރި ކުރާ ގައުމަކީ ޖަޕާން ކަމަށާއި ސާފު ހަކަތައިގެ ދާއިރާއިން ގުޅުން ވަރުގަދަ ކުރުމުގެ މުހިއްމުކަން އޭނާ ފާހަގަކުރެއްވި އެވެ.
ޖަޕާނުގެ ބޮޑު ވަޒީރު ކިޝީޑާ ވިދާޅުވީ ސައުދީގެ 2030 ގެ ތަސައްވަރު ހާސިލްކުރުމަށް ހިންގާ ހުރިހާ ކަމެއްގައި ޖަޕާނުގެ ފުރިހަމަ އެއްބާރުލުން ލިބޭނެ ކަމަށެވެ.
މި ދަތުރުގައި ސައުދީގެ އިތުރުން ކިޝީޑާ ވަޑައިގަންނަވާނީ އަބޫ ދާބީ އަދި ގަތަރަށެވެ.
