އުނގެނުމަށް ހުރަސް އެޅޭތީ ކްލާސްރޫމްތަކަށް މޮބައިލް ފޯން ފަދަ އެއްވެސް ޑިވައިސްއެއް ވެއްދުން ނެދަލޭންޑްސްގެ ސަރުކާރުން މަނާކޮށްފި އެވެ.
ސްކޫލްތަކާ ގުޅިގެން އެ ނިންމުން ތަންފީޒު ކުރަން ފަށާނީ އަންނަ އަހަރުން ފެށިގެންނެވެ.
ސިއްހީ ސަމާލުކަން ބޭނުންވާ ދަރިވަރުންނާއި، ހާއްސަ އެހީއަށް ބޭނުންވާ ކުދިންނަށް ހާލަތަށް ރިއާޔަތް ކުރުމަށް ފަހު ފޯނު ގެންދިޔުމުގެ ހުއްދަ ލިބޭނެ އެވެ.
އޭގެ އިތުރުން ޑިޖިޓަލް ސްކިލްތަކާ ގުޅުން ހުރި ކްލާސްތަކަށް ވެސް ފޯނު ގެންދެވޭނެ އެވެ.
އެ ނިންމުން ތަންފީޒު ކުރަން ފަށަނީ ގާނޫނެއްގެ ދަށުން ނޫން ނަމަވެސް ކުރިއަށް އޮތް ތަނުގައި އެ ނިންމުން ގާނޫ ގޮތުން މަޖުބޫރު ކުރާނެ ކަމަށް ބެލެވެ އެވެ.
ނެދަލޭންޑްސްގެ އެޑިއުކޭޝަން މިނިސްޓަރު ރޮބެޓް ޑިޖްކްރާފް ވިދާޅުވީ މޮބައިލް ފޯނަކީ ދިރިއުޅުމުގެ މުހިއްމު ބަޔެއް ނަމަވެސް، އެއީ ކްލާސްރޫމަކަށް ގެންދަން ޖެހޭ އެއްޗެއް ނޫން ކަމަށެވެ.
ކްލާހުގައި ކުދިންނަށް ފުރިހަމައަށް ސަމާލުކަން ދެވޭނެ ގޮތްތައް މަގުފަހި ކުރަން ޖެހޭ ކަމަށާއި މޮބައިލް ފޯނަކީ އެކަމަށް ހުރަސް އެޅޭ އެއްޗެއްކަން ސައިންސްގެ އަލީގައި އެނގޭ ކަމަށް އޭނާ ވިދާޅުވި އެވެ.
މޮބައިލް ފޯނުގެ އިތުރުން ޓެބްލެޓާއި ސްމާޓްވޮޗް ވެސް އެ ނިންމުމުގެ ތެރޭގައި ހިމެނެ އެވެ.
މިދިޔަ ހަފުތާގައި ފިންލޭންޑުން ވެސް ބުނީ ސްކޫލްގައި ފޯން ބޭނުންކުރުން މަދުކުރުމަށް ފިޔަވަޅު އެޅުމަށް ގާނޫނީ ބަދަލުތަކެއް ގެންނާނެ ކަމަށެވެ.
އިނގިރޭސިވިލާތާއި ފްރާންސް ފަދަ ގައުމުތަކުން ވެސް ދަނީ އެ ފިޔަވަޅު އެޅުމަށް ވިސްނަަމުންނެވެ.
