ރިޔާދު، ސައުދީ އަރަބިއްޔާ (ޖުލައި 4) - ސައުދީ އަަރަބިއްޔާގެ ޕްރޮފެޝަނަލް ލީގުގެ ކްލަބް، އަލް އިއްތިފާގުގެ ކޯޗަކަށް ލިވަޕޫލުގް ކުރީގެ ކެޕްޓަން، ސްޓީވެން ޖެރާޑް ހަމަޖައްސައިފި އެވެ.
ޖެރާޑް، 43، ވަނީ އަލް އިއްތިފާގާ އެކު، ދެ އަހަރުގެ ކޮންޓްރެކްޓެއްގައި ސޮއިކޮށްފަ އެވެ. މިދިޔަ މަހު ދިން މީޑިއާ އިންޓަވިއުއެއްގައި ޖެެރާޑް ވަނީ އެހެން ގައުމެއްގެ ކްލަބަކާ ހަވާލުވާން ހުށަހެޅުމެއް ލިބިފައިވާ ކަމަށް ބުނެފަ އެވެ. އެކަމަކު، ހާލަތުގެ ގޮތުން އެ ޑީލަށް އެއްބަސްވެވެން ނެތް ކަމަށެވެ. އެކަމަކު، ހިޔާލު ބަދަލުވެ، ޖެރާޑް މި ވަނީ އަލް-އިއްތިފާގާ އެކު ކޮންޓްރެކްޓްގައި ސޮއިކޮށްފަ އެވެ.
ޖުމްލަ 16 ޓީމު ވާދަކުރާ ސައުދީ ޕްރޯ ލީގުގައި އަލް-އިއްތިފާގު މިދިޔަ ސީޒަން ނިންމާލީ ހަތް ވަނައިގަ އެވެ. އެއީ ޗެމްޕިއަން، އަލް އިއްތިހާދަށް ވުރެ 35 ޕޮއިންޓް ފަހަތުންނެެވެ.
ޖެރާޑް، ޓީމެއްގެ ކޯޗުކަމާ މި ހަވާލުވީ ރަސްމީކޮށް ވަޒީފާއެއް ނެތި، އަށް މަސް ވަރު ހުރުމަށް ފަހު އެވެ. މިދިޔަ އަހަރުގެ އޮކްޓޫބަރު މަހު އެސްޓަން ވިލާ އިން ވަނީ ނަތީޖާތަށް ދަށްވެ، ޖެރާޑް، އެ ޓީމުގެ ކޯޗުގެ މަގާމުން ވަކިކޮށްފަ އެވެ.
ފުޓްބޯޅައިން 2016 ވަނަ އަހަރު ރިޓަޔާކުރުމަށް ފަހު، ލިވަޕޫލް ރިޒާވް ޓީމާ އެކު ކޯޗިން ކެރިއަރު ފެށި ޖެރާޑް، ރަސްމީކޮށް ޓީމެއްގެ ހެޑް ކޯޗުކަމާ ހަވާލުވީ 2018 ވަނަ އަހަރު ސްކޮޓްލެންޑްގެ ރޭންޖާސްއާ އެެވެ. އޭނާ ވަނީ އެ ޓީމަށް 10 އަހަރު ތެރޭ ފުރަތަމަ ފަހަރަށް ސްކޮޓްލެންޑްގެ ލީގު ތަށި ހޯދައިދީފަ އެވެ.
