މާލެ މީހުންނަށް ގޯތި ދިނުމަށް ހިއްކާ ގިރާވަރާއި, މާލެ ގުޅާލާނީ, ތިލަމާލެ މަޝްރޫއުގެ ތެރެއިން ނޫން ކަމަށް ޕްލޭނިން މިނިސްޓްރީން ބުނެފި އެވެ.
ގިރާވަރާއި މާލެ ގުޅާލުމުގެ މަޝްރޫއު ގެންދާނީ ވަކި މަޝްރޫއެއްގެ ގޮތުގައި ކަމަށް ޕްލޭނިންގެ ސްޓޭޓް މިނިސްޓަރު އަކްރަމް ކަމާލުއްދީން މިއަދު 'އަދަދު' އަށް ވިދާޅުވި އެވެ. އެހެންކަމުން, އެ ބްރިޖް ގިރާވަރާ ގުޅާލަން ނިންމި ނަމަވެސް, ތިލަމާލެ ބްރިޖުގެ ޕްލޭނަށް އިތުރު ބޮޑެތި ބަދަލުތަކެއް ނާންނާނެ އެވެ.
މާލޭ ރައްޔިތުންނަށް ގޯތި ދިނުމަށް ގިރާވަރު ހިއްކަމުން ދާއިރު, މިހާރު ވަނީ 20 ހެކްޓަރުގެ ބިން ހިއްކިފައި ކަމަށް ރައީސް އިބްރާހިމް މުހައްމަދު ސޯލިހު ވަނީ ވިދާޅުވެފަ އެވެ. އެމަނިކުފާނު ވިދާޅުވީ ބިންވެރިޔާގެ ނަމުގައި ހިންގާ މަޝްރޫއު މުޅިން ފުރިހަމަ ވާނީ މާލެއިން ތިލަފުއްޓަށް އަޅާ ބްރިޖުން، އެ ސަރަޙައްދާއި މާލެއާ ގުޅައިލުމުން ކަމަށެވެ.
އަދި އެ ބްރިޖުގެ މަސައްކަތް އަންނަ އަހަރުގެ ތެރޭގައި، ނިމި ބޭނުންކުރަން ފެށޭނެ ކަމަށް ވެސް އެމަނިކުފާނު ވިދާޅުވި އެވެ. ރައީސް ވިދާޅުވިގޮތުގައި, ތިލަމާލެ ބްރިޖް ގިރާވަރާ ގުޅާލުމުގެ މަސައްކަތް ފަށާނީ ތިލަމާލެ މަޝްރޫއު ނިމި, އެ ބްރިޖުގެ ބޭނުން ކުރާ ފަހުންނެވެ.
ތިލަމާލެ ބްރިޖް ގިރާވަރާ ގުޅާލުމުގެ މަޝްރޫއަކީ, އަންނަ ދައުރުގައި ރައީސް ސޯލިހު ކުރައްވަން ގަސްތުކުރައްވާ ކަމެކެވެ.
ތިލަމާލެ ބްރިޖު މަޝްރޫއުގެ ހުލާސާ
މުޅި ޕްރޮޖެކްޓަށް 7.7 ބިލިއަން ރުފިޔާ ހަރަދުވާނެ ކަމަށް ބެލެވޭ މި ބްރިޖުގެ މަސައްކަތް ކުރަނީ އިންޑިއާގެ އެފްކޮންސް ކުންފުނިންނެވެ.
މި ބްރިޖު ނިމުމުން ގްރޭޓާ މާލޭ ސަރަހައްދުގައި ހިމެނޭ ތިލަފުއްޓާއި ގުޅީފަޅާއި ވިލިމާލެ މާލެއާ ގުޅާލެވޭނެ އެވެ. އެއާއެކު ތިލަފުށިން ހުޅުމާލެއާ ހަމައަށް އެއްގަމު މަގުން ދަތުރުކުރެވޭނެ މަގުފަހި ވާނެ އެވެ.
މި ރަށްތައް ގުޅާލަން އަޅާ ބްރިޖާއި ކޯސްވޭ އަދި މަގުތަކުގެ ނެޓްވާކުގެ ދިގުމިނުގައި 6.7 ކިލޯމީޓަރު ހުންނާނެ އެވެ. މި ލިންކުގެ ބައިތަކުގެ ތެރޭގައި ތިން ބްރިޖާއި، ދެ މަގާއި، ކޮންމެ ރަށަކަށް އަރާ ފޭބުމަށް އިންޓަޗޭންޖް ޕޮއިންޓްތަކާއި، ޕާކިން ސަރަހައްދުތައް ގާއިމުކުރެވޭނެ އެވެ.
މާލެ-ތިލަފުށި ބްރިޖަކީ މި ސަރުކާރުގެ އިގުތިސޯދީ ތަސައްވުރާއި ސިޔާސަތުގެ މުހިންމު ބަޔެކެވެ. ނަމަވެސް މި ރިޔާސީ ދައުރު ނިމެންވާއިރަށް ބްރިޖުގެ މަސައްކަތް މުޅީން ނުނިމޭނެ އެވެ.
މި ބިޔަ ޕްރޮޖެކްޓަށް ހަރަދުކުރަނީ އިންޑިއާ އެގްޒިމް ބޭންކު މެދުވެރިކޮށް ހަމަޖައްސާފައިވާ 400 މިލިއަން ޑޮލަރުގެ ކްރެޑިޓް ފެސިލިޓީގެ ތެރެއިންނާއި އިންޑިއާ ސަރުކާރުން ދޭ 100 މިލިއަން ޑޮލަރުގެ ހިލޭ އެހީންނެވެ.
