މެންޗެސްޓާ (ޖުލައި 8) - މެންޗެސްޓާ ޔުނައިޓެޑްގެ ކެޕްޓަން، ހެރީ މެގުއާ ވިއްކާލުމުގައި އުނދަގޫތަކެއް ހުރިކަން ހާމަވެއްޖެ އެވެ.
މީގެ ހަތަރު ވަރަކަށް އަހަރު ކުރިން، 2019 ވަނަ އަހަރު ލެސްޓާ ސިޓީ އިން ދުނިޔޭގެ އެންމެ އަގުބޮޑު ޑިފެންޑަރުގެ ގޮތުގައި ޔުނައިޓެޑާ ގުޅުނު މެގުއާ އެ ކުލަބާ އެކު ހަދާފައިވާ ކޮންޓްރެކްޓްގައި ބާކީ ދެ އަހަރު އެބައޮތެވެ. ނަމަވެސް އެ ކުލަބުން ބޭނުންވަނީ މެގުއާ ވިއްކާލައި، އާ ސީޒަނަށް އެ ކުލަބަށް އެހެން ޑިފެންޑަރެއް ގެނައުމަށެވެ.
ޔުނައިޓެޑްގެ ކެޕްޓަނަކީ ހެރީ މެގުއާ ކަަމަށް ވިޔަސް މިދިޔަ ސީޒަނުގައި ޔުނައިޓެޑްގެ ކޯޗުކަމާ ނެދަލެންޑްސްގެ އެރިކް ޓެން ހާގް ހަވާލުވުމަށް ފަހު، މެގުއާ އަށް ފުރަތަމަ އެގާރައިން ފުރުސަތު ނުލިބެ އެވެ. އަނެއްކޮޅުން އޭނާގެ ފަރާތުން އެކަށީގެންވާ ކުޅުމެއް ނުފެންނާތީ ސަޕޯޓަރުންގެ ފަރާތުން ވެސް މެގުއާ އަށް ނުރުހުން އަންނަނީ ލިބެމުންނެވެ.
މެގުއާ އަށް މުސާރައިގެ ގޮތުގައި މަހަކު 200،000 ޕައުންޑް ލިބެ އެވެ. އަނެއްކޮޅުން، މިދިޔަ ސީޒަންގައި ޔުނައިޓެޑް ގަދަ ހަތަރެއްގައި ހިމެނި ޗެމްޕިއަންސް ލީގަށް ކޮލިފައިވުމުން އޭނާގެ މުސާރަ ވަނީ ބޮޑުވެފަ އެވެ. މިއީ، ޔުނައިޓެޑަށް މެގުއާ ވިއްކާލުމުގައި ދިމާވެފައި އޮތް ގޮންޖެހުމެކެވެ. އަނެއްކޮޅުން މެގުއާގެ މުސާރަ ބޮޑުވުމާ އެކު، ޓީމަށް ލޯނަކަށް އޭނާ ދޫކުރިޔަސް، ގިނަ ކްލަބްތަކުގެ ޝައުގުވެރިކަން ހުރީ ޔުނައިޓެޑުން ވަކި ވަރަކަށް މުސާރަ ދޭ ގޮތަށް މެގުއާ ގެންދިއުމަށެވެ.
ފުރަތަމަ އެގާރައިން ޖާގަ ނުލިބޭތީ މެގުއާ ހުރީ ޔުނައިޓެޑް ދޫކޮށްލުމުގެ ވިސްނުމުގަ އެވެ. ސަބަބަކީ އޭނާ އަށް ގަވާއިދުން ކުޅެން ފުރުސަތު ނުލިބޭތީ އިނގިރޭސި ގައުމީ ޓީމުގެ ޖާގަ ދެމެހެއްޓެނިވި ގޮތެއްގައި ނުލިބި، މަގާމު އެއްކޮށް ގެއްލުމުގެ ބިރު ވެސް އޮތުމެވެ.
މެގުއާ އަކީ އިންގްލެންޑްގެ ކޯޗު ގަރެތު ސައުތުގޭޓުގެ ޕްލޭނުގައި ހިމެނޭ މުހިންމު ކުޅުންތެރިއެކެވެ.
އާ ސީޒަނަށް ޔުނައިޓެޑުން މިހާތަނަށް ވަނީ މިޑްފިލްޑަރު މޭސަން މައުންޓް ގެނެސްފަ އެވެ. ދެން އެކުލަބުން ބޭނުންވަނީ އިންޓަ މިލާންގެ ކީޕަރު އަންދްރޭ އޮނާނާ އާއި އެޓްލާންޓާގެ ފޯވާޑް ރާސްމުސް ހޮއިލުންޑްގެ ގަތުމަށެވެ. ނަމަވެސް މި ވަގުތު ކުޅުންތެރިން ގަތުމަށް ލިބިފައިވާ ބަޖެޓު ކުޑަވުމާ އެކު ޔުނައިޓެޑުން ކުޅުންތެރިންތަކެއް ވިއްކާލަން މަޖުބޫރުވެ އެވެ.
އެ ކުލަބުން ބޭނުންވަނީ ހެރީ މެގުއާ، މިޑްފިލްޑަރު ފްރެޑް އަދި ވިންގާ އެންތަނީ އެލަންގާ ވިއްކާލައި އެ ފައިސާ އާ ކުޅުންތެރިން ގަތުމަށް ހޭދަކުރާށެވެ.
މީޑިއާ ރިޕޯޓްތައް ބުނާ ގޮތުން ޔުނައިޓެޑުން މެގުއާގެ ބަދަލުގައި އެހެން ޑިފެންޑަރެއްވެސް ގަތުން ގާތެވެ. އެ ޓީމުން އެންމެ ބޮޑަށް ބޭނުންވީ މެގުއާގެ ނަޕޯލީގެ ޑިފެންޑަރު ކިމް މިން ޖޭ ގަތުމަށެވެ. ނަމަވެސް ކިމް ސޮއިކުރުން ގާތީ ޖަރުމަންގެ ބަޔާން މިއުނިކް އަށެވެ.
