ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲ ވަކިކުރަން އެމްޑީޕީން ހުށަހަޅާފައިވާ ދެ މައްސަލައިގެ ތެރެއިން އެއް މައްސަލަ އަނބުރާ ގެންދިއުމާ މެދު ވިސްނާނެ ފުރުސަތު ލިބުނީހީ މިހާރު ވެސް މަޖިލިސް ރަނގަޅަށް ކުރިއަށް ގެންގޮސް ގެން ކަމަށް އެމްޑީޕީގެ ޕާލަމެންޓްރީ ގްރޫޕުން މިއަދު ބުނެފި އެވެ.
އެމްޑީޕީގެ ޕާލަމެންޓްރީ ގްރޫޕުން ރައްޔިތުންގެ މަޖިލީހުގެ އިދާރާގައި މިއަދު ބޭއްވި މީޑިއާ ބްރީފިން ގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެ ގްރޫޕްގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވީ މަޖިލިސް ކުރިއަށް ގެންދިއުމާ މެދު މަޖިލީހުގެ ރިޔާސަތާ ކުރެވެން އޮތް ހަމަ އެކަނި މަޝްވަރާއަކީ އިތުބާރު ނެތްކަމުގެ މައްސަލައެއް އަނބުރާ ގެންދިއުމުގެ މަޝްވަރާ ކަމަށެވެ.
ރައްޔިތުންގެ މަޖިލީހުގެ ޗުއްޓީގެ ތެރޭގައި ދައުރުން ބޭރު ޖަލްސާއެއް ބާއްވަން އެމްޑީޕީން އެދުމުން މިއަދަށް ޖަލްސާއެއް ތާވަލުކުރި ނަމަވެސް އެ ޖަލްސާ ފެށުމާއެކު ރިޔާސަތުން ވަނީ އެ ޖަލްސާ ނިންމާލައިފަ އެެވެ.
އެކަމާ ކަންބޮޑުވުން ފާޅުކުރަން ބޭއްވި ބްރީފިންގައި "އަދަދު"އިން ކުރި ސުވާލަކަށް ޖަވާބުދެއްވަމުން އަސްލަމް ވިދާޅުވީ މައްސަލަަ ހައްލުކުރުމަށް ޓަކައި މަޖިލީހުގެ ރިޔާސަތާ އެކު ކުރެވެން އޮތީ އެންމެ މަޝްވަރާއެއް ކަމަށެވެ. އެއީ އޭނާ ވިދާޅުވި ގޮތުގައި އިތުބާރުގެ އެއް މައްސަލަ އަނބުރާ ނެގުމުގެ މަޝްވަރާ އެވެ.
"މިސާލަކަށް މައްސަލައެއް ނެގުމާ ދޭތެރޭގައި ވެސް ވިސްނަން ވެސް ޖާގައެއް ލިބިދާނެ ފުރިހަމައަށް، އަދިވެސް މިސާލަކަށް މަޖިލިސް ގެންދަވާ ނަމަ ވެސް،" އަސްލަމް ވިދާޅުވި އެވެ.
އޭނާ މިމޭރުމުން ވާހަކަ ދެއްކެވީ މަޖިލިސް ކުރިއަށް ގެންދެވޭނެ ގޮތެއް ހޯދަން ރިޔާސަތާ އެމްޑީޕީން މަޝްވަރާކޮށްފާނަންތޯ ސުވާލުކުރުމުންނެވެ. އަސްލަމް ވިދާޅުވި ގޮތުގައި މަޖިލީހުގެ ރައީސް މުހައްމަދު ނަޝީދު ކަންތައް ކުރައްވާ ގޮތުން، އެފަދަ މަޝްވަރާއެއް ކުރުމަކީ ވަރަށް އުނދަގޫ ކަމެއް ކަމަށެވެ.
