އާޓިފިޝަލް ބީޗުގައި އަންނަ ބުރާސްފަތި ދުވަހުގެ ރޭ ބާއްވާ ހާއްސަލަ ޖަލްސާއެއްގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ ޕާޓީއަށް ސޮއިކުރައްވާނެ ކަމަށް "ދަ ޑިމޮކްރެޓްސް" އިން މިރޭ އިއުލާނުކޮށްފި އެވެ.
ދަ ޑިމޮކްރެޓްސްއިން މިރޭ އިއުލާނުކޮށްފައިވާ ގޮތުގައި ނަޝީދު ޕާޓީއަށް ސޮއިކުރުމަށް ހަމަޖެހިފައި ވަނީ އަންނަ ބުރާސްފަތި ދުވަހުގެ ރޭ 8:30 ގައި ބާއްވާ ޖަލްސާއެއްގަ އެވެ.
އާޓިފިޝަލް ބީޗުގައި ބާއްވަން ހަމަޖެހިފައިވާ އެ ޖަލްސާއަށް ސޮއި ކުރި ހުރިހާ މެމްބަރުންނަށާއި ސޮއި ކުރަން ބޭނުންވާ އެންމެނަށް ޑިމޮކްރެޓްސްއިން ދައުވަތު ދިނެވެ.
ނަޝީދުގެ ގާތް ހުރިހާ މެމްބަރުންހެން މިހާރު ވަނީ ޑިމޮކްރެޓްސްއަށް ސޮއިކުރައްވައިފަ އެވެ. އަދި އެ ޕާޓީ އުފެއްދުމުގެ ޖަލްސާގައި ނަޝީދު ބައިވެރިވަޑައިގެންނެވި އެވެ.
ޑިމޮކްރެޓްސް އުފެއްދުމުގެ ހުއްދަ ދިނުމުން ޕާާޓީ އުފެއްދުމުގެ ޖަލްސާ ބޭއްވީ މި މަހުގެ ފަސް ވަނަ ދުވަހު އެވެ، އެ ޕާޓީގެ ފުރިހަމަ ނަން 'ދަ ޑިމޮކްރެެޓްސް'ގެ އިތުރުން ރަމްޒީ ނަމެއްގެ ގޮތުގައި އާއްމުކޮށް ކިޔާ ނަމެއްގެ ގޮތުގައި 'ޑިމޮކްރެޓްސް' ވެސް ފާސްކުރި އެވެ. އޭގެ އިތުރުން ލޯގޯ ވެސް ފާސް ކުރި އެވެ.
ޑިމޮކްރެޓްސްއިން ދަނީ އަންނަ ސެޕްޓެމްބަރު މަހު އޮންނަ ރިޔާސީ އިންތިހާބުގައި ވާދަކުރުމަށް ތައްޔާރުވަމުންނެވެ. އަދި "ރައީސް އިބްރާހިމް މުހައްމަދު ސޯލިހު ވެރިކަމުން ދުރުކުރުމަށް" ޕީޕީއެމް/ޕީއެންސީއާ ގުޅިގެން ދަނީ މަސައްކަތް ކުރަމުންނެވެ.
