ލުސޭން، ފީފާ (ޖުލައި 13) - މަޝްހޫރު ތަރި ކްރިސްޓިއާނޯ ރޮނާލްޑޯ ކުޅެމުން އަންނަ، ސައުދީ އަރަބިއްޔާގެ ޕްރޮފެޝަނަލް ލީގުގެ އަލް ނަސްރުުން ނުދައްކައި އޮތް ދަރަންޏެއް ސާބިތުވެ، އެ ކްލަބާ މެދު ދުނިޔޭގެ މައި ފުޓްބޯޅަ އިދާރާ ފީފާ އިން ފިޔަވަޅު އަޅައިފި އެވެ.
ފީފާގެ ތަރުޖަމާނު، އޭއެފްޕީ އަށް ދިން އިންޓަވިއުއެއްގައި ބުނެފައިވަނީ އަލް ނަސްރުން ނުދައްކައި އޮތް ދަރަންޏެއް ސާބިތުވުމާ އެކު، އެ ހަލާސްނުކޮށް ޓްރާންސްފާ މާކެޓްގައި އެ ކްލަބަށް އެއްވެސް އާ ކުޅުންތެރިއަކު ރަޖިސްޓްރީ ނުކުރެވޭނެ ކަމަށެވެ.
ދާދިފަހުން، އަލް ނަސްރުން ވަނީ އިންޓަ މިލާނަށް ކުޅެމުން އައި ކްރޮއޭޝިއާގެ މިޑްފީލްޑަރު، މާސެލޯ ބްރޮޒޮވިޗް ސޮއިކޮށްފަ އެވެ. ފީފާ އިން ބުނީ މި ޓްރާންސްފާ ރަސްމީކޮށް ރަޖިސްޓްރީ ކުރުމުގައި ވެސް ދަތިތަކެއް އެބަހުރި ކަމަށެެވެ.
އަލް ނަސްރަށް ފީފާ އިން ފިޔަވަޅު އަޅާފައިމިވަނީ އެ ޓީމަށް ކުޅުނު ނައިޖީރިއާގެ ފޯވާޑް އަހުމަދު މޫސާ އަށް ނުދީ ހުރި ފައިސާތަކެއްގެ މައްސަލަ ހައްލުނުކޮށް އޮތުމުންނެވެ. އެ ގޮތުން، މޫސާ އަށް ދޭން ޖެހޭ 514،000 ޑޮލަރު ދޭން، 2021 ވަނަ އަހަރުގެ އޮކްޓޫބަރު މަހު، ފީފާ އިން ވަނީ އަލް ނަސްރަށް އަންގައިފަ އެވެ. އެކަމަކު، އެ ގޮތަށް އަލް ނަސްރުން އަމަލުކޮށްފައިނުވާތީ، އެންމެ ފަހުން ފީފާ އިން ނިންމީ ފިޔަވަޅު އެޅުމަށެވެ. އަލް ނަސްރަށް، 2018 ވަނަ އަހަރު މޫސާ ބަދަލުވީ 20 މިލިއަން ޑޮލަރުގެ ފީ އަކަށެވެ. އެ ޓީމަށް ދެ އަހަރު ކުޅެދިނުމަށް ފަހު، މޫސާ ވަނީ ތުރުކީގެ ސިވާސްޕޯ އަށް ބަދަލުވެފަ އެވެ.
މޫސާ އަށް ދޭން ޖެހޭ ފައިސާ، 45 ދުވަހުގެ މުހުލަތެއްގެ ތެރޭގައި ނުދައްކައިފިނަމަ، ކުރިއަށް އޮތް ތިން ޓްރާންސްފާ މާކެޓްގައި ވެސް އަލް ނަސްރަށް ކުޅުންތެރިން ރަޖިސްޓްރީ ނުކުރެވޭނެ އެވެ.
އަލް ނަސްރުން ވަނީ މި އަހަރު ޖެނުއަރީ މަހު، ބޮޑު މުސާރަ ދޭ ގޮތަށް ރޮނާލްޑޯގެ ސޮއި ހޯދައިފަ އެވެ. ރިޕޯޓްތައް ބުނާގޮތުން ރޮނާލްޑޯ، އަލް ނަސްރަށް ސޮއިކުރި ކޮންޓްރެކްޓްގެ އަގަކީ ޖުމްލަ އެކު، ދެ އަހަރަށް 400 މިލިއަން ޑޮލަރު އެވެ.
