މެންޗެސްޓާ (ޖުލައި 9) - މެންޗެސްޓާ ޔުނައިޓަޑަށް ކުޅެމުންދިޔަ ސްޕެއިންގެ ގޯލްކީޕަރު ޑޭވިޑް ޑެހެއާގެ ކޮންޓުރެކްޓް އެ ކްލަބުން އާނުކުރާނެކަން އޭނާ އިއްޔެ ކަށަވަރުކޮށްދީފި އެވެ.
ޑެހެއާ, ޔުނައިޓަޑާ މި ދުރަށް ދަނީ އެ ކްލަބުގައި 12 އަހަރު ހޭދަކުރުމަށް ފަހު އެވެ. ޖުމްލަ 545 މެޗާ އެކު، ޑެހެއާ އަކީ ޔުނައިޓަޑްގެ ތާރީހުގައި ވެސް ކްލަބަށް އެންމެ ގިނަ މެޗު ކުޅުނު ގޯލްކީޕަރެވެ. ޑެހެއާ ވަނީ އެ ކްލަބުގެ ކުޅުންތެރިން ހޮވާ މޮޅު ކުޅުންތެރިޔާގެ އެވޯޑާއި ސަޕޯޓަރުން ހޮވާ މޮޅު ކުޅުންތެރިޔާގެ އެވޯޑް ހަތަރު ފަހަރު ހޯދައިފަ އެވެ.
ޑެހެއާ، 32، ޔުނައިޓަޑާއެކު ހަދާފައިވާ ކޮންޓުރެކްޓް ހަމަވީ މިދިޔަ މަހުގެ ނިޔަލަށެވެ. ޑެހެއާގެ ކޮންޓުރެކްޓް އާކުރުމުގެ ޔުނައިޓަޑުން ކުރިން ވިސްނި ނަމަވެސް، އެ ކްލަބުން ވަނީ ފަހުން އެ ހިޔާލު ބަދަލުކޮށްފަ އެވެ.
ޔުނައިޓަޑާ ދުރަށްދާކަން ޑެހެއާ ރޭ ކަށަވަރުކޮށްދިނީ ސޯޝަލް މީޑިއާ އަށް ދޫކޮށްލި މެސެޖަކުންނެވެ. އެ މެސެޖުގައި އޭނާ ބުނީ ޔުނައިޓަޑްގައި ހޭދަކުރި ދުވަސްތަކުގެ މަތިން ދުވަހަކުވެސް ހަނދާން ނުނެތޭނެ ކަމަށެވެ. އެކަމަކު، މިއީ ކެރިއަރުގައި "އާ ޗެލެންޖަކާ ކުރިމަތިލާން" ވީ ވަގުތު ކަމަށެވެ.
އެތުލެޓިކޯ މެޑްރިޑްގައި ކެރިއަރު ފެށުމަށް ފަހު، އެ ކްލަބު ދޫކޮށް ޔުނައިޓަޑަށް ޑެހެއާ ބަދަލުވީ 2011 ވަނަ އަހަރެވެ. އެ ކްލަބާ އެކު އޭނާ ވަނީ ޕްރިމިއާ ލީގާއި ޔޫރޮޕާ ލީގާއި އެފްއޭ ކަޕް އަދި ލީގު ކަަޕް ވެސް ކާމިޔާބުކޮށްފަ އެެވެ.
ޔުނައިޓަޑުން ޑެހެއާ ދޫކޮށްލިއިރު، އެ ކްލަބުން ދަނީ އިންޓަ މިލާނަށް ކުޅެމުންދާ ކެމަރޫންގެ ގޯލްކީޕަރު އަންދްރޭ އޮނަނާ ގެނައުމަށް ދަނީ މަސައްކަތް ކުރަމުންނެވެ.
މިދިޔަ ސީޒަންގައި ވެސް ޕްރިމިއާ ލީގުގެ "ގޯލްޑަން ގްލަވް" އެވޯޑް ހޯދި ޑެހެއާ އަށް ސައުދީ އަރަބިއްޔާގެ ޕްރޯ ލީގުގެ ބައެއް ކްލަބުތަކުން ހުށަހެޅުންތަކެއް ލިބިފައިވާ ކަމަށް ވަނީ އަޑުފެތުރިފަ އެވެ.
