ސަރުކާރުގެ ބިންވެރިޔާ ސްކީމުގެ ދަށުން ގޯތި ލިބޭ މީހުން ވަގުތީ ލިސްޓަށް މިހާތަނަށް 600 ޝަކުވާ ހުށަހަޅައިފި އެވެ.
ގެދޮރުވެރިޔާ ކޮމެޓީގެ ޗެއާ އަދި ހައުސިން މިނިސްޓްރީގެ ސްޓޭޓް މިނިސްޓަރު، އަކްރަމް ކަމާލުއްދީން 'އަދަދު' އަށް މިއަދު ވިދާޅުވީ މިހާތަނަށް 600 އެއްހާ ޝަކުވާ ލިބިފައިވާއިރު, އޭގެ ތެރޭގައި މާ ބޮޑެތި ޝަކުވާތަކެއް ނެތް ކަމަށެވެ. އަދި, ގިނައިން ހުށަހަޅާފައިވަނީ މައުލޫމާތު ސާފު ކުރުމުގެ ހުށަހެޅުންތައް ކަމަށް ވެސް އޭނާ ވިދާޅުވި އެވެ.
"ގާތްގަނޑަކަށް 600 އެއްހާ އެއްޗެހި [ޝަކުވާ]. މާބޮޑު ޝަކުވާއެއް ނޫން ހުރީކީ. ދެން މައުލޫމާތު ސާފުކުރުން އޮތީ ގިނައިން," އަކްރަމް ވިދާޅުވި އެވެ.
ބިންވެރިޔާ ސްކީމްގެ ދަށުން ގޯއްޗަށް އެދި 23،088 މީހުންގެ ފަރާތުން، 15،164 އެޕްލިކޭޝަން ހުށައަޅާފައިވެ އެވެ. ވަކިން ހުށަހެޅި ފޯމްތަކާއި ޖޮއިންޓް ފޯމުތައް ހިމެނޭ ގޮތުން ގޯތި ލިބޭ މީހުންގެ ލިސްޓްގައި 10،314 މީހުން ހިމެނެ އެވެ. ބިންވެރިޔާ ސްކީމްގެ ދަށުން ގޯއްޗަށް ހުށަހެޅި ފަރާތްތަކުގެ ތެރެއިން، 19،857 މީހުން ހުށަހެޅި، 12،794 ފޯމު ވަނީ ޝަރުތު ހަމަވެފަ އެވެ.
ބިންވެރިޔާ ސްކީމުގެ ދަށުން މާލެ ސަރަހައްދުން ދޫކުރާ ގޯތީގެ ލިސްޓު އާންމުކުރީ މިދިޔަ ބުރާސްފަތި ދުވަހު އެވެ. އަންނަ ޖުލައި މަހުގެ 15 ވަނަ ދުވަހުގެ ނިޔަލަށް އެ ލިސްޓަށް ޝަކުވާ ހުށަހެޅުމުގެ ފުރުސަތު ވަނީ ހުޅުވާލާފަ އެވެ.
ގޯތި ލިސްޓަށް މިހާތަނަށް ހުށަހެޅި ޝަކުވާތަކުގެ ތެރޭގައި މައުލޫމާތު ސާފު ކުރުމަށް ހުށަހެޅި ހުށަހެޅުންތައް ގިނައިރު, ގޯތި ދިނުމުގައި ޕޮއިންޓް ދިނުމުގެ އުސޫލެއް ސަރުކާރުން އާންމުކޮށްފައެއް ނުވެ އެވެ.
އަކްރަމް ވިދާޅުވީ ގޯތި ލިސްޓުގައި ޕޮއިންޓު ދީފައިވާނީ އާއިލާގެ ބޮޑުމިނާއި, ގޯތީގެ ބޮޑުމިން ފަދަ ކަންކަމަށް ބަލާފައި ކަމަށެވެ. އަދި ޕޮއިންޓު ލިބުނު ގޮތެއް އެދޭ މީހަކަށް ކިޔައިދޭނެ ކަމަށެވެ. ނަމަވެސް, ވަކި ވަކި ކަންކަމަށް ޕޮއިންޓު ދޭނީ ކިހާވަރަކަށްތޯ ކަނޑައަޅާފައިވާ އެއްވެސް ލިޔުމެއް އާންމުކޮށްފަ އެއް ނުވެ އެވެ.
ބިންވެރިޔާ ސްކީމުގެ ދަށުން ގޯތި ދެނީ ހުޅުމާލޭގެ އިތުރުން, ހިއްކުމުގެ މަރުހަލާގައި އޮތް ގުޅިފަޅާއި ގިރާވަރުފަޅުންނެވެ. ސަރުކާރުން ބުނެފައިވާ ގޮތުގައި ހުޅުމާލެއިން 2,200 ގޯތި, ގުޅީފަޅުން 2,000 ގޯތި އަދި ގިރާވަރުން 2,000 ގޯތި ދޭނެ އެވެ. މިހާރު ގޯތި ލިބޭނެ ކަމަށް ލިސްޓުގައި ބުނެފައިވާ މީހުންނަށް ގޯތި ދެނީ ކޮންތަންތަނަކުން ކަމެއް އަދި ހާމައެެއް ނުކުރެ އެވެ.
