ރައީސް އިބްރާހިމް މުހައްމަދު ސޯލިހު ވެރިކަމުން ދުރުކުރުމަށް، ކުރިއަށް އޮތް ރިޔާސީ އިންތިހާބުގައި ހުރިހާ ސިޔާސީ ޕާޓީއަކުން ވެސް ޕީޕީއެމްގެ ކެންޑިޑޭޓު އަބްދުﷲ ޔާމީންގެ ފަހަތްޕުޅަށް އެރުމަށް އެ ޕާޓީން ގޮވާލައިފި އެވެ.
ޕީޕީއެމް/ޕީއެންސީގެ ރިޔާސީ ކެންޑިޑޭޓަކީ، މިހާރު 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީނެވެ. ނަމަވެސް, ގުޅިގެން މަސައްކަތް ކުރަން އެ ޕާޓީން އަންނަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ޑިމޮކްރެޓްސްއާއެކު މަޝްވަރާތައް ކުރަމުންނެވެ.
އެކަމާ ގުޅޭ ގޮތުން ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް އަބްދުﷲ މިއަދު ވިދާޅުވީ ޑިމޮކްރެެޓްސްއާއެކު ހިޔާލު ތަފާތު ކަންކަން އެބަހުރި ކަމަށާއި އެހެންނަމަވެސް ދެ ފަރާތަށް ވެސް އެއްބަސްވެވޭ އެންމެ މައިގަނޑު ކަމަކީ ރައީސް އިބްރާހިމް މުހައްމަދު ސޯލިހު ވެރިކަމުން ދުރުކުރުން ކަމަށެވެ.
"އެންމެން އެކީގައި މަސައްކަތް ކޮށްގެން ވެސް މި ވެރިކަން ބަދަލު ކުރަން އެބަ ޖެހޭކަން، ރައްޔިތުންގެ ހައްގުގައި، އަޅުގަނޑުމެން ގަބޫލެއް ނުކުރަން ދެބައި މީހުންގެ ދެމެދުގައި ހުރި ހިޔާލުތަފާތުވުމެއްގެ ސަބަބުން ޕީޕީއެމް/ޕީއެންސީގެ އިމޭޖަށް އެއްވެސް ބަދަލެއް އަންނާނެ ކަމަކަށް،" ޕީޕީއެމް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވި އެވެ.
ރައީސް ސޯލިހު ވެރިކަމުން ދުރުކުރުމަށް ދޫ ދޭނީ ކޮންކޮން ކަމަކަށްތޯ "އަދަދު" އިން ސުވާލުކުރުމުން އަބްދުއްރަހީމް ވިދާޅުވީ އެކަން ކުރުމަށް އޮތް އެންމެ ފަސޭހަ ގޮތަކީ ޔާމީން ވެރިކަމަށް ގެނައުން ކަމަށެވެ.
"އެންމެ ސަޕޯޓަރުން ގިނަ ޕާޓީ [ޕީޕީއެމްއަކީ]، އެހެންވީމާ އަޅުގަނޑުމެން ގަބޫލުކުރަނީ ވެރިކަން ބަދަލުކުރުމަށް އެންމެ ފަސޭހަވާނީ ޕީޕީއެމްއާއެކުގައި މަސައްކަތް ކޮށްގެން ކަމަށް، އެއީ މި ދަންނަވާ ވާހަކައަކީ ވެރިކަން ބަދަލު ކުރާ މައްސަލައިގައި އެންމެން މި ތިބީ އެކީގައޭ،" އަބްދުއްރަހީމް ވިދާޅުވި އެވެ.
ވެރިކަން ބަދަލުވެފައި ތިބި ހުރިހާ ސިޔާސީ ވެރިންނަށް ވެސް އޮތް "ޗޮއިސްއަކީ" ޔާމީން ކަމަށް އޭނާ ވިދާޅުވި އެވެ.
"އަޅުގަނޑުމެންނާ ބައިވެރިވާން ބޭނުންވާ ކޮންމެ ބަޔަކާއެކީ ބައިވެރިވެގެން މަސައްކަތް ކުރާނަން ވެރިކަން ބަދަލު ކުރުމަށް ޓަކައި،" 11 އަހަރުގެ ޖަލު ހުކުމެއް ތަންފީޒު ކުރައްވަމުން އަންނަ ޔާމީން އިންތިހާބު ކާމިޔާބުކުރާނެ ކަން ފާހަގަކުރައްވައި އަބްދުއްރަހީމް ވިދާޅުވި އެވެ.
ޕީޕީއެމް/ޕީއެންސީން އަބަދު ވެސް ބުނަމުން އަންނަނީ އެ ދެ ޕާޓީގެ ރިޔާސީ ކެންޑިޑޭޓަކީ ޔާމީން ކަމަށާއި އެކަން ބަދަލެއް ނުވާނެ ކަމަށެވެ. ނަމަވެސް އެމްއެމްޕީއާރްސީގެ ބޮޑު ހިޔާނާތުގެ ތެރޭގައި ހިމެނޭ މުއާމަލާތަކާ ގުޅިގެން މަނީ ލޯންޑްރިންއާއި ރިޝްވަތުގެ ކުށް ސާބިތުވެފައި ވާތީ ޔާމީނަށް 11 އަހަރުގެ ޖަލު ހުކުމެއް އިއްވާފައި އެބަ އޮތެވެ.
އެ ހުކުމް ތަންފީޒު ކުރަމުން ގެންދާއިރު ރިޔާސީ އިންތިހާބުގައި ޔާމީނަށް ވާދަކުރެއްވޭނީ ހައިކޯޓުން އެ ހުކުމް ބާތިލުކޮށްފި ނަމަ އެވެ. އެ ހުކުމް ޔާމީނުގެ ފަރާތްޕުޅުން އިސްތިއުނާފުކުރުމުން ހައިކޯޓުގައި އެ މައްސަލައިގެ އިސްތިއުނާފު އަޑުއެހުންތައް ކުރިއަށް ދެ އެވެ.
