ހޮލީވުޑްގެ އެތައް ހާސް އެކްޓަރުން މަަސައްކަތް ހުއްޓާލައި އިހްތިޖާޖު ކުރަން ފެށުމުން "އެވެޓާ" އަދި "ގްލޭޑިއޭޓާޒް" ފަދަ ބޮޑެތި ފިލްމުތަކުގެ މަސައްކަތަށް ހުރަސް އެޅޭނެ ކަމަށް ބެލެވިއްޖެ އެވެ.
އޭގެ އިތުރުން ފިލްމުތައް ޕްރޮމޯޓް ކުރަން ބާއްވާ ރެޑް ކާޕެޓް އިވެންޓުތައް ފަދަ ކަންކަމަށް ވެސް އަސަރު ކުރާނެ އެވެ. އެގޮތުން މި މަހު ފަހުކޮޅު ނެރެން ހަމަޖެހިފައިވާ ޑިޒްނީގެ "ހޯންޓަޑް މޭންޝަން" ގެ ޕްރޮމޯޝަނަށް ގެއްލުން ވާނެ އެވެ.
އެމީ އެވޯޑާއި ކޮމިކް ކޮން ފަދަ ކޮންމެ އަހަރަަކު އޮންނަ މުހިއްމު އިވެންޓުތައް ފަސްކުރަން ޖެހުން ވެސް އެކަަށީގެންވެ އެވެ.
މިއީ 60 އަހަރުގެ ތެރޭގައި ހޮލީވުޑްގެ މަސައްކަތް މިހާ ބޮޑަށް ހުއްޓުނު ފުރަތަމަ ފަހަރެވެ. ލޮސް އެންޖެލިސްގައި މިހާރު 160،000 އަށް ވުރެ ގިނަ އާޓިސްޓުން ދަނީ އިހްތިޖާޖްގައި ބައިވެރިވަމުންނެވެ.
ކެލިފޯނިއާގައި ހުންނަ ނެޓްފްލިކްސްގެ މައި އޮފީސް ކައިރިއަށް ބޯޑުތައް ހިފައިގެން ޖަމާވި އިރު، ޕެރެމައުންޓާއި ވޯނާ ބްރޯޒް އަދި ޑިޒްނީގެ އޮފީސްތައް ކައިރިއަށް ވެސް އެއްވެ އަޑުއުފުލާނެ އެވެ.
އެކްޓަރުން އިހްތިޖާޖް ފެށި އިރު، އޭގެ ކުރިން ހޮލީވުޑްގެ ލިޔުންތެރިން އިޖްތިޖާޖް ފެށި އެވެ. އެހެންވެ، އެމެރިކާގެ ފިލްމުތަކާއި ޓީވީ ޕްރޮޑަކްޝަންތައް ވަނީ ހުއްޓިފަ އެވެ.
އެކްޓަރުންގެ ޔޫނިއަން ސްކްރީން އެކްޓާޒް ގިލްޑް (އެސްއޭޖީ) އިން ޑިމާންޑް ކުރަނީ ސްޓްރީމިން ޕްލެޓްފޯމްތަކުން ފައިދާ ބެހުމުގައި މިހާރަށް ވުރެ އިންސާފުވެރިވުމަށާއި މަސައްކަތުގެ ހާލަތު ރަނގަޅު ކުރުމަށެވެ.
އޭގެ އިތުރުން އޭއައި އަދި ޑިޖިޓަލް ޓެކްނޮލޮޖީގެ އެހީގައި އެކްޓަރުން ރިޕްލޭސް ކުރުން ހުއްޓުވަން ވެސް ޑިމާންޑް ކުރެ އެވެ.
