މެންޗެސްޓާ (ޖޫން 17) - މެންޗެސްޓާ ޔުނައިޓެޑްގެ ގޯލްކީޕަރު ޑޭވިޑް ޑެހެއާ ދޫކޮށްލަން ނިންމައި، އިންޓަ މިލާންގެ ކީޕަރު އަންދްރޭ އޮނާނާ ހޯދަން މެންޗެސްޓާ ޔުނައިޓެޑުން މަސައްކަތް ފަށައިފި އެވެ.
މިދިޔަ 12 އަހަރު މެންޗެސްޓާ ޔުނައިޓެޑަށް ކުޅުނު ސްޕެއިންގެ ކީޕަރު ޑޭވިޑް ޑެހެއާގެ ޔުނައިޓެޑާ އެކު ހަދާފައިވާ ކޮންޓްރެކްޓް މިދިޔަ މަހުގެ ނިޔަލަށް ވަނީ ހަމަވެފަ އެވެ. އޭނާ އަށް އާ ކޮންޓްރެކްޓެއް ދޭންވެސް ޔުނައިޓެޑުން ތައްޔާރުވި އެވެ.
ޔުނައިޓެޑުގެ އެންމެ މުސާރަ ބޮޑު ކުޅުންތެރިޔާ އަށް އާ ކޮންޓްރެކްޓެއް ދޭން ޔުނައިޓެޑުން ބޭނުންވީ މުސާރަ ކުޑަކޮށްފަ އެވެ. ކުރިން ހަފްތާ އަކު 350،000 ޕައުންޑްގެ މުސާރައިގެ ބަދަލުގައި ހަފްތާއަކަށް 200،000 ޕައުންޑްގެ މުސާރައަކަށް އާ ކޮންޓްރެކްޓުގައި ސޮއިކުރަން ޑެހެއާ ވެސް ހުރީ ތައްޔާރަށެވެ. ނަމަވެސް ފަހު ވަގުތު ޔުނައިޓެޑުން ހުށަހެޅި ކޮންޓްރެކްޓްގައި ޑެހެއާގެ މުސާރަ މާބޮޑަށް ކުޑަކޮށްފައިވާތީ ޑެހެއާ އާ ކޮންޓްރެކްޓްގައި ސޮއިކުރަން ބޭނުން ނުވީ އެވެ.
މިދިޔަ ސީޒަންގައި ޕްރިމިއާ ލީގުގެ "ގޯލްޑަން ގްލޯވް" ހޯދި ކީޕަރު އެކުލަބުގައި ބަހައްޓަން ކޯޗު އެރިކް ޓެންހާގް ތާއިދު ނުކުރާކަމަށް އިނގިރޭސި މީޑިއާތަކުން ބުނެ އެވެ. އޭނާ ބޭނުންވަނީ އާ ސީޒަނަށް ޔުނައިޓެޑަށް އެހެން ކީޕަރެއް ގެންނާށެވެ.
ޔުނައިޓެޑުން ފާރަލަމުން އަންނަ ކީޕަރަކީ އިންޓަ މިލާންގެ ކީޕަރު އަންދްރޭ އޮނާނާ އެވެ. އިންޓަ މިލާން ޗެމްޕިއަންސް ލީގުގެ ފައިނަލަށް ގެންގޮސްދިނުމުގައި މުހިންމު ދައުރެއް އަދާކުރި ކީޕަރު އޮނާނާ ހޯދުމަށް ޔުނައިޓެޑުން ޝައުގުވެރިވާކަމަށް އިންޓަ މިލާނުންވަނީ ޔަގީންކޮށްދީފަ އެވެ.
އިންޓަގެ ސީއީއޯ ބެޕޭ މަރޮއްޓާ ވިދާޅުވީ ޔުނައިޓެޑުން އޮނާނާ ހޯދަން ޝައުގުވެރިވާކަމަށް ބުނެފައިވާކަމަށާއި، އެހެންނަމަވެސް އެއްވެސް ރަސްމީ ބިޑެއް ކޮށްފައި ނުވާކަމަށެވެ.
އިނގިރޭސި މީޑިއާ ރިޕޯޓްތައް ބުނާ ގޮތުން ޔުނައިޓެޑުން އޮނާނާ ގަންނަން ގަސްތުކުރަނީ ބޯނަސްތައް ނުހިމެނޭ ގޮތަށް 49 މިލިއަން ޑޮލަރުގެ ބިޑެކެވެ. ނަމަވެސް އިންޓަ އިން އޮނާނާ ވިއްކާލަން ބޭނުންވަނީ މަދުވެގެން 55 މިލިއަން ޑޮލަރަށެވެ.
އެތްލެޓިކޯ މެޑްރިޑް ދޫކޮށް މެންޗެސްޓާ ޔުނައިޓެޑަށް 2011 ވަނަ އަހަރު ބަދަލުވި ޑެހެއާ އަކީ ޔުނައިޓެޑުގެ ސަޕޯޓަރުންގެ މެދުގައި މަގުބޫލު ކުޅުންތެރިއެކެވެ. ނަމަވެސް ކޯޗު ޓެންހާގު އޭނާގެ ޕްލޭންގައި ޑެހެއާ ބޭނުން ނުކުރަން ނިންމާފައިވާތީ މިހާރު ޑެހެއާގެ ވިސްނުން ހުރީ އެހެން ކުލަބަކަށް ބަދަލުވުމަށެވެ. ޑެހެއާ ހޯދުމަށް ސައުދީ ލީގުގެ ދެ ކުލަބަކުން ޝައުގުވެރިވާކަމަށް ބެލެވެ އެވެ.
ޑެހެއާގެ ބަދަލުގައި ގެންނަން މަސައްކަތްކުރާ އިންޓަގެ އޮނާނާ ނުލިބިއްޖެ ނަމަ ދެން އެކުލަބުން ބޭނުންވާ ކީޕަރުންގެ ލިސްޓުގައި އުޅެނީ ބަޔާން މިއުނިިކްގައި ހުރި ސްވިޒަލެންޑްގެ ޔެން ސޮމާ ނުވަތަ ޕޯޗުގަލްގެ ޕޯޓޯ އަށް ކުޅެމުން އަންނަ ޑިއޮގޯ ކޮސްޓާ އެވެ.
