ލަންޑަން (ޖުލައި 13) - ދާދި ފަހުން އިނގިރޭސި މިޑްފީލްޑަރު، ސްޓީވެން ޖެރާޑް ހަވާލުވި، ސައުދީ އަރަބިއްޔާގެ ޕްރޮފެޝަނަލް ލީގު (ޕްރޯ ލީގު) ގެ ކްލަބް، އަލް އިއްތިފާގުން ލިވަޕޫލްގެ ކެޕްޓަން، ޖޯޑަން ހެންޑަސަން ގެންދަން ހުށަހަޅާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ހެންޑަސަން، 33، މި ވަގުތު ލިވަޕޫލްގައި ހުރި ކޮންޓްރެކްޓް ހަމަވާން ދެ އަހަރު އެބައޮތެވެ. އިނގިރޭސި މީޑިއާ ރިޕޯޓްތައް ބުނާގޮތުން ލިވަޕޫލުން މި ފަހަރުގެ ހޫނު މޫސުމުގެ ޓްރާންސްފާ މާކެޓްގައި ހެންޑަސަން ވިއްކާލުމުގެ ހާއްސަ ޝައުގުވެރިކަމެއް ނުގެންގުޅުނު ނަމަވެސް، ހެންޑަސަން ބޭނުންވެގެން އައިސް މަޝްވަރާ ކޮށްފިނަމަ އޭނާ އެދޭ ގޮތަށް ޑީލެއް މަޝްވަރާކުރަން އޮތީ ތައްޔާރަށެެވެ.
ސަންޑަލެންޑް ދޫކޮށް 24 މިލިއަން ޑޮލަރަށް، 2011 ވަނަ އަހަރު ލިވަޕޫލަށް ސޮއިކުރި ހެންޑަސަން، ލިވަޕޫލްގެ ކެޕްޓަންކަމާ ހަވާލުވީ 2015 ވަނަ އަހަރު ޖެރާޑް، އެ ކްލަބް ދޫކޮށްލުމުންނެވެ. ހެންޑަސަންގެ ކެޕްޓަންކަމުގައި ލިވަޕޫލުން ވަނީ ކްލަބް ލެވަލްގައި ހޯދޭނެ ހުރިހާ ޓްރޮފީއެއް ހާސިލްކޮށްފަ އެވެ.
ލިވަޕޫލަށް ކުޅެމުން އަންނަ ސްޕެއިންގެ މިޑްފީލްޑަރު، ތިއާގޯ އަލްކަންޓާރާ ހޯދަން ތުރުކީގެ ގަލަސަތަރާއި އިން މަސައްކަތް ކުރަމުން އަންނައިރު، ތިއާގޯ މި ވަގުތު އަންނަނީ ހެންޑަސަން އެކޭ އެއްގޮތަށް ލިވަޕޫލްގެ ޕްރީ ސީޒަނުގައި ބައިވެރިވަމުންނެވެ. ތިއާގޯ، ލިވަޕޫލާ އެކު ހުރީ މި ސީޒަނުގެ ނިޔަލަށް އޮތް ކޮންޓްރެކްޓެއްގަ އެވެ.
މި ފަހަރުގެ ޓްރާންސްފާ މާކެޓްގައި ލިވަޕޫލުން ވަނީ ބްރައިޓަން އަށް ކުޅެމުން އައި އާޖެންޓީނާގެ މިޑްފީލްޑަރު، އަލެކްސިސް މެކް އަލިސްޓާ އާއި އާރްބީ ލައިޕްޒިގުގައި މޮޅު ކުޅުމެއް ދެއްކި، ހަންގޭރީގެ ތަރި، ޑޮމިނިކް ސޮބޯސްލާއިގެ ސޮއި ހޯދައިފަ އެވެ.
ލިވަޕޫލުން އަންނަނީ މި ފަހަރުގެ ޓްރާންސްފާ މާކެޓްގައި އިތުރު ކުޅުންތެރިންގެ ސޮއި ހޯދަން ވެސް މަސައްކަތް ކުރަމުންނެވެ. އޭގެ ތެރޭގައި ޗެލްސީގެ ޒުވާން ޑިފެންޑަރު، ލެވީ ކޯލްވެލް ހިމެނެ އެވެ. އޭގެ އިތުރުން ފްރާންސްގެ ނީސް އަށް ކުޅޭ ޒުވާން މިޑްފީލްޑަރު ކެޕްރެން ތުރާމް އަށް ވެސް ލިވަޕޫލުން އަންނަނީ ފާރަލަމުންނެވެ.
