ޖިއްދާ، ސައުދީ އަރަބިއްޔާ (ޖުލައި 10) - ޔޫރަޕްގެ ކްލަބްތަކަށް ކުޅޭ މަޝްހޫރު ކުޅުންތެރިން ގެނެސްގެން ސައުދީ ޕްރޯ ލީގުގެ ކްލަބްތައް ވަރުގަދަކުރަމުން އަންނައިރު، މުސްތަގުބަލުގައި ދުނިޔޭގެ ލެވަލްގައި ވެސް ސައުދީ ލީގުގެ އަގު އެތައް ގުނައަކަށް އުފުލޭނެ ކަމަށް ސައުދީ ޕްރޯ ލީގުގެ އަލް އިއްތިފާގުގެ ކޯޗު ސްޓީވެން ޖެރާޑް ބުނެފި އެވެ.
ޖެރާޑް، 43، ވަނީ އަލް އިއްތިފާގާ އެކު، ދެ އަހަރުގެ ކޮންޓްރެކްޓެއްގައި ސޮއިކޮށްފަ އެވެ.
ކުރިން ރޭންޖާސް އާއި އެސްޓަން ވިލާ އަށް ކޯޗުކޮށްދިން ލިވަޕޫލްގެ ކުރީގެ ކެޕްޓަން، ޖެރާޑް ބުނީ ފުޓްބޯޅައިގައި މިހާރު ކުރިމަގެއް އޮތީ ހަރަދުކޮށްގެން ކަމަށާއި ޕްލޭނަކާ އެކު ސައުދީން ކުރަމުން އަންނަ މަސައްކަތުގައި ކުރިމަގު އޮތީ އުޖާލާކޮށް ކަމަށެވެ.
"އަހަންނަށް ޔަގީންކަން އެބައޮތް ސައުދީ ލީގު ދުނިޔޭގެ އެންމެ ބޮޑު ލީގުތަކުގެ ތެރޭގައި ހިމެނޭނެ ކަމުގެ. މި ލީގުގެ އަގު މުޅި ދުނިޔޭގެ ލެވަލްގައި ވެސް އުފުލޭނެ،" ޖެެރާޑް ބުންޏެވެ.
"އަހަރެން މި ހުރި ކްލަބް (އަލް އިއްތިފާގު) ގައި ވެސް މި އޮތީ އުންމީދީ ޕްރޮޖެކްޓެއް، އެހެން ކްލަބްތައް ވެސް ފެންނަނީ އެހާ ޖޯޝުގައި މަސައްކަތްކުރާތަން،"
ސައުދީ ލީގުން އެންމެ ފުރަތަމަ ގެނައި މަޝްހޫރު ކުޅުންތެރިއަކީ، ޖެނުއަރީ މަހު ރަސްމީކޮށް، އަލް ނަސްރަށް ސޮއިކުރި ކްރިސްޓިއާނޯ ރޮނާލްޑޯ އެވެ. ރޮނާލްޑޯ އަށް ފަހު މިހާރު ގިނަ މަޝްހޫރު ކުޅުންތެރިންތަކެއް އަންނަނީ ސައުދީ ޕްރޯ ލީގުގެ ކްލަބްތަކާ ގުޅެމުންނެވެ.
އެ ގޮތުން މި ފަހަރުގެ ޓްރާންސްފާގައި ސައުދީ ކްލަބްތަކަށް އައި ކުޅުންތެރިންނަށް ބަލާއިރު، އަލް އިއްތިހާދުން ވަނީ ރެއާލް މެޑްރިޑްގެ ކަރިމް ބެންޒެމާ އާއި ޗެލްސީގެ އެންގޯލޯ ކާންޓޭ އަދި ސެލްޓިކްގެ ޖޮޓާގެ ސޮއި ހޯދައިފަ އެެވެ. އަލް ހިލާލް އިން ޗެލްސީގެ ކަލީދޫ ކުލިބާލީ އާއި ވުލްވްސްގެ ރުބެން ނެވޭސް ގެންދިޔައިރު، އަލް އަހްލީ އިން ވަނީ ލިވަޕޫލްގެ ރޮބާޓޯ ފިރްމީނޯ އާއި ޗެލްސީގެ އެޑޮއާޑް މެންޑީގެ ސޮއި ހޯދައިފަ އެވެ. އަދި އަލް ނަސްރުން ވަނީ އިންޓަ މިލާނުގެ މާސެލޯ ބްރޮޒޮވިޗް ގަނެފަ އެވެ.
